Наб ший боарамах е еза

МоллагIа хаоттама ханаш шоайла хотталуча хана сага дегIа оамало кIезига ший тайпара тIаэца из гIулакх. Къаьста Iа дIа а даьнна бIаьстий хьаэттача, цу хозача хаоттама хана хьалхарча беттаца дикка зувш хул из гIулакх. Дукхаш салаIара, дегI мукъадитара тIера хул. ХIана аьлча Iанна шелал бахьан хьулденна дIайха хила гIерташ даьллача дегIа бIаьсти хьаяларца йIовхал сов чIоагIа эшаш хилац. Из деррига а наб ярца хьалдузаш хул цхьабола нах.

Техка да, деннеи бусеи е йоагIача боараме наб еш ца хилча сага дегIа могашала тайп-тайпара халонаш хулилга. Вешта аьлча, хьам боал сага дегIа. ХIаьта массаза наб эшаш хиларо саг мекъ а ву, эгIазъухаш а ший ханнахьа де доагIар хьаде вIаштIехьа ца долаш а хул набара ийша вола саг. Цул совгIа, шийна гонахьарча нахаца ма хетта ийна а хилац из. Набара кхоачам боаца саг лазарашта лаца аттагIа ва, цун даглоацам а ма хетта хилац, цул совгIа, вицвалар долаш а хул.
Из деррига теркал а даь дерригача дунен тIара унахцIено лораяра йолча юкъарчено 2008 шера юкъедаьккхад дерригача дунен тIара набара ди. Юххьанцарча шера из ди белгалдеш нийсденнад март бетта 14 дийнахьа. ХIаьта, дIахо долхача шерашка из ди белгалдоахаш да март бетта дизза доагIача 2 кIира пIаьраска дийнахьа. ХIаьта, укх шера из ди нийсденнад Март бетта 16 дийнахьа. Из ди дезду цу ден хам беш дунен тIарча дукхача паччахьалкхенашка.
Цхьабола нах хул наб яра вIалла тIера боацаш, кхыбараш хул геттара дукха из наб еш, хIаьта цхьаькхаш хул из наб е мукъа боацаш. Бакъда, лораша хьаяхачох ший ханнахьа еш йолча набарал дикагIа дарба дац сага.
Техка ховш да, маIача наьха а кхал наьха а юкъера наб яра гIулакх дукха къоастам боацаш цхьатара хилар. Бакъда, берах болча кхал наха дукхагIа ю наб вокхачарел. ХIаьта, сага деннеи бусеи е езаш йолча набара юкъера ха 8 сахьат я.
Цхьавола саг хул, ханнахьа дIагарахьа а ваьнна наб ца йича цамогаш, кхыбараш хул массехка дийнахьа наб а ца еш лелаш, цох хулаш вIалла хало а йоацаш. ХIаьта Гиннеса, рекордай книшка тIа наб цаеш эггара дукхагIа ха яьккха ва, аьнна белгалваьча сага 11 дии бийсеи даьккхад вIалла наб цаеш.
Цхьабола нах хул, гIулакхаш дукха хиларца кIезига наб еш, тIадоагIача мукъача салоIача деношка наб ерг ма йий шоаш, аьнна хеташ. Уж уйлаш гIалат хиларал совгIа, дегIа зене а я сага. Е йоагIача хана наб ца ерах цкъаи, тIаккха дукха е ца йоагIача хана дукха наб ерах шоззи зе ду сага ший могашала. Цудухьа, гIойле я, хIара бийсанна диззача 8 сахьата наб яр, нагахьа санна ше лерттIа ваха лела чам болаш вале.
Наб мичча хана йой а, ше дунен чу йоаккхаш йолча ханах кхоалагIа дакъа наб еш доаккха сага. Цудухьа, гIойле я наха шоай ханнахьа йоагIача хана чухьа наб яр. Бусалба дингахьа наб яр мишта хила деза хьежача а, медицина оагIорахьа из тахкача а гучадоалар да, бийса тIа ма енгге а из дIакIоаргаялале бийсан хьалхарча дакъагахьа Iо а вижа наб яр. Ишта яьча набаро дегIага а, кертага а салоIийт.
Вай дай кица да: «Бийса лоаца я аьнна наб кIезига ма е, бийса йIаьха я аьнна наб дукха ма е», яхаш. Цул совгIа вай даьша яхад: «Ханнахьа Iовижар кхаь вонах ваьннав, ханнахьа хьагIеттар кхаь диках кхийнав».
Наб яра гIулакх нийсагIа а дикагIа а миштад наха дагадохийта а, наб кIезига еш хилча цох мел зе доалла а наха кердадаккха, набарах къехгаш нах хургбоацаш, сага вахар атта хилийта юкъе даьккха да из ди.
Жи, йоагIача боараме ергья вай наб,е дукхагIа а цаеш е кIезигагIа а цаеш.

Матенаькъан Илез

Добавить комментарий

Ваш e-mail не будет опубликован. Обязательные поля помечены *