2018 шера Мехкдас ГIалгIайчен Халкъа гулламага даьча кхайкарала хоадамаш чакхдахара йолча балха тоаба хьалхара ховшар

 

Укх деношка зIамагIча хьаьша цIагIа Мехкдаь кайкарала хоадамаш чакхдахарах йолча балха тоабан хьалхара ховшар хилар. Цох дола хоадамаш чакхдахарах йола из тоаба хьаяьй Халкъа Гуллама тхьамада Йовлой Зелимхана.

Халкъа Гулама тхьамада гIонча вола Светличный Василий керте эттача балха тоабан юкъе бахаб Парламента керттерча ворххIе а комиссе цIарах бола нах. Евкуранаькъан Баматгире Юнус-Бека Халкъа гулалмага даьча кхайкарала тIа белгалдаьхараш, тIадоагIача массехк шера тайп-тайпарча оагIорахьара мехка хьалашка латтаргдолча де дезарех – дешара хьаькъе, унахцIено лораяра хьаькъе, культура хьакъе, кхыдарий хьаькъе – керттера дараш да.
Светличный Васийле ший болхлошта хьалхашка оттадаь декхар, кхайкарала хоадамаш чакхдахарах йола балха тоаба цIаькха вIашагIкхетача хана шо-шоай оагIорахьа де дезарех а де лерхIарех а дола хетамаш бIаргагойтар да.

Йовлой Зелимхан: «Ишколаш йол-йолча увттаеш йола карташ берий кхерамзле Iалашъердухьа деш дарий дакъа лархIа доагIа»

Ишколе даха арадаьнна бер озадала дезаш дукха хIама да новкъа. ХIаьта бер даь-наьна бIаргкIалара даьнна ха чIоагIа теркалъе ма езий. Дешара заведенешца дувзаденна, целевой програмо дIадехар кхоачаш а деш, моллагIа а йодаш-йоагIаш йола хIама лелача наькъашца яда ишколаш а деша дахале бераш ухаш йола учрежденеш а, технически средствашца Iалашъяра дахача шера даь дукха хIама да вай мехка.

Карарча ГIалгIайчен массайолча дешара заведенешка аьшка карташ, светодиодни светофораш овттаяь яьнний, кхыдола хIамаш даьд. Бакъда цхьайолча метте увттаяь карташ, боагIашбола теркам тIабохийташ увттаяьяц. Яндаре №2 йолча юкъерча дешара ишкола юхе иштта да из, масал. Карт-м оттаяьй, цхьабакъда, ишкола IотIабоагIа гIашхлой никъ бисаб укхаза болх баьрий а меттигерча Iаьдала а терко йоацаш.
Бувцаш бола никъ цахилар зийнад ГIалгIайчен Мехкдас, Россе паччахьа хоржача дийнахьа ишколе вена нийсвеннача. Парламента тхьамада Йовлой Зелимхана, тахан ше юрта ваха нисвеннаволаш, уж кхоачамбоацараш теркалдайтад мехка автодора кулгалхочунга Хаматхананаькъан Батырага, Наьсара района керте латтача Латыранаькъан Исроапалга, Яндаре Паденаькъан ИсмаIалга.
Халкъа гуллама тхьамада къаьстта терко йир, тротуара кIийле чIоагIа ца хилар, юкъ-юкъе нийслуш дола кIоагаш, бетона бIоагIий, тайп-тайпара кхыдола хIамаш гIаш долха бераш а боккхагIбола нах а гIашлой наькъ тIара бувлаш машенаш лелача наькъ тIа хьатIабувлийташ хилар. Цо аьлар: «Карташ-м берий кхерамзле Iалашъе еш ма йий вай, цхьабакъда тротуар ца хилча из кхерамзле Iалашъяр дизза хилац. Динза даргдоацаш хIама да из». Зелимхана яхачох, е гуш дола цхьацца кхоачамбоацараш болх беш баьхкарий мелал бахьан да, е ишкола кулгалхоша шоай хана шоай берий кхерамзленах йола йоакхо йизза яь цахилар бахьан да.
Лоаццача юкъа кхоачамбоацараш цIендаь дIадоахаргда аьнна дIатIаийцад мехка наькъа предприяте кулгалхочо. Цо дувцачох, тротуараш ца хилча ца йоала моттигаш белгалъяь а я, цига дер де болабу болх кхы хьем боаццаш болалургболаш а ба. Масала, Яндаре керда тротуар а машенаш сеца остановкаш а хургйолаш я шин дешара учрежденена юхе (№1, №4 йола ишколаш).
Парламента Спикера къаьстта теркалду, деша дагIача берий кхерамзле Iалашъяра ерригача республика дешара учрежденеш чуйолча гIишлошта юхе наькъашца карташ хилар мел лоархIаме да. Йовлой Зелимхана хоаддаме аьннар дар: «Боккъонца бехктокхаме хIама да из. Цудухьа укхаза дер, вай лораде гIертараш бераш долга а ховш, дизза а лерттIа а ца дича даргдац».

№ 56 (11992), шоатта, 14 апрель, 2018 шу, суббота, 14 апреля 2018 года

Добавить комментарий

Ваш e-mail не будет опубликован. Обязательные поля помечены *