Йоккхача паччахьалкхен тIехьлен хоржамаш

ГIалгIачен массайолча шахьарашка, юрташка гIолла Iура денз хьа а ухаш кхаж тоссаш мехка бахархой. Шолжа района доазон тIа ерригаш а 17 хоржама моттигаш я. ХIара моттиг 08:00 сахьат даьлчахой болх беш я, хоржамашка хьаухача наьха хьашташ кхоачашдеш.

Россе паччахьалкхен хьалххо хоржаш кхаж тасса ухачар наха юкъе кагий а боккхий а нах ба. 100 шерага кхоачаш а бIаь шерал тIехбайна а боккхий нах ба хоржамашка дакъа лоацаш. 105 шу даьнна ва ва, хоржамашка ше хьа а вена дакъалоацаш вола Шолжа шахьара вахархо Евкуранаькъан Элберд. Ший паччахьалкхен тIехьлен сагота волча сага кхаж тоссаргба, аьнна хеташ ва воккха саг.

— Вай паччахьалкхе я вай дахаш йола Россе, йоккха паччахьалкхе а я ер. ХIаьта, цунца бала болаш, цун хьал дика хилча сагота болча наха шоай дего къоабал веча сага кхаж тасса беза, хьа а баьхка. Дала вай паччахьалкхе лора а ергйолаш, укхан доал а дергдолаш вола паччахьа хьалхавоаккхалва вайна, — йоах воккхача сага Элберда.

Ерригача Шолжа районе гIолла кхаж тасса хьакъ долаш 23 981 эзар саг ваха. ХIаьта Iуйран 10:00 сахьат даьннача хана лаьрхIача, ерригача районе гIолла йолча 17 хоржама моттигашка  2 930 саго кхаж тессаб. ДIахо кхы а тIаухаш шоай дего къоабалвер хьалхаваьлча дика хеташ хоржамашка дакъа лоацаш ба Шолжа района бахархой.

Матенаькъан Илез

 

 

 

Добавить комментарий

Ваш e-mail не будет опубликован. Обязательные поля помечены *