Банкинга даькъе керда гIабаккхар

Магасерча «Артисплаза» яхача хьаьший тIаийбара цIагIа ГIалгIайчен Экономика дегIайоалаерах йолча министерство Кулглхочо ТIоаршхой Умалата кулгал а деш вIашагIкхетар дIадихьар ГIалгIай мехка исламски банкинг юкъе яккхара дош дувцаш.

ВIашагIкхетаре дакъалоацаш бар, Iаьдала а юкъарча а организацешкара экономика даькъе болх беш бараш, ГIалгIайчен паччахьалкхен университета дешархой, юкъара болх лелабераш, махбара даькъе къахьегаш бараш иштта кхы а.
ТIехьарча хана исламски банкинг хьаеллара даькъе дола хаттараш дукха ийду наха из бахьан долаш вай мехка а из гIулакх тар ма лу чакхдаккха уйла йолаш я ГIалгIайчен экономика дегIайоалаерах йола министерство. Цу гIулакха дух тIа бовла а из тахка а, из мишта хила деза а ховш цу тIехьа къахьегаш вола Селий мехкара семинара-болх бахьаш вена «ЛяРиба-Финанс» яхача исламски финансови компане кулгалхо вола, Россе исламски финансировани даькъе болча говзанчи ассоциацен доакъашхо, Дагестана гуманитарни института воккхагIвола хьехархо Алискеров Мурад вар:
— Исламски банкингаца болх бе аттагIа хеташ а, моллагIа мехка хьадеча хIамангахьа дакъалаца чам болаш а дукхаш ба. Цудухьа наха аттагIа хургдолча тайпара, бусалба динца харцахьа хургдоацача тайпара наьха хьашташ кхоачашдар тIехьа из болх вай мехка дIаболабе уйла йолаш да тхо. Цу гIулакха хIанзле вIашагIъелла тоаба я эшар а дезар а вIаштIехьадоаккхаш. ХIаьта из болх ма барра кхетабардухьа вайна пайда эца, лаьрхIа Селашкахьара венача «ЛяРиба-Финанс» яхача исламски винансови компане кулгалхо Алискеров Мурада дика хьалхадаьккхад цу даькъе эшаш дола хIама. Дукха ха ца йоаеш цу гIулакха эшар вIаштIехьадаккхарца из болх дIабахьа хьожаргда тхо. ХIанзле из гIулакх тахка а, довза а вIашагIъелла тоаба я», аьлар — Экономика Министра ТIоаршхой Умалата.
Гулбеннрий хаттараш дукха дар венача хьаьшага. ХIара хаттара жоп а луш, шоаш из болх дIаболабеча хана юхьанца шоай хиннача кхоачамбоацарех а, эшарех а дийцар Мурада:
— Ер дош чIоагIа лоархIам болаш да, хIана аьлча исламски банкинга ахчаца аттагIа да наха шоай базара, е махбара тIехьа барт бе. Аз догдоаха цу гIулакха хьалхара гIа а баьккха из болх ГIалгIай мехка дика чакхбарг хиларах. Исламски банкига дика фуд аьлча, Iа барт беча хана хьа хинначул совгIа кхы хIама тIакхетац хьона, дино харцахьа лоархIаш йола йоал яц цунгахьа. ЧIоагIа дика хета сона тахан указа тхо хьа а дийха ер болх шун мехка чакхбаккха уйла йолаш шун хьакимаш хилар. Къахьегарца вIаштIехьадаргдолаш да из, цул совгIа дика цу хьаькъе дола хаттараш дашха ховргдолаш экономика даькъе говзанчаш а ба шун», — аьнна белгалдир Алискеров Мурада.
Ший вахара никъ ше къона хиларга хьежжа кердача боламца болабаьча ГIалгIайчен чIоагIа лоархIаме да, экономика даькъе шийгахьа пайда барца керда гIабоаккхаш дола моллагIа хIама юкъедоаладар. Къаьстта дика да из, вахар тоаде а аттача даккха а уйла йолаш къахьегача хана дино хьалхадаьхача бехкамашца товш хилар.
— Из дош Россе дувцаш латта дукха ха я. Со се из дагадоаллаш а доладича бакъахьа хургдар-кх аьнна хеташ а цхьаца юкъара болх лелабеча нахаца, предпринимателашца из дувцаш хиннав укх пхе шера. ДукхагIа оаха дийцар дар, цу даькъе эшаш бола наьха кхетам лакхбар, дешар Iомадар. Предприниматель хиларга хьежжа бизнес лакхъе чам хиннача хана ахча эшаш хилар сона. Цу тайпара ахча банкера мара дахьаргдац Iа. Хаттараш увттар са исламски банкингаца из гIулакх хьаде йиш йолаш хилча ма дика дар-кх, аьттув хургбарий-хьогI из гIулакх юкъе даккха, аьнна хеташ. Из вай кхетадаь дикка ха я, бакъда хIанз гIа а баьккха доладеннад из, Даьла къахетамца. ХIанз Татарстанеи, Дагестанеи долаш да из гIулакх. Дагестане исламски банкинга кечала оатхалаш Iалашъерца, нахаца боагIача боараме из болх хьабарца шоай никъ лерттIа дIаболабаьб цар.
Вай экономика министерствос из гIулакх шийна дIатIа а ийца, из дош ай а даь цу даькъе эшаш бола говзанчаш хьа а бийха из болх дIаболабар чIоагIа лерхIаме да. Исламски финанс яхача гIулакхах наьха кхетам кIезига харц хул цхьайолча хана, масала юхадала а ца дезаш цхьа атта каракхоача ахча из долаш санна хеташ из уйла йолаш хул цхьабараш. Нах цу гIулакха кийча а ба наха атта а хургда из долалой, бакъда къа цахьийгача хIама хьахилац. Из дика хIанад аьлча, хов хьона тIеххьара диар дIа а даьккха юстара а тетта хье вутаргвоацилга», — йоах «Опора России» яхача юкъарчен кулгалхочо, предприниматель волча Бузартананаькъан Ахьмада.
ВIашагIкхетар чакхдоаллаш гулбеннараша бартбир цу гIулакха эшашбола нах хьагул а баь из болх лерттIа вай мехка дIболабергболаш тоаба вIашагIйолларгья аьнна. Ший ха йоаеш вай мехка хьа а вена вай экономисташта семинар ялар бахьан долаш баркал аьлар министр Умалата Селий мехкара Алискеров Мурада.

Матенаькъан Илез

№ 56 (11992), шоатта, 14 апрель, 2018 шу, суббота, 14 апреля 2018 года

Добавить комментарий

Ваш e-mail не будет опубликован. Обязательные поля помечены *