Ший дагалоаттама тIакхуш хилар

Вай дахача доккхача дунен тIа, наха шоашта белгал а даь, шоай вахара денош царца дустаргдолаш дукха тайпара оттамаш да. Хьокхама белгалдича царех ба, кулгах боаллача пхе пIелгаца бийза белгалбаьккха «пхе пIелга никъ» яха оттам.

Цу ший тайпарча оттамо кхоачашдешдола декхар да, хIара дийнахьа ший вахара наькъаш эргадахара дича бакъахьдолчунна сагага уйла яйтар. Цхьаволча сага, ше балха тIа вале а, е цIагIа, коа, карта вале а, е кхычахьа нах вIашагIкхийттача вале а ший де дезар дизза кхоачашдарца сайранга хьо ший ди. ХIаьта цхьаькхабараш хул, цу вай хьоахадаьча г1улакхашкахьа дакъа ца лацарал совгIа, цхьаннахьа а, шийгара шийна а е халкъа а пайда цабоаллаш зехьа ха йоаеш. Цудухьа, адамо ший дIадахача денна уйла ергйолаш, цун из ди даьсса, зехьа хургдоачаш дагабеха оттам ба из пхе пIелга наькъацара бар.
Ший дIадахача денна уйла е а, мах бе а вIаштIехьа даргда сага, нагахь санна укх наькъаца из ший ди дусташ хуле. Цу оттама керттера уйла кхоачашъеш дукха ха йоае езаргьяц сага. Денна къа а хьийга сарахьа ше чувахача шийна хьалхашка ший дIадахача денах лаьца 5 хаттар оттаде мара дезац цун. Цхьа каьхата тIа дIа а яздеш, ха а йоаеш хала кхеставезаш хIама дац из. Доххьал 5 хаттар шийна хьалхашка, шийга оттадар мара. Цу тIа, чакхдоалаш а да из.
Шун чам ба аьнна хета сона уж фу хаттараш да ха. Доладелар вай, тIаккха.
Ший кулгах доахкача пIелгашта IотIа а хьожаш, дIахо долхача хаттарашта шийна жоп дала деза сага.
ЦIазапIелг – Денна хьога хьакхаьча дола керда Iилмаш, бакъдар, пайдане хоам. Сайранна дувахача вувца деза шийга, малагIа керда хIама дайзад шийна Iилмангахьара, бакъдолчоаи харц долчоаи юкъе ше малагIа къоастам бир, вай доккхача дуненах фу дайзар, шийна фу пайда ийцар ше.
ЦIийоаца пIелг – Хьамсара а кхоачара а нах. Тешаме жоп дала деза шийна, фу дир ше тахан хьамсарча а кхоачарча а наха сердал йоссаеш, кхоачам болаш ха йоайирий ше, ший даьнеи наннеи, безачарна, веша, йиша, берашта, сесага, дезала.
Юкъера пIелг – Дог-уйла, сина хьал. Мах бе, денна мишта яр хьа дог-уйла. Нагахьа, кIезига долчох а гIадводаш, моллагIа хало аьттонца дIайоалаш хьа ди хиннадале, хийцца дIаходода диълагIдола хаттар оттаде йиш йолаш ва хьо хьайна хьалхашка.
ХьокхапIелг – ГIулакх. Дагадохал, тахан хьанна гIо даьд Iа, хьан бала байбаьб Iа, малагIча сага нийсденна чоалхане хаттар доашхаш къахьийгад Iа, е цун дог-безам совбаккхарца из гIадвигавий Iа?
НанапIелг – Низъоамала хьал. Фу даьд Iа тахан хьай дегIа могашал дика хургйолаши, дегI кадайгIа хургдолаши? Хьай ханнахьа тоъам болаш хIама диадий Iа, дукха ха яьккхайий, компьютера хьалхашка вагIаш, вIалла цу юхера хьа а ваьнна цIенача фега садаьхадий Iа, е дегI мукъадоаккхаш низъоамла даькъе къахьийгадий Iа, гIаш никъ мукъагIа баьбий, кIеззига баь а?
Хала хIама дац из, пхи хаттар. Цу хаттарашта жоп денначул тIехьагIа пIелгаш вIашкадахкарца бий хьа а бийя, хаттал хьайга, фу даьд Iа тахан, хьай вахара наькъаш тоадеш, хьай дагалоаттама тIакхоачаргволаш? Нагахь санна цу хаттарашта хьайна жоп хьо нийса луш вале, хьо цхьаккха сагото йоацаш, ираз, аьттув болаш маьрша вахаргва укх дунен тIа. Бакъда, уж мел дола хIамаш кхоачашде вIаштIехьа цадоалаш, е сагота воацаш хьо вале ханал хьалха къавенна кIалвисар кхерам ба хьо. Из диц цадеш хилалахь, х1ай, хьамсара саг.
Къа-м массаварг а лургва, веланза дийна висар. Лерг а да вай, массадаргаш цкъа хIаьта а. Амма, лораваларца ший вахара никъ нийсача апарах берзабирца атта ваха йиш йолаш ва моллаг1а саг укх дунен тIа.
Хьамсара «Сердало» дешархой, диц ма делаш, дукха хIама даарои, дукха хайна вагIарои, кертага са ца лаIийтарои ханал хьалха саг къавелга. ЦIаккха къа а цалуш маьрша дахалда шо укх дунен тIа.

Матенаькъан Илез

№ 45-46 (11981-982), ера, 29 март, 2018 шу, четверг, 29 марта 2018 года

Добавить комментарий

Ваш e-mail не будет опубликован. Обязательные поля помечены *