Шийх тийша дитар кхоачашдар

ДIадахача 20 бIаьшаре хиннад яхаш дувцаш цхьа хIама да. ГIишлон балхаш деча йоккхача фирме прорабл болх беш хиннав цхьа саг. Наха чIоагIа дика цIи йоаккхаш хиннай цох, из хьаьнала вахаш наьха хIама ца дуаш, цIена къахьегаш саг ва яхаш вувцарца. Прораб хила а хиннав шийна ма могга къахьегаш, хьинаре болх беш доккхий а кагий а цIенош дотташ.

Дукхача шерашкахьа болх беш дукха цIенош детта хиннав из. Ше воккха хилча пенсех ваха лаьрхIад цо.
— Балхара дIавала воал со, — аьннад прораба.
— Фу бахьан да хьо дIаваха лаьрхIа хилар, – хаьттад из Iийча бакъахьа хетача фирма кулгалхочо.
— Воккха а хиннав, кIаьд а веннав. Сай Даьла цIи а йоаккхаш, дикан тIа вон тIа а водаш, дезалий дезал а кхебеш вахаш, дIахьоргья аз сай укх дунен тIа дIахо йиса ха, — аьнна жоп деннад прораба.
Дукхача шерашка къахьегаш шийца болх баьча воккхалгахьа лестача къонахчох къаста хала хийттад хьакима. ТIаккха аьннад цо цунга:
— Хьажал, хIанз тIеххьара диса дукха доккха доацаш цхьа цIа да вай хьалдотта дезаш, из болх Iа боре тIаккха-м хьа каьхата тIа кулг а яздаь мукъавалийта пенсех вохийтаргвар вай хьо. Аз дика преми а язъергья хьона. Раьза вий хьо?
Прораб раьза а хинна, кхы юкъ ца йоаккхаш болх дIаболабаьб фирмас. Кердача чIоагалдах цун де дезар дукха доккха доацаш, зIамига дезала лаьрхIа цIенош хиннад. Эшар хьатIа а лоаттадеш, чехкача боларах дIаболабаьб цIенош доттара болх.
ЧехкагIа болх чакх а баьккха пенсех ваха уйла йола прораб болхлошка ма даггара къахьегийташ, сихагIа йистевала гIерташ болх беш хиннав. Цхьадола хIама кхоачамбоацаш дисача талмаста из дуташ, ше беча балха дукха кIат ца беш хиннав къавенна прораб. Дагахьа ховш хиннав из ше беш бола болх цIена а дег тIара а боаггIача тайпара ше хьа ца белга, амма цох шийна тIера бехк дIабоаккхаш хиннаб цо тIеххьара чакхбоалаш болх из хиларца.
Юххера а болх чакх а баьнна, шийга из хьабенна шоай хьаким хьа а вийха кийча хьалдетта, тхов тIа а бахийта, чура тIера тоадаь латтача цIен дIоагIаш дIа а денна, ше балхара цIагIавита аьнна дехар деш дола каьхат дIакховда а даь, аьннад прораба:
— Даьла къахетамца болх чакхбаьннаб, укх каьхато яхар кхоачашдеш кулг яздел Iа сона.
Вокхо тIера а чура а цIенга хьежа чакх а ваьнна аьннад:
— Фуд хой хьона? Ер цIа хьа да. ХIахьий, хьай дIоагIаш дIа а ийце, хьай дезалца ваха хьай цIагIа дIачугIо. Массадола каьхаташ хьа цIарагIа дIаяздаь кийча да. Дукхача шерашкахьа Iа хьинаре къахьегар бахьан долаш вай гIишлон фирмас хьона совгIата луш да ер цIа.
Прорабага хинна хьал цун шийна мара довзаш хинна дац. ЦIевенна, эхь хеташ лаьттав из, хIаьта цун гонахьа мел латтараш даггара из хеставеш, ловцаш доахаш, кердача цIен вахар даькъала дувцаш гIадбахарца тIоараш детташ хиннаб. ХIаьта прораб, ше дукха теркал ца деш карагIдийнача гIалатех цIевенна лаьттав. Кхийттав из, кхоачамбоацаш мел дисари, талмаста ше мел даьри шийна бала хинна дохьалдаргдолгах, хIаьта гонахьа мел латтараш, шоаш цунна даьча дезача совгIатах эхь хеташ из ва мотташ хиннаб. ХIанз из ваха везаш ва цу ше хьадаьча дика доацача цIагIа.
Укх дувцара тIахьехама уйла мишта я аьлча. Вай дерригаш а прорабаш да. Воаша оттаду вай воай вахар. Ше пенсех вахале цу прораба даьр мо дола хIама дераш а хул дукхаш. ЛерттIа къа а ца хьегаш, боаггIача боараме хьабиц вай воаша беш бола болх, сага ховрг мичад аьле, амма цох доккха зе дала тарлу, е из кегар баьчунга шийга кхача тарлу юххера а. цул совгIа, дунен Iаьхарта ден бала а ба из.
Сенга кхача гIерташ да вай, фуд вайна лоархIамегIдар? Вай оттадаьча тайпара хул вай вахар, деррига вай тахан хьадеш мел дола хIама шийгахьа лерхIам болаш да. Воаш кхоаненга даргдола дахар да вай тахан оттадеш дар. Цудухьа дог-цIена, маьрша бе беза моллагIбола болх, чехкагIа баь чакхвалардухьа ца а беш.
Дукха гIишлош яй вай мехка тIехьарча шерашка, хIанз кхы а даггара хьалйотташ латта. Дукха тайпара фирмаш я из болх кхоачаш беш, дукха прорабаш ба цига. Са хаттар да из болх беш мел болчарга, цул совгIа кхыча даькъе болх бечарга а:
— Оаша мишта кхоачашбу шоай болх, вай лакхе хьоахаваьча прораба мо бу, е кхоана цIе дала дезаргдоацача тайпара Даьла а наьха а бехк лорабеш бу?
Цу цхьан хаттара жоп дала мара дезац вайх хIаране.

Матенаькъан Илез

№ 55 (11991), ера, 12 апрель, 2018 шу, четверг, 12 апреля 2018 год

Добавить комментарий

Ваш e-mail не будет опубликован. Обязательные поля помечены *