Сакъердаме дувцараш

ВОВЗАШЕХЬА

Ворда тIа а вагIаш хьавоагIача Цагена бIаргавайнав шоай юртара цхьа во саг. Цо, тIахоаве со яхаше а, говра шод теха, тIехьваьннав из.
— Ай, хIана дир Iа из? Из ца вовзаш вахар хьо? Сабар хIана динзар Iа? — хаьттад из дIахайнача наха.
— ВаллахIий, ваханзар ца вовзаш-м, сона санна шоана а из вовзаре, ворда тIа хIана хоаваьвац яхаш оаш хеттарг а ма дацар, -яьхад Цагена.

КАД КОРАБАГIАЦ-КХ

Волле, кIаьнк, лоалахошкара цхьа шурий кад беха вайна, — аьнна вахийта хиннав Цаген нанас. Бийса баьде а йолаш, шура яхьаш юхавоагIача хана, ког дIакхийтта, цIаьхха кад бера Iобежаб Цагена.
Аьъ, шура Iояхийтар-кх Iа! — аьннад, тата хеза, гIулакх кхетадаьча нанас.
Шура-м яхийтаяцар аз, кад корабагIац-кх! — яьхад, даггара лаьтта кулгаш хьекхарах из кора ца боагIаш хьувзача Цагена.

МАШЕН ХАХКА ЧАМ ХИЛАР

Грозне автошколе деша а этта чувенав цIен дезала воккхагIвола воI. ТIаккха цун дIатIа а ваха хаьттад цун зIамагIволча вошас.
— Iайха дийша праваш хьа а ийца машен ийцача сога лоаллийтаргйий Iа?
— Лоаллийтаргья, — жоп деннад вешо.
ТIаккха тIа а вена кхы а зIамагIоволча вешо хаьттад:
— Сога лоаллийтаргйийй Iа, машен?
— А! — аьнна лоацца жоп деннад вешо цунна а.
— Ай, укханга ма лоаллийтий Iа, — аьнна кадав зIамагIвола воша.
— Маца лаллийтай аз цунга из, — йоахар йоах, вокхо.

Iасалгаца лархIар

МоцагIа, ши саг а йоалаяь вахаш цхьа саг хиннав. Марас шийна саг тIайоалаярах цун эгIазъяха раьза йоацаш хиннай йоккхагIйола сесаг. хIаьта мар цу юкъа ше керда доаладаьча нускалца хиннав Iеш.
Цхьан дийнахьа марта хана ше балхара воагIаш йоккхагIйола сесаг йолча дIачуэттав цIен-да, хIама даа лаьрхIа волаш.
— Сесаг хьадал цигара дуар, — аьнна Iохайнав из.
— Даьра вайцига хIама-м дац, — аьннад мара мух яь лелача сесага.
— Цхьаккха а хIама дац, — хаьттад мара.
— Даьра дац, — жоп деннад сесага.
— ХIаьта, дIарча када чура яр фуй, — хаьттад марас.
— Ай из-м Iасашта кийдаь хIама дар, аьннад сесага.
Ваха мар хьежача када чу латаш тIоа хиннаб.
— Ай ер ма бий дика, хьабал хьаоттабел аьннад, — мара.
ТIаккха вагIаш хаьттад укхо:
— Цу дIа бога чу ццхарал тIатесса латтар фуй хьа?
— Даьра из а Iасашта кийчдаь хIама да, — жоп деннад сесага.
ХIаьта дIатIа а ваха мар хьежача маькх хиннай бога чура яр.
— Айя ва сесаг, Iасалг миссел мукъагIа лархIа со, — яхад, шийна марта тIоаи маьккхи корадаьча къонахчо.

Хьадийцар Бесайнаькъан Хьабибула.

ЮХЕ МЕЛ ДИССАРАШ

— Каьхата йоазув деша хой хьона? — хаьттад Цагенага.
— Гегтара дика хов, — аьннад Цагена.
— ХIаьта алиф яхача алапа тIехьа малагIа алап доагIа?
— Юхе мел диссараш доагIа-кх! — яьхад Цагена.

АХЧА Е ХЬАЬКЪАЛ?

МоцагIа, цхьан воккхача сагага хаьтта хиннад йоах зIамигача сагага.
— Дада, хIанз ахча дар хьона эшар е хьаькъал дар? – аьнна.
— Ахча дар-кх, кIаьнк, — аьнна жоп деннад воккхача сага.
— Ай, наха-м хьаькъал дикагIа да ма оалий, — аьннад зIамигача сага.
— Даьра, воI, — аьлар йоах воккхача ага. – ХIараненна шийга доацар ма эша, — аьнна.

БАГЕ-М ЕЗАЦ ХЬОНА?

ГIаьле увзаш латташ хиннав Цаген.
— ГIаьле йий хьога? — хаьттад цунга хьатIавенача лоалахочо.
— Я, хьайна гаций хьона са бага йоаллар? — аьннад Цагена.
— Аз-м кхы йий хьога ях? — аьннад вокхо.
— Я, хIана ях Iа? — аьннад Цагена.
— Сона а ял цаI, аз а озаргьяр, — йийхай лоалахочо.
— ХIахьий, дIаоза хIаьта, — аьнна, Цагена дIакховдаяьй цунна гIаьле.
— ХIаьта тов а ял, — аьннад вокхо.
— Даьллахь, новкъост, из оза баге-м езац хьона? — яьхад цунна эгIазвахача Цагена.

IОВДАЛА-М ВАЦАР

Даьллахь, Цаген, ма иман доацаш саг хиннав-кх хьо, хьо ишта ва моттацар сона! — аьнна, бехк баьккхаб пхьегIа тIа нах гулбеннача хана, фуннагIа даь а Цаген царна юкъе юхьIаьржа оттаве дагахьа волча цхьан саго.
— Фу хиннад цигача, воше? — цецваьннав Цаген.
— Сийсара корах чу а ваьнна, са ахчан тIера итт тума дихьад-кх Iа! — аьннад вокхо.
— Деррига-м дихьадац? — хаьттад Цагена.
— А, а, итт тума мара дихьадац!
— ХIаьта аз дихьадац хьона из хьа ахча, — аьннад Цагена. — Итт тума а дихьа, вож хьона диттал Iовдала-м вацар хьона со!

Матенаькъан Илез

№ 47-48 (11983-984), шоатта, 31 март, 2018 шу, суббота, 31 марта 2018 года

Добавить комментарий

Ваш e-mail не будет опубликован. Обязательные поля помечены *