Наьсарен шахьархой хьинаре дакъалоацаш ба Россе паччахьа хоржамашка

ГIалгIай мехка эггара дукхагIа нах бахаш йола шахьар я Наьсаре. Укхаза бахача наха тхьовра 26 шу хьалха мехка бокъо меттаоттаяьча хана а доккха дакъа лаьцад ГIалгIайчен бокъо хьатIаялара даькъе. Массаза а мехка хулаш долча хувцамашка хьалхара гIа боахаш лаьттай ала йиш йолаш я Наьсаре.

Тахан а Россе паччахьа хоржача дийнахьа Iура денце хьабола а бенна кхаж тоссаш дакъа лоацаш ба Наьсарен шахьара бахархой. Царна лац моллагIа а Россе хулаш дола хIама шоай дакъа доацаш чакхдалийта. Цул совгIа, хIара хоржамхо тийша ва укхаза шоаш хьалхатетташ, вола саг, шоаш га даьккхар пачсахьа хургхилар.

«Наьсарен шахьара лерхIаме вахархо», яха сийлен цIи лелаю 84 шу даьнна Базоркин Ахьмад венав хоржамашка дакъалаца ший дезал а боалабеш. Дог тийша ва воккха саг, хIара гIалгIачо цIенача дег тIара, шоаш га хьанна доаккха а ховш кхаж тоссаргхиларах:

— Вай мехка а, халкаъа а, из доацаш йоккхачапаччахьалкхен а дикадар хилча ловш вай дале хоржамашка дакъа лоацаш хила деза вай. Къаьста кагийча наха овсарех дакъалаца деза хоржамашка. Тхо-м доккхагIдараш кхоана е ломма дайна дIадаргда, дIахо даха дусар тIехьа тIадоагIа ноахал да. Ший кхоане сийрда хургйолаш, шийга паргIато хургйола оагIо е хьажа веза хIара вахархо. Цудухьа, со а венав тахан тIехьа хьалкхувча тIехьенна дика хулдалара, аьнна укх хоржамашка дакъа лаца, — йоах воккхача сага:

Хьинаре къахьегаш болх баьб Ахьмада 60 шера гаргга йолча хана чухьа. Вай паччахьалкхен хоржамаш мел долча хана цкъа уж юкъагIа ца дуташ царга дакъа лоацаш хинна ва воккха саг.

— Са вахарчухьа массехказа хиннад пачахьа хоржамаш, цкъа Iийнавац со цига дакъалаца ца водаш, мехка бIорахочун декхар кхоачаш ца деш. Со ца вахача а нах хургбар цига-м, ца а яхаш, хоржамашка хьа а баьхка кагийча наха а боккхийча наха а – массане вай кхач тассар дехар ду аз. ХIана аьлча воай кхоане, воай паччахьалкхен да ва вай хоржаш вар, — аьнна, хоржамашка дакъалацара нах тIахьехаш къамаьл дир Базоркин Ахьмада.

Хоржамашка цхьаккха тийша болх а е хьовзам а боацаш хоза дIадодаш да ди. Цу хьаькъе дийцар сона 77 хоржама комиссе моттига тхьамада Котенаькъан Лейлас:

— Тха хоржама метте хьа а баьхка, кхаж тасса безаш бола нах Iура денце хьабола а бенна шоай бIорахочун декхар кхоачаш де ба. 10:00 даьннача хана 241 саг вар тха кхаж тесса ваьннараш. Ди хоза а денад шийла йоацаш. Нах боккхий а кагий а хьаухаш кхаж тувсаш ба. Хьалхара кхаж тоссараш а дукха ба тха хоржамашка хьаухаш. Тахан йодаш а йоагIаш а хьоалчагIаш долаш моттигаш ма йий вайна, моллагIа маьре йодаш е маьре йоагIаш йолч йоI а кхаж тасса ярга догдоаха оаха. Массане а тIехдика паччахьа хоржаргва-кх вай, — йоах Лейлас.

Добавить комментарий

Ваш e-mail не будет опубликован. Обязательные поля помечены *