Къулбехьен Россе кхоачама таро

Апрель бетта 19-21 деношка Крыме дIахьош Халкъаштаюкъера экономика даькъе йола Ялтински йоккха форум я. Цига ваха дакъалоацаш ва ГIалгIайчен Мехкда Евкуранаькъан Баматгире Юнус-Бек. Мехкдаьца цхьана баха форуме дакъалоацаш ба ГIалгIайчен Правительства вице-премьер Храновский Игори, Экономика дегIайолаерах вола министр ТIоаршхой Умалати. Укх шера форуме кертте оттадаь дош «Дунен кхоане. Россе кхоане.» аьнна да.

Форума доакъашхошка моаршал хаттарах дола лаьрхIа дешаш хьадайтад Россе паччахьас Путин Владимира.
«Дукха хIама чулоацаш йолча форума йикъа программа хьожаяь я, экономика даькъе ший дикача хьал тIехьа бола Къулбехьен Россе бIаьхий кхоачам, инвесторашта дикагIа дIабовзийтардухьа. ЯМЭФ доакъашхошта хьалхашка тIехдика кхоачам оттабаьб Россе бизнесменашцара мадара къамаьл де царна аттагIа хургдолаш, иштта федеральни а, региональни а органи Iаьдалца шоай дош дувцарца гIулакхера болх дIахьоргболаш, дIахо йодача хана бартбара тIехьа цхьацца къамаьл де а аьттув хургболаш», — йоах, Кремля сайта тIа оттабаьча хоама тIа.
Моаршал хаттара дешашца йист хилар Къилбаседа Кавказа федеральни округе РФ паччахьа викал вола Белавенцев Олег. Цо белгалдир, дIадахача 4 шера хинначул, укх шера доакъашхой дукхал диазза совяьнна хилар, форумах хулаш латт бизнесменаши, инвестораши, доазол арахьара хьаьшийи тIабахкара юкъ-моттиг.
ДIахо гулбеннарашка моаршал хоатташ къамаьл дир Крыма Мехкдас Аксенов Сергея: «Тахан Ялтас форуме тIаэцаш ва Росси мехкашкара 3 эзар доакъашхои, 60 совгIа Европераи, Азераи, Африкераи, Латински Америкераи иштта кхы а паччахьалкхенашкари доакъашхой ба. Хьаькъалеча уйланца хьежача санкцешта а кхыдолчоа а тIехьа йола котало я из, мадарра аьлча тIемаца долчун тIехьа йола котало а я. ДIадахача шера форуме 100 миллиард сом ахчан мах бола кулгаш яздаьдар тайп-тайпарча даькъе 30 совгIа бартбар дирца. Укх шера тешаш догдоах аз воай рекорд вай яккхар», — аьлар Крыма Мехкдас.
Форуме кийчъяьча гIулакха программа хьайийлача «Крым — территория успеха» яхача выставкага хьожаш хилар ГIалгIайчен Мехкда Баматгире Юнус-Бек. Хьажар, Крыме агропромышленни паркаш ерах а, «Таврида» яхача трасса наькъа чIоагIлен хьалага а.
«Ялтински форум ГIалгIайченна дика аьттув ба поалхам бекъарцеи, бизнес дегIаярах дола массехк инноваци болх тIаэцарцеи. Цул совгIа, тхо Крыма мехкацара болх хьалхара дIахьош дац. Аксенов Сергеяца тешаме хьоашал а, цхьана еча проекташцара чам а ба тха», — аьлар Евкуранаькъан Юнус-Бека.
Укх шера февраль бетта Соче дIайихьача инвестиционни форуме 2018-2020 шерашка торгово-экономическии, научно-техническии, социальнии, культурнии даькъе ГIалгIайчен Мехкдас Евкуранаькъан Баматгире Юнус-Бекеи, Крыма Мехкдас Аксенов Сергеяси барт баьбар. Иштта форуме акхар барт бир, Крымас шоай мехка йоккхагIчарех йола «Евпаторий» яха санаторий ГIалгIайчен хьалургья аьнна.
Санаторий ГIалгIайченна хьалургйолаш я мах боацаш, цун духьала кхы хIама де а ца дезаш, укхазара бераш цига салаIа дIаахийта аьттув хургболаш.

Матенаькъан Илез

№ 59 (11995), шоатта, 21 апрель, 2018 шу, суббота, 21 апреля 2018 года

Добавить комментарий

Ваш e-mail не будет опубликован. Обязательные поля помечены *