Ха йоацаш хаьда вахара никъ

Са Да

Ма кIаьда, ма хоза, ма боккха лерхIам беш яьзду наьнах. Из я-кх вайна укх дунен тIа вахар лур. Бакъда, сона ала ловра, мел доакха дакъа да вай вахаре дас дIалоацар.
Нана кIаьда я, хIаьта наьнал дуккха а кIаьдагIа хул дай шоай мехкарашца.
Тха даь тхо йиъ йоI яр. ХIара яр еза яр цун цаI мара йоацаш мо.
Йиш йоацаш, йишах хьогаш кхийнача цун чIоагIа боча яр ший йиъэ йоI. «Ма доакха беркат да-кх, ма ираз долаш саг ва-кх со, ма дика хиннав-кх соца АллахI», — оалар тха дас тхох доаккхал деш.
Массаза а хьаьшах диза дар тха цIа. Тешаме новкъост, дика гаргара саг, хьамсара воша, дика да вар из. Да цIагIа волча хана сома а доалар ков. Белам, безам, сакъердам бар массаза а. Ма хам беш, ма лерхIам беш дар цун вахара хIара ди. ВIалла дага а дацар цун, сов хьалха укх дунен тIара ший рузкъ хадарг ма дий аьнна.
Дог ловзаш, дог делаш, велавенна мара йист ца хулаш, шийна Дала тIадахка декхараш кхоачашде гIерташ, хьаьнала наькъ тIа волаш яькхар цо укх дунен тIа ше яьккха ха.
Декабрь бетта 10 дийнахьа Iуйран ворхI сахьат даьлча хаьдар цун дунен тIара вахар. Ма Iаьржа делар дуне, ма шийла, ма миска дуне даа дитар цо тхо.
Да вац аьлча дукха ха яькхар оаха теша ца могаш.Теша магацар кхы из бIарга гургвац аьлча, кхы цун оаз хозаргьяц аьлча, дас кхы хьоастаргдац аьлча. ГIа долаш санна хетар тхона тхоашта бIаргагур.Тахан из сурт духьал латт сона. Бакъдац из сона дицлургда яхар.
Тахан да венна цхьа шуи е ахшуи даьннад. Каст-каста гIанахьа гу тхона из. Хоза велаш, раьза а волаш гу. Из вайча кIезига сапаргIата а доал.
Гуш вац, хозаш а вац, бакъда массаза дегашка ва!
АллахIо гешт долда хьох са да! Даькъала хилда хьаделара вахар!

Милаграс Базиева

№ 58 (11994), ера, 19 апрель, 2018 шу, четверг, 19 апреля 2018 года

Добавить комментарий

Ваш e-mail не будет опубликован. Обязательные поля помечены *