Культура дегIаяр

Ерригача Россе культуран болхлочун ди дездера Iадат доладенна сов дукха ха яц. 2007 шера Россе паччахьа Путин Владимира кулг яздир «Культуран болхлочун ди» яхача, №1111 йолча амара. Из ди дездеш да хIара шера март бетта 25 дийнахьа.

Укх деношка, из ди белгалдоаккхаш доккха цIай дIадихьар Наьсарен Культура цIагIа ГIалгIайчен Культурахи, архива гIулакхахи йолча министерствос. Укхаза шоай болхлошта а, новкъосташта а, хьаьшашта а лаьрхIа доккха тай-толакх кийчдаьдар министерства викалаша. Цул совгIа, «ГIалгIайчен Культураи архива гIулакхаи тIехьа толамаш дахарах», аьнна кхайкаяьча преме чаккхе а йир вIашагIкхетаре.
Культураи искусстваи даькъе тайп-тайпара толамаш доахача наха лаьрхIа преми чIоагIъяьяр 2017 шера. Укхаза белга къоастабаьраш ба культура даькъе ГIалгIай мохк дегIабоалабаьраши, вай культура дерригача дунен тIа дIайовзийтараши. Укх шера ГIалгIайчен Культурахи архива гIулакхахи йолча министерствой 25 даларца из преми нийсъелар а ший лоархIам болаш да. Март бетта 25 дийнахьа ца а хулаш цIай кIезига тIехьадалар дувзаденна да Кемерове хинна хатар бахьан долаш.
Шоашта лаьрхIача цIайга баьхкача наха бIаргтоха а цар сакъердадалийта а кийчья «2017 шера тIехдикагIа дола вIашагIкхетараш», аьнна йоккха выставка яр.
Укхаза баьхка бар, ГIалгIайчен Мехкда Евкуранаькъан Баматгире Юнус-Бек, Халкъа гуллама тхьамада Йовлой Султанхьамида Заьлмах, правительства, министерствай, юкъара болх лелаберий викалаш, иллиалархой, иштта культураца дакъа бараш а цунца чам бараш а.
Эггар хьалха дош оалаш гулбеннарашта хьалхашка йистхилар Баматгире Юнус-Бек. Массабараш цу цIайца шолха даькъалабувцаш, культура даькъе наьха кхетам лакхбар лерхIаме хIама да аьлар Мехкдас. «Культура гIулакх чIоагIа лерхIам болаш да, доххьал салоIама даькъе нах вIашагIбеттарал совгIа, кхувш боагIарашка мехка гIончал кхетадайтара а, халкъашта юкъера барт-безам чIоагIбара а. Къаьстта культураи искусстваи декхар да заманга хьежжа кхувшбоагIарашта шоай вахара нийса никъ хьалахийтара тIехьа, бIорахочун декхар кхетадайтара тIехьа гIо дар. Цудухьа, вай культура дегIаяра тIехьа низ а кечал а кхо ца деш къахьегаш болх дIахьош да вай, культура гIишлош хьалъерца, — аьнна белгалдир Мехкдас.
Цо кердадаьккхар, вай мехка культура даькъе хьалъяь а хьалъеш а латтача гIишлоех лаьца.
«Ер шу чакхдаллалца кхы а бархI культура цIа хьаделларгда вай мехкарча юрташка Iаьлий-Юрта, Долакха-Юрта, БурокIалха, Йоккхача Ачалкхе, Аки-Юрта, Оалкама, АрштIе. Из доацаш, паччахьа Путин Владимира амарца, ахча хьахьожадара тIехьа дIахьош болх ба кхы а 6 гIишло хьалъергйолаш. Цу чу йоагIа ГIалгIайчен мохктохкара музей, Культура цIа, Эрсий драматически театр, Къаман библиотека, Паччахьалкхен филармони, Паччахьалкхен искусства колледж», — аьлар Баматгире Юнус-Бека.
Иштта Мехкдас хьоахадир укх 25 шера Культура министерсвос дIабихьача балха хьаькъе. «Халкъан кхоллам, литература, къаьнара хьайоагIаш Iадатийи гIулакхийи лард я. Царех хIарадар ший тайпара къоастаде Iилма эш. Нахаца дог дийла хилар, хьаьша тIаэцар, воккхагIвар лархIар, гонахьарчар сий дар – уж да-кх вай къаман керттера гIулакхаш», — аьнна белгалдирца, Культурахи архива гIулакхахи йолча министерство масса викалашта баркал аьлар Мехкдас Евкуранаькъан Юнус-Бека.
ДIахо кхы а нах йистхулаш дIадихьар вIашагIкхетар. Гулбеннарий дог гIоздаккхарца салоIамбеш ашараш лийкхар мехка цIихезача иллиалархоша. Цу юкъе гIолла дIадихьар 16 наминацех хьалхаваьннача 16 сага луш дола совгIаташ дIадекъара дакъа. Белгалде деза, верригаш а преме конкурсе дакъалоацаш хиннараш 58 саг хинналга.
Хьалхара моттигаш йоахаш белгалбайначарна кийчдаь дагалоацама совгIаташ дар, доххьал цар яьккхача номенацех доагIаш кийчдаь. Цул совгIа, ГIалгIайчен Культурахи архива гIулакхахи йолча министерствос ахча даларца а белгалбир хьалхабайнараш.
ВIашагIкхетар чакхдоаллаш Культура министра ГIазданаькъан Марета баркал аьлар, из цIай вIаштIехьадоаккхаш цу юкъе дакъа мел лаьцарашта а, цига дIа мел баьхкачарна а. Цо белгалдир, деррига вIаштIехьа мел даьннар халкъа къахьегамца да, аьнна. «Шо да тIех лерхIаме дараш. Оаша яха ют оашош кхеберий сийдола цIараш. Аз доккха баркал оал шоана вай мехка а йоккхача паччахьалкхен а культура дегIайоалаяра даькъе оаша къахьегарах», — аьлар Культура министра.

Матенаькъан Илез

№ 50 (11986), ера, 5 апрель, 2018 шу, четверг, 5 апреля 2018 год

Добавить комментарий

Ваш e-mail не будет опубликован. Обязательные поля помечены *