Дага-м дагIац

Дага-м дагIац сона се дунен тIa маца ваьннав, цхьайолча уйлаша геттара къонву; вахаш яьккха ха массехк минуте чакхъийккхе дIайода е сага е вахара цхьаккха лар йоацаш, цхьайолча уйлано къаьнву; дунен тIapa xa сага, адамий вахара ханаца йистача Адамал, Хьавайл хьалхагIа дунен тIa веча санна хеталу. ФуннагIа даь се дунен тIa вена ха оттае велча са-м вIaшеIexьa далац из, сов дукха духьалъувтт сурташ, вахаре дайнараш а йоазонаш дешаш духьалдахка хиннараш а.

Цхьан дийнахьа се цхьаь виса со вагIаш, йитта дагахьа хила ехкача хIамай бIеха хьадж кхийтар сона. Еррига фусам кIалтIартехача йитта кечъяь хIамаш гучаяьланзар, тlaккxa мара зем тIабаханзар айса дешача книжка, из дар французий йоазонхочун Эмиль Золяй «Западня» яха роман. Сона кхийттар яр Жервезас хIамаш юттача хила дехкача бIарзкъий хьадж, ши бIаь шу даьлча Золяй дешаша со волча ера из. Мичахьа яхьа еза аз из, сай вахаре хиннача кхыча хIамашца е йоацаш санна йита еза, хилча мишта ют из. Иштта са вахаре а са кхетаме а вIашагIъийнад са кертачеи арахьеи хиннараш. Цудухьа цхьайолча хана къона хета, цхьайолча хана Адамал къаьнагIа, иштта нийсденна дIаэттад.
Са кхетам чу дунен тIa валар дувзаденна хилар шин хIаманца, царех цаI яр морковка. Из ягIар са даь-веший цIен хъалхашкарча кIаьда тla, из хинна юрт а, цу юртара цIенош а е царел хьалха нах а са кхетам чу бац. Я морковкаш, царгахьа кулг кховдадаь со ва, яха дагахьа, са дIaдaxa кулг царна тIакхачалехьа эггара хьалхара адамий оаз хоз сона, бакъда, хьан я хац, оазаш сага я, таханара цар оттам укх тайпара ба «Мовли йоагIа хьона», цу оазашцара дIадоладелар са, гIалгIачун вахар. Цу тайпара дешаш тахан къаьстадац са къаман нахацара, дIакъайла дала дезаш, дIахьулдала дезаш, лорадала дезаш хиннад вай, уж морковкаш вай беша ягIе а. ДагадоагIа морковка дIатIакхаьча кулг вIашка ца таIаш юхаденалга, даьсса а долаш. Нах больнице, цIагIа, кхай тIa бу, сона-м се цу дахчах яьча картилгах гIолла морковка яккха кулг дачукховдадаь воаллаш дунен тIа веча санна хеталу, бакъда хац лохера лаьттах хьатIаваьлар со е сиглара Iочувера, хIаьта цхьабараш беле а са дунен тIa вар картилга хьалхашка морковка яккха дIачукховдадаь кулг долаш вижа улаш вар хилар. Цигачара цу ца баьннача аьттон тIapa вера укх дунен чу, из ца баьнна аьттув сайца болаш ваха.
Аз хьалха ма аллара шин хIаманца дувзаденна да са дунен чу вар, хьалхара морковка яр, шоллагIа «пирожок» яр, дацар хингал, чIаьпилг, маькх. Ший эрсий цIи йолаш пирожок яр. Из согахьа хьакховдаяьр яр бабушка, хIанзарча са кхетаме хоза йоккха саг, яцар са даьнана, из яр бабушка. Са дог эггара хьалха хьаьста эрсий кхалсаг, цо сога кховдаяь пирожок ший тайпара яр, хIанз из санна бедах даь олг, хингал диа саг хургва аьлча тамаш я теше, цу чу ехка яр цу хана эггара мерзагIа йола комараш: циска комараш. Из сога цо хьакховдайир аьрдехьара, аьттехьа цо сога из хьакховдаяь раьза волаш латтар дедушка, из а са даьда вац, бакъда са кхетаме из «дедушка» аьнна виссав. Цул тIехьагIа айса мел яьккха ха из ши дош боча долаш хьавоагIа со. Эрсашта юкъе нийсвелча дедушка, бабушка яха дешаш хьахезача духьалъотт сона из сурт, дагабох сай дог хьаьста Белоцерковке яхача юрта биса сай дедушка, бабушка. Уж дунен тIapa дIабаха дукха ха хила еза, хIаьта а са дег чу бах уж; цхьан оагIорахьа дедушка латт, велакъежаш, вокх оагIорахьа пирожок чуула оаркхилг согахьа хьакховдадаь бабушка.

Амина Кульбужева

№ 45-46 (11981-982), ера, 29 март, 2018 шу, четверг, 29 марта 2018 года

Добавить комментарий

Ваш e-mail не будет опубликован. Обязательные поля помечены *