ГIалгIай меттах лаьца

Хийрал юкъе даланза хинна гIалгIай вахар бIаргадайна нах тахан кIезига бисаб. Цу бисарашка вай дIахоатте, хьадувцаргда, мел чIоагIа хозне езаш хиннаб гIалгIай цар къонача шерашка. Мел дуне дезаш, баха ховш, лела ховш, вахара хам беш хиннаб уж.

Денна-буса ца соццаш ловзараш лаьттад гIалгIай дикашка. Цига тамашне говза, хоза, духлохаме, кIоарга нигита эздий хIамаш дувцаш хиннад – исторен ларда тIара хьадоагIа эпически дувцараш.
Каьша каьлдеш хиннад, цIувнаша текъамбеш хиннаб, хьам баьнначоа бIарловца еш, ловца боаккхаш – иштта шаьрбеш хиннаб къамано ший эздий мотт.
Мел чоалхане? уйлан говзалца дешаш дувзаш бувца беза дов къоастадеш кхелахоша бувца мотт!
Дизза юкъара вахар долча вай къамо низбола мотт хьакхеллаб. Цу хана шаьра мотт бувца ховш шевар хиннав. ХIаьта царна юкъе а цIихеза, метта говза болаш, кхелахой, багахбувцамхой, хьаькъалхой хиннаб. Царех цхьабарий цIераш хIанз а йицъеланза я: Ведажанаькъан Угаз, Мухлой КIури, Морхажа Махьмад иштта кхы а.
Тахан вайна юкъе хоз гIалгIай мотт къе ба яха дош. Из бакъдац. Дунен тIа тахан эргаш долча метташца: энглой, йертий, эрсий франкий – яхье бала таро йолаш ба вай гIалгIай мотт. Цхьабакъда, чIоагIа эшабаьб из йоазо во хиларои, ишколера дешар гIалгIай метта ца хиларои.
ХIанзарча графико гIалгIай мотт «кIалтIабоах», кхыча къаман болча наха санна бувц гIалгIай бераша ишколе гIалгIай мотт, гIалгIай йоазув дешача хана.
ЛарттIа йоазув хиннад ший хана Кураза Зоврбика латински ларда тIа кхеллар. Ши-кхо шу далале къамах дIалетад из, шоай лаьрхIа тIа а ийцад. Тахан а моллагIа гIалгIа, латински алапаш ховш вар, сиха дIаIомалу из деша.
Вайна дукха дешаш дицлуш латт. Мотт бувцача хана эрсий дешаш юкъе кхувс, доагIача а ца доагIача а.
Хало эттача, хатар тIаденача оарцдоаккхаш хиннад. Оарц эшача хьала тIа эттад гIалгIай метта гIулакх. Кхувш доагIача бераша мотт Iомабергболаш, хьал оттаде деза. Деша сакъердаме, сибата хоза долаш шортта берий книжкаш арахеца деза, маьха деза а доацаш. Уж книжкаш «дакъа» хьехараш деш хила дезац. Берий оамалашца, нигаташца товш хила беза цар чулоацам.
Къаьстта лоархIаме хургдар гIалгIай меттал мультикаш арахецар.
Вай къаман телевидене цхьа берий канал хила езар аллха гIалгIай метал: мультикаш, фаьлгаш, иллеш, кхыдола сакъердаме хIамаш.
Со чIоагIа гIадвахав «Сердало» юха а шорттига гIалгIай ювргIа шийна хьатIаоза доладенна.
Дала беркате болба из болх!

Коазой Аюпа Iийса, йоазонхо

№ 68-69 (12004-005), шинара, 8 май, 2018 шу, вторник, 8 мая 2018 года

Добавить комментарий

Ваш e-mail не будет опубликован. Обязательные поля помечены *