ГIалгIай мехкарча экологен кхоачашде деза гIулакхаш

Укх деношка ГIалгIайчен экологехи Iалама торонахи йолча комитета викалаша вIашагIкхетар дIадихьар ГБПОУ «Ингушский политехнический колледж» дешархошца. Укхаза Iилман-балха конференце айдаь хаттар дар «ГIалгIай мехкарча экологен кхоачашде деза гIулакх», дашхара тIехьа.

ВIашагIкхетаре дакъалоацаш колледжа кулгалхой, хьехархой, дешархой бар. Конференце болх дIаболабеш, Экологени Iалама торонахи йолча комитета говзанчас, МутаIаланаькъан Азас дийцар, мел лерхIам болаш да цу тайпара хаттараш теркал дар а, уж дашхар а:
— Тахан вай укхаза гулденнад, додаш долча 2018 шера бергболча балха кхоачамаш хьалххе а белгалдаха. Экологех адам дIакхетадар, цун бух бовзийтар боккха къахьегам ба, хIаьта керттера дар, цхьан дийнахьа баь чакхбоаккхалургболаш болх из цахилар вай кхетадар да. Тха декхар да, кхувшбоагIачарна Iалама торонаи, экологеи бола кхетам дIабалар, цох бола хоам нахага дIабар, бокъо яр йоацар фуд дIахайтар. Цул совгIа, тха декхар да боагIача боараме болх хьабарца вайна гонахьара вай хоза Iалам Iалашде дезаш хиларах нах дIакхетабари, цу даькъе йолаш йола программаш дIайовзийтари».
Иштта шуна гонахьа багIачар болх дIахьош Комитета говзанча волча Яндакъонгий Заурбека вай мехкара комитето бIаргкхоабаш лораерца Iалашъеш мел йола моттигаш йовзийтар гулбеннарашта. Белгалдир, вай мохк цIенагIа хургболча даькъе дакъалаца чам болчар из де аьттув болга а.
ВIашагIкхетара доакъашхошта чIоагIа сакъердам а, чам а хилар Комитета балхаца. ХIаьта Колледжа кулгалхоша баркал аьлар ГIалгIайчен экологехи Iалама торонахи йолча комитета, цу тайпара Iилман-балха конференци шоай дешара цIагIа дIаяхьарах.
Комитета викалаша хьаяхачох, цу тайпара балхаш уж дIакхахьа лаьрхIа ба дIахойодача хана а.

Укх 2018 шера апрель бетта 21 денгара май бетта 21 денга кхаччалца йолча хана чухьа бIарчча бетта ерригача Россе гIолла дIахьош «БIаьццара бIаьсти» яха субботник хургда. Цу юкъе дакъа лоацаш хургья ГIалгIайче а.
Субботника вIашагIкхетаро чулоацаргья еррига паччахьалкхе. Укх пайданерча ногIале белгалъяьха бIеха моттигаш цIенъе а, нувхаш дIаяха а, ца йоагIача йийхка кхалажаш дIаяха а, гаьнаш зизаш дIадогIа а, берий майдаш цIенъе а, хьасташ тоаде а, гаьнашта, наькъа йистошкарча бордюрашта, кIира тоха а, иштта кхы а цIенон тIехьа бола болх бе лерхIа.
Ший Iадатах дакъалоацаш хургья ГIалгIайче цу хьоахадаьча бехкамашкахьа эшар кхоачащдирца дIохьошхургдолча ногIалга. ХIаьта цу балха тIахьожам беш, Iунал деш ГIалгIайчен экологехи Iалама торонахи йола комитет хургья.
Цу пайданерча ногIалга дакъалаца беха лерхI, мехка Iаьдала юкъарчен викалаш, дешара моттигашкара дешархой, юкъара болх лелабераш, массайолча шахьара юрта бахархой, иштта мехка цIено Iалашъерца бала болаш мел бараш.
Из доацаш вай мехкарча комитето дIахьош яхьараш хургья, «Субботника эггара кадайгIа вола доакъашхо», аьнна. Цига дакъалаьцача белгалбаьннарашта декъаш дагалоацама совгIаташ а хургда.
ХIара сага ший мохк дукхабеза, беза декхарийла а ва хIаравар. Ший мехка мара шийчох вахар хетац дукхагIбарашта. Ишта да а да из. Мохк дукхабеза безаш хилар, из лерхIаме хIама хилар а хьагучадоаккхаш вай даьша яхад: «Оалхазара а беза ший мохк». Кхы дашха ца дезаш цу кица маIан вай дика кхетаду аьнна хета сона. Мехкал арахьа волча сага дика кхетадергда уж дешаш. Даима ший цIенгахьа салесташ хул арахьа ваха саг. Цун дега уйла а, син паргIато а ший мехкаца хул.
Цудухьа вай декхар да, вIалла дIахьош ногIал деце а воаш дахаш бола вай боча мохк, шахьараш, юрташ, кураш, отараш цIена лоаттаде.

Матенаькъан Илез

№ 47-48 (11983-984), шоатта, 31 март, 2018 шу, суббота, 31 марта 2018 года

Добавить комментарий

Ваш e-mail не будет опубликован. Обязательные поля помечены *