«BlogING-2018» форум дIахьоргья ГIалгIайче

Апрель бутт бовш ГIалгIайчен доазон тIа дIахьоргйолаш я хьалхара хулаш йола Ерригачароссе форум «BlogING-2018». Цига гуллургба социальни сета оагIошка багIа 50 блогераш. Цу тайпара дукха блогераш гуллуш хулача форумех хьалхара а я из ГIалгIай мехка а йоккхача Россе паччахьалкхе а.

Цу тайпара форум ГIалгIай мехка дIайихьача бакъахьа хеташ из гIулакх хьалха а даьккха дIадоладаьр Евкуранаькъан Баматгире Юнус-Бек ше ва. Ала деза Мехкдаь ший Instagram чу а, Facebook чу а цо лелаеш оагIош йолга а, царшка моллагIа мехка а паччахьалкхе а долча хувцамех цо хоам белга а. Цудухьа шоай соцеальни сеташкарча оагIошка цхьацца дашха дезаш да аьнна хеташ долча хаттарашкахьа бала кхоачаш болча блогерашца дийла къамаьл дара тIера ва Мехкда цу форуме.
«ЛаьрхIа болча боарама къамаьла тIара дIа а дайна боккъонца дийна хилийта чам ба вай из форум – хIара доакъашхочоа догдоахалга яла а, кхоллама балха моттиг Iалашъе а, царца къамаьл де а, дагар дувца а. Тахан вай дагадоагIаш хила деза блогераш Iаьдалаи нахаи юкъе къамаьл лоаттадара цIенхашта моттиг йолга. ЛаьрхIа болча хоам боаржабара кечала викалал дукха тIехьабусаш боацаш мехка а паччахьалкхе а латта хаттараш дашха кийча ба уж. Цу тайпара хьинаре къахьега кагирхой вай юкъера хаттараш дашхара тIаберзабе беза вай», — аьнна белгалдаьккхар Мехкдас Евкуранаькъан Юнус-Бека.
«BlogING-2018» яха форум ГIалгIайчен доазон тIа дIахьоргйолаш я апрель бетта 24-26 деношка, майски цIайнашта дIагарга а эза. Форум дIахьоргья мехка массехк метте. ГIалгIайчен Мехкдас яхачох укх шера денз дIа хIара шера хургдолаш да из вIашагIкхетар.
Форуме дакъалаца тIабуташ ба социальни сеташкарча шоай оагIошка дIахо белгалду бехкамаш кхоачашдола блогераш: ВКонтакте – 450 эзар хьатIаязвеннар, Youtube – 300 эзар хьатIаязвеннар, Instagram – 150 эзар хьатIаязвеннар, Telegram – 100 эзар хьатIаязвеннар. Нагахьа санна белгалдаьча таьрахьа юкъе воагIаш вола блогер хийцца ваха йиш йолаш ва цу форуме дакъалаца.
Форум вIаштIехьа-яккхарах дола керттера хаттараш доашхаш юстарадоахаш ва Правительства тхьамада гIонча – ГIалгIайчера Москве массаза вола викал ЦIечой Iалихан, шийца цхьана Постпредства тоаба а йолаш.
«Постпредставой викалаша масса хана санна ший Iадатах къонабарашца хьинаре боккха болх дIахьош ба: вай дешархошца а, мехкахошца а, хьинаре къахьегача блогерашца а, кхоллама даькъе къахьегарашца а. ХIазле, цар дола хаттараш а, хилча бакъахьа да аьнна хеташ дола хIама а «BlogING-2018» форума юкъе чудихьад оаха. Тешаш ва со, форума масса доакъашхой раьза хургхиларах, хIаьта цхьабараш ГIалгIай мехка хоза а хийтта майски цIайшка дакъалаца Iе а тарлу ГIалгIайче», — йоах ЦIечой Iалихана.
Цо яхачох, форума керттерча вIашагIкхетара цхьа дакъа Мехкдаьца Евкуранаькъан Баматгире Юнус-Бекаца блогераш цхьана гулбалар хугда. Из дIагIоргда ГIалгIайчен Мехкдаь Администраце юхьдухьал, паргIата къамаьл дIа-хьа дирца. Цул совгIа, хьаьшашка хьежаш лоам бахар да. ЖIайраха района хоза таро бIаргаго а, из йовза а аьттув хургба цар. Иштта блогерашта бIаргаяйтаргья ГIалгIайчен Iалама культурни гIишлош, хайтаргда мехкарча наьха оамал мишта я, даар малагIа мишта кийчду гIалгIаша. Бовзийтаргба гIалгIай иллиалархой, вай мукъам, оамал, гIулакх иштта кхы дукха.
Дика форум я из блогерашта, къаьстта болалуш болчарна шоай балхагахьа керда хIама Iомадара а, шоашта хетар белгалде а къувлар хьаала а. Цул совгIа, керахьа лечкъадечул гIойле я моллагIа бала бола дош хьал а аьнна из дашхара тIехьа къахьийгача. Цу хьаькъе шоай дола дош айде а дувца а таро хургья гулбеннарий.
Форуме дакъалаца чам болчун шийх бола хоам буташ хIанзле регистраци е йиш я, дIахо белгалъеча сайта тIа: http://ingbloging.ru.

Матенаькъан Илез

№ 58 (11994), ера, 19 апрель, 2018 шу, четверг, 19 апреля 2018 года

Добавить комментарий

Ваш e-mail не будет опубликован. Обязательные поля помечены *