«Сердалох» лаьца

«Зоврбика тIехк я хьо,
Тембота дулх да хьо»
Беков Т.

Вай «Сердалон» 95 шу дизад. Сага вахаре а, вешта бIарчча мехка вахаре а, йоккха мур я из.
Газета, ший заман чухь, дукха халонаш а, аьттув болаш моттигаш а нисъеннай.
Дешарца, Iилманца хьакхашта баланза болча гIалгIашта юкъе сердало йоаржаеш хиннад газет цу хана. Из цаI мара кхы хинна а дац.
ЦIенхашта болх хиннаб «Сердалон» редакце цу хана шийна тIаийцар: наьха дуненах бола кхетам сийрдабаккхар, лаккхбар, гIалгIай мотт йоазон ларда тIа баккхар.
ХIара статья сенна тара хиннай аьлча – цхьацца кора гарьг юлаш, къоагаеш, арара маьлха сердало чухецаш санна.
Шоаш мехках баьха болхаш, гIалгIаша щоашца Iокхихьай «Сердало» номераш. Укх статьяй авторо иштта ший даь-вошас денача «Сердалон» тIара Iомадир гIалгIай йоаззув 1949 шера.
МоллагIча къама, нагахьа санна цо ше дизза къам лоархIе, ший меттал лувш дола газет деза. Из хьаде дезар къам ше а да, ший уйлаш ший дагардараш, йоаккхонаш газетага дIа а дувцаш. Тахан цу хьаькъехь вай массане а эсало яьй. «Сердало», моцагIа санна, хIара цIагIа чудодаш хила деза. Из болх мела латт, газет яьздаьраш кIезига хиларца.
Цхьаккъа компьютер, интернет нийслургьяц кепайоазонца.
Тахан «Сердалон» редакци я тIатеIIа къахьегаш, газета гIалгIай метта ювргIа тIаоза гIерташ. Вайгар, къамангар, гIо эш царна. Вай декхар да из гIо царна хьадар.
Воашта ма хеттар «Сердало» хилийтар духьа де дезар массехк хIама да:
1) цун тираж лакхъе еза, аз дIалаьрхIача «Сердалон» тираж, эггара кIезигагIа, 12-15 эзар хила езар, лаьрххIа волонтераш оарцагIбаха беза, из болх кхоачашбе;
2) дешачар газета шортта корреспонденцеш хьаахийта еза;
3) газете консультационни пункт хьаелла еза, шоай лоIаме яьздеш болча корреспондентий говзал лакхъеш;
4) газете, бетта цкъа, литературни оагIонаш хьаелла еза; къаьстта цхьа каьхат Iочудолла а мегаргда;
5) шера цкъа-шозза конференцеш е еза, газета хьашташ маьлха доахаш;
6) Iаьдало теркам айбе беза, из цаI мара гIалгIай меттал лувш газет доацилга а ховш.
Воа гIалгIай! Воай хIамах лерхIам а, теркам а, кхом а бе Iомале вай!
Долашдар – лораде, доацар Iалашде.
«Сердало» Дала даькъала долда!
«Сердалон» редакце болхлой, шун болх беркате хилба! Оаха хам бу шун. Довргдац оаш хьийга къа.

Коазой Iийса,
къаман яздархо

№ 65-67 (12001-003), пIаьраска, 4 май, 2018 шу, пятница, 4 мая 2018 года

Добавить комментарий

Ваш e-mail не будет опубликован. Обязательные поля помечены *