Халкъага сердал кхувдаю кечал

Дилла газет дешаш хиннача наха хала да, тахан газет а доацаш Iе. ХIанз вайна латташ йолча хана из вайна эшаш а да. ХIара къаман кепайоазош ше-ший никъ бихьаб цу балха тIагIолла. Юстара вай къаман газет а диссадац. Эггара хьалха гIайлгIай къаман хинна газет да «ЦIе гIалгIайче» яхаш, эрсий Iаьдало яздаь. ТIехьагIа цун цIи хийцар «ГIалгIай къел» аьнна. «ГIалгIай къел» яхача газето, ший дIахьош хиннача наькъ тIехьа, дуккха гIалгIай къаман пайда хьабоалаш хIама карагIдалийтад. ХIаьта а уж газеташ дукха гаьнадаьннадац.
Советски Iаьдал долча хана аргIа оттаяьяр газет ше-ший къаман меттал хилийта аьнна. Цигара доладелар вай газет гIалгIай меттал язде. Из язде атта дацар, вайна къаьстта алфавит дезаш хилар бахьан долаш. Дукха из дийца а дийца, шоайла дага а баьнна, цар тIеххьара дош сецар из газет латински алфавита бух болаш алфавит оттадирца хьаде деза аьнна. ГIалгIай къаман из аттагIа хург хилар бахьан долаш дар из.
1923 шера май бетта 1 дийнахьа араяьлар г1алг1ай къаман «Сердало» яхача газета хьалхара номер. Цох вай къама доккха товр, боккха ловца а хилар. Цу газета кепатеха, вIашагIделла из арадаькхачарех, хьалхале лелаяр ва – гIалгIай эггара хьалхара латински алфавит хьакхелла Iилманхо, йоазанхо хинна Малсаганаькъан Кураза Зоврбик. Цунца балха доакъашхо а волаш, цун оагIо хьал а лоацаш болх баьр ва, газета бехктокхаме секретарь, йоазанхой корреспондент, таржамхо хинна Беканаькъан ДордагIа Тембот. Эггар хьалхара газет арадаьннад, 5 бIаь экземпляр йолаш.
1944 – 1957 шерашка кепа ца тохаш соцадаь лаьттад «Сердало». Из соцадар бахьан хиннад, вайна ховш ма хиллара гIалгIай къам мехках а даьккха СибарегIа Iодахьийтар. ХIаьта гIалгIай къаман хьалхара тоабаш мехка яьлча дIаболабаьб «Сердало» юха меттаоттадеш дийндарах бола никъ.
Эггара хьалхара «Сердало» газета номер кепа а теха араяьнний Буро тIа. ТIехьагIа Нохч-ГIалгIай керттера шахьар хиннача Шолжа-ГIале кепа йиттай цун. Таханарча дийнахьа из кепа а тохаш арахецаш да ГIалгIай мехка, Наьсарен шахьаре. Дукха майдилгаш, грамоташ, «Знак почета» яха цIи йола орден а еннай «Сердало» газета, хьинаре къахьегар бахьан долаш.
Хьалха дIаяхача ханашка бе дIакхаьчачунга мара хоам ца беш хинна вай «Сердало» газет хIанз деша, а из довза а аьттув ба дерригача дунен, вай мехка долча хувцамех бола хоам беш интернете ший хоза сайт а йолаш из хиларца. Цо хоам бу вай мехка долча кердадарех, керттерча хIамах, хувцамех. ХозагIа а дикагIа а мелдар, пайда болаш мелдар цо хьабелгал доаккх.
«Сердало» да а да, хург а да, ший къаман дикагIа мел дола хIама белгалдеш, нахага из дIакхайкадеш!
Дахалда хьо хьамсара газет «Сердало», хьай сердал яхь Iа тхона!

Бохтаранаькъан Макка

№ 65-67 (12001-003), пIаьраска, 4 май, 2018 шу, пятница, 4 мая 2018 года

Добавить комментарий

Ваш e-mail не будет опубликован. Обязательные поля помечены *