Москве дIайихьача робототехника фестивале толам баьккхаб ГIалгIай мехкарча бераша

Март бетта 7 денгара 12 денга кхаччалца йолча хана чухьа ишкола дешархошта юкъе дIахьош «Робофест» яха Россе технологен йоккха фестиваль хилар. Робототехника даькъе эггара доккхагIдолча вIашагIкхетарех йоккхагIйола фестиваль яр из. Укх шера цига дакъа лоацаш Россе паччахьалкхен 75 мехкара 7 500 доакъашхо вар.

Иштта цига дакъа лоацаш ГIалгIайчера яха тоаба а яр 24 сагах латташ. ДIадахача шера хинначул кхозза дукхагIа бар укх шара вай мехкара баха кагирхой. Хьалха хинначул уж хьасовбовлар, вай мехка массайолча шахьарашка ЦМИТ «Реновация» филиалаш хилар бахьан да. ХIаьта Реновация проект кхоачашъяьй ГIалгIайчен экономика дегIайоалаярах йолча министерствос гIо дирца.
Цу моча метте дакъа лоацаш хилча хьалхе кийчам баь, цхьан тайпара тIехбола дешархой къоастабе безаш хул. Иштта къахьийгадар ЦМИТ Реновацен викалаша, ер шу долалуча хана.
«Укх шера, Робофеста, мехка филиал йолча Назранерча гимназе январь бетта вай мехка гIолла яхьараш дIайихьаяр оаха, вай берашта юкъера дикагIвар хьакъоаставеш. Из дакъа чакхдаьннчаул тIехьагIа белгалдайнараш Магасереи, Назранереи, МагIалбикереи, Элдарха-ГIалий тIареи бераш дар», — йоах Реновация хьехархочо Оздой Оарце.
Фестиваля хьалхарча деношка вай кагий доакъашхой «Лучшие новаторские идеи» яхача FLL даькъе дIайихьача яхьарашка хьалхабайнаб. Из моттиг яккха вай берий аьттув баьннаб Назранерча гимназени, Магасерча лицеяни, ЦМИТ «Реновация» юкъарчени викалаша хьинаре къа а хьейга, цхьана баь болх бахьан долаш.
Из доацаш кхы а цхьаькха хоза кхаъ хиннаб вай мехкара бахача робототехника доакъашхошта, Федеральни кхелахой тоабан чу Сампенаькъан Мадина дIа а йийха дIачуэцарца. Мадина я ГIалгIай мехка гIолла йолча Робофеста этапа керттера координатор.
ХIаьта хургболча технарашта ловца боаккхаш аз оал, дIахо йодача хана, ди тIехьа кхы а лакхагIа толамаш доахаш дIачакхбовла Дала аьттув боаккхалба цар.

Матенаькъан Илез

Добавить комментарий

Ваш e-mail не будет опубликован. Обязательные поля помечены *