Халкъаштаюкъерча лаьттан денца

Апрель бета 22 дийнахьа дерригача дунен тIа гIолла дIахьош дар Халкъаштаюкъера лаьттан ди. Из цIай дездеш да хIара шера 1970 шера денз хьа. ХIаьта из ди белгалдар хьожадаь да, лаьттанца а цу тIа мел долча хIаманца а нах маьрша, лаьтта лорадеш хургболаш.

Цунца дийза дар укх деношка Магасерча ГIалгIайчен паччахьалкхен филологен университета дешархоша дIадихьа доккха вIашагIакхетар — «Лаьттан фестиваль». Цу цIайга гулбеннарашта бIаргдайташ тай–толакх дар, лаьрххIа кийчъяь сакъердама оагIош, флешмобаш иштта кхы а дукха хIама кийчдарца долча доакъошца белгалдаь.
Филологен университет хиларга хьежжа массехк мотт ба цу чу хьехаш. ХIара мотт Iомабеш болча дешархоша, шоаш Iомабеш болча метта къамай халкъа даар кийчдаьдар. ХIаьта фестивале баьхкачарна бIаргадайр ингалсий, французий, немций, эрсий иштта гIалгIай метта а даараш. Цул совгIа, хIара къаман даар, дувхар, оамал хьахьокхаш болча дешархоша лаьрхIа кийчдаь цу къамай дувхар тIадийхадар, фаьлгаш кийчдаьдар. Цар дийцар вIашагIкхетара доакъашхошта шоай дувхара исторех а, куцах а лаьца.
Университета дешархошта юкъера йоазонхой а суртанчий а балхаш овттадирца гулбеннарашта лаьрхIа кийчъя «Нана-лаьтта» аьнна йоккха выставка яр, лаьтта лораде дезаш хилар хайташ а, из лорадара адам тIахьехаш а.
Университета коа лаьрххIа гаьнаш дIайогIар чIоагIа лерхIам болаш чаккхе хилар фестивале. Боккъалдар аьлча, дика кийчдаь цIай, хоза вIашагIкхетар дар из. Шоашта ца довза дукха керда хIама дайзар фестивале баьхкача наха. Вай лаьтта лорадара тIехьа, нахага боккха хоам бахьаш дар хIара дакъа. Цул совгIа, лаьттан букъ тIа мел долчунца адам кIаьда, лерхIам беш, хам беш хилара тIахьем бар из.
Воаш дахаш дола лаьтта лорадар, цун доал дар, из цIена леладар вайна воашта пайда болаш да, доххьал лаьттан хиннача а ца Iеш. ДIахо йодача хана а вIашагIкхетара хьаьлххоша лерхI филологен факультета хIара шера хургдола цIай цох де а, кувш боагIачар вай лаьттанцара безам, доттагIал совдаккха а.

Матенаькъан Илез

«Сердало» № 61-62 (11997-998), ера, 26 апрель, 2018 шу, четверг, 26 апреля 2018 года

Добавить комментарий

Ваш e-mail не будет опубликован. Обязательные поля помечены *