Сакъердаме дувцараш

Нийса доаца жоп

– Iовдала нах дукха бахий шун юрта, – хаьттад тIавенача сага цу юрта вахача къоаночунга.
– Даьра, из ма вий аьнна хьона дIавувца саг ма вац са, – жоп деннад вокхо. – Цхьабакъда, тха юрта Iуйранна ший гIулакха дIаараваьннар сайранна цIагIа чу-м вагIац, ма эгIабаь нах ба-кх укхаза бахараш ца оалаш.

Иштта я-кх массал

Говраш хоахкача массайодача говрех цецваьнна цхьан болельщико аьннад шийна юххе вагIача новкъостага:
– Укх лаьтта гIолла дIалела дийна хIама цул чехкагIа йодаш кхы хIама хургйий-хьогI?
– Я, – жоп деннад вокхо. – Тха юрта-м ва цу говрел массагIа водаш саг.
– Бегаш бе воалл хьо? Малав из?
– Тха участкови инспектор ва-кх. Кум йогIача моттиге цун сакхете, цига тIакхача гIерташ из дIаиккхача пхо кхувргбац цунна тIехьа.

Самукъадаьккхар

– Ma во хьал да-кх сога кхаьчар. Сесаг ханал хьалха къаеннай, цIенош тишденнад, тIаювхача хIамаех тIолхаш мара йисаяц, Iатто сов къабенна шура а лац, жIале, багара царгаш Iолийга «Аап» алац, – кедав цхьа къонах ший лоалахочунга.
– Беша хьажалахь, беша, – аьннад вокхо.
– Сенна?
– Къона буц тIаяьннайий хьажалахь, – аьннад лоалахочо.

Хьехар дар

Керда венача директоре хаьттад юрта вахача, нах дика бовзаш ва, аьнна хетача цхьан воккхача сагага:
– Тешаме болх бергболаш, Iаьдала боахамах дог лазаш вола управляющи везар-кх сона. Вий хьа белгало йолаш саг?
– Бовза-м дукха а бовзар сона юртара нах, хIаьта из ма вий аьнна дIавувца саг вац са, – аьннад воккхача сага. – Цхьабакъда, жулик мел вар цхьан сахьата вовзаргва хьона.
– Мишта ховргдар из?
– Конторе объявлени хьалтоха мара езац хьона, «завсклад эш» аьнна. Жулик мел вар сецца укх конторе наIар тIа хургва-кх.

Ше бехке хилар

Нурдин пелинг теха, шийца цхьа новкъост воалавеш чувенав. Сесага дийзадац маьра сурт. Цунна раьза а йоацаш цIагIа гIолла кхесташ хиннай из.
Сесага леладечох кхийтта а кхийтта, цунна фу Iоттар ергья-хьогI уйлаш еш ваьгIав Нурдин.
Юххера цIенъюкъе ловзаш волча ший воIа дIабарахьажа новкъостага хаьттад Нурдина:
– ДIахажал, из кIаьнк ахваьккхача санна ший нанна тара веций?
Цо из сендухьа ях а ца ховш новкъосто аьннад:
– Даьра ва, чIоагIа тара-м.
Нурдина уж дешаш мара кхы хIама эшаш хиннадац. Оаз айеш сесага дIахазийта аьннад цо:
– Укх кIаьнка лергаш вирий дараш мо да-кх.
Сесаго, ела а енна, марага аьннад:
– Итт шу даьннад со хьоца яха. Тахан мара хайна-м дац шун тайпах бола маIа нах вира лергаш долаш болга. Цу кIаьнка лергаш хьа лергаш да-кх.

Маьра жоп

Ший мара чIоагIа эгIазъяхача сесага аьннад:
– ШайтIаш вугалва хьо!
– Ткъо шу-м даьннад со цхьан шайтIа каравола, – жоп деннад мара.

Го гIерта тийша болх хилар

Фотокорреспондента Умара ерригача пленка тIа эггара дикагIа йолча нефтяникий бригада сурташ даьхар. Уж гучадаха велча, цох хIама хиланзар, Iаьржал мара кхы хIама дацар цу тIа.
Ший из гIулакх мишта нийсденнад ца ховш гIайгIа еш вагIар из.
– ХIана ва хьо иштта маьлхара? – хаьттад хьатIаенача цун нанас.
– Аз тахан мел хьийга къа дайнад са. Пленка тIара хьадала йиш йолаш цхьа сурт дац. Брак нийсъеннай аьнна хета сона. Кхоана айса редакце фу аргда-м хац.
– Из пленка бочонка чу а елла хьо хий да вахача хана со а хьажаер цунга, из цу чура хьаяьккха. Сона а хIама довнзар.
– ХIанз сона хов брак мичара енай, – велавелар Умар.

Рациональни аьттув лехар

Шин нешас шоайла къамаьл ду.
– СагIи хьо сов дукха езаш вала воал-кх. Кастта шунцига зоахалола нах боахкийтаргба аьнна хеталу сона.
– Ткъаь иттаза уж боагIе а, СагIена аз жоп-м лургдац.
– ХIана? Во зIамига саг хета хона цох? CaгIe ший машен я, дикача балха тIа ва, эхь-эзделах веха вац. Из везаш, цунга сатувсаш дукха мехкарий ба вай юрта.
– Хьо бакъ ле мег. ХIаьта со гIopг-м яц CaгIeгa.
– Иштта гоама ва хьона из?
– Гоама вIалла а вац. СагIи дика саг ва.
– ТIаккха со мича кхет Iа дувцачох.
– ДIахьажал, инкал миссел воккха ма вий из.
– Хилча фу даьд? Къонах ва-кх мичча тайпара из вале а.
– Ай цо-м кIира кечдаь пхьор цкъа Iохайча дIадуарг ма дий. Из кхаба елча денна-бусса пишка тIа латта ма езаргйий са, вIалла хьа а ца йоалаш. Вай замах моллагIча гIулакха рациональни подход хила еза, – аьлар нешас.

ГIанажанаькъан Башир

№ 47-48 (11983-984), шоатта, 31 март, 2018 шу, суббота, 31 марта 2018 года

Добавить комментарий

Ваш e-mail не будет опубликован. Обязательные поля помечены *