ГIишлон кхоачам лоаттабу керда завод

Тайп-тайпара вIашагIэяь хIамаш хьаеш йола ООО «ТИМ» яха йоккха керда завод хьаеллаш цIай лархIа мегаргдолаш доккха вIашагIкхетар хилар ГIалгIайчен Илдарха-ГIала яхача шахьаре. Из проект дIачакхъяьккхар ООО «Технологии и Материалы» яхача компане кулгалхо Чуранаькъан Iамирхан ва. Из еррига завод хьаерах йолча проектах дIадахар 100 млн сом ахча да.

Хьалха вай мехка цIаккха хиланза, шийна чухьа дукха гIишлон балхашкахьа эшашйола тайп-тайпара вIашагIъийна хIамаш хьаергйолаш керда завод я из. ДIахо йодача хана цу тайпара, гIишлош йоттарах бола кхоачам арахьара тIакхахьа ца безаш паргIато я из мехка бахархошта. Завода кулгалхой уйла я, шоаш хьаеш йола хIама мехкал арахьарчул маьха чухьанахьа а, чIоагIагIа а, дикагIа а хилийта. ХIаьта из ишта хуле доккха гIулакх да из вай мехкара ахча вай мехка кхаста дусаргдолаш.
Илдарха-ГIалий тIа предприяти хьаеллача вIашагIкхетаре баьхка дакъалоацаш бар, ГIалгIайчен Мехкда Евкуранаькъан Баматгире Юнус-Бек, сенатор Дидиганаькъан Мухарбек, ГIалгIайчен Халкъа Гуллама тхьамада Йовлой Зелимхан, ГIалгIайчен экономика дегIайоалаерах вола Министр ТIоаршхой Умалат.
«Ер завод инвестиционни проект я, кастлуш йолча хана чухьа цун кулгалхочо лерхI шоллагIа аргIа дIайолае. Дег тIара гIадвугаш да, дIахо йодача хана лерттIа тIехдика бола гIишлон кхоачам ийбарал совгIа, укхаза вай долча, воай мехка из хьавIаштIехьабоаккхаш хилар. Цул совгIа, укх заводе хьаешйола хIама Россе кхыча мехкашка а дIайохка йиш йолаш хилар чIоагIа лерхIаме хIама да. Болхлошта эшаш мел бола кхоачам ба укхаза заводе вIаштIехьабаьккха. Дала вай мехка беркате йойла ер предприяти», — аьлар Мехкдас, завод а цу чура болхлой а даькъала бувцаш.
Цу тайпарча предприятех шоллагIа я из завод. Хьалхаръяр хьайийлаяр 2 шу хьалха Iаьлий-Юрта. Цу чу Iалашбу гIишлон тайп-тайпарча хIамай бакъа кхоачам. Ший къахьегамца мехка пайда беш я из завод а.
Таханарча дийнахьа ООО «ТИМ» яхача заводе болх беш къахьегаш 32 саг ва. ХIаьта уж дукхагIча хьале Илдарха-ГIалий тIара бахархой ба. Завода викалаша хьаяхачох болхлошта, юккъера доагIа алапи 20 бIаьтумал совгIа хургда. Инвестор волча Чуранаькъан Iамирхана хьаяхачох, берригача низаца болх бе предприяти йолаелча 60 сагага кхаччалца совбаргба завода болхлой.
Таьрге эшам болча продукцен боарам карарча шера 45 эзар тоннага кхаччалца хилийта лерхI. ХIаьта берригача низаца къахьега завод йолаелча 2019 шера из боарам шозза дукхагIа совбала безаш ба.
Обьект хьалйотта дIайолаяьй 2014 шера Илдарха-ГIалий тIа белгалдаьча 4,5 гектар лаьттан тIа. ЗIамига йоаца из завод оттаяьча хана чухьа йистеяккха аьттув баьннаб из йотташ хиннарий.
ООО «Технологии и материалы» — геттара алсамйоалаш дегIайоагIаш компани я. Из кулгал деш я Къулбаседа Россе базарашка гIишлон бакъа кхоачам лерттIа хьабеш хиларца Iалашбеш. Ший болх тешаме, боаггIача боараме хьабеш хилар бахьан долаш дика цIихеза а наха тешал деш а я из компани. ДIахо йодача хана иштта цу хьал тIехьа къахьегаш кхы а чIоагIагIа шоай цIи а, балха мотигаш а лакхача боараме Iалашъе уйла йолаш къахьегаш ба цу компане викалаш. ХIаьта вай царна аьттув кхайкабергба.
Цу тайпара йоккхий заводаш хилча, цу чу хьаешйола хIама ший мехкара хьаэца йиш йолаш хиларал совгIа, цох дIалуш дола ахча саг ше вахача мехка дус, цу гIулакха геттара дика болх ба из. Цудухьа из мо йола заводаш кхы а дукхагIа хьалъеш, уж лораеш боаггIача боараме болх хьабарца къахьегаш вай хуле, мехка а хал.къа а хьал тоалургда. Бакъда, хьадаьр лора ца дой, цо дIадехача декхарашка хьежжа къа ца хьеге диррига а довр кхерам ба.

Матенаькъан Илез

№ 57 (11993), шинара, 17 апрель, 2018 шу/вторник, 17 апреля 2018 года

Добавить комментарий

Ваш e-mail не будет опубликован. Обязательные поля помечены *