Халкъашта юкъе машар бар

Чакхъяьнний «Таргим – 2018» яхача къонбарий форума регистраци. Цох бола хоам бу, ГIалгIайчен къоначар гIулакхех йолча комитета викалаша. Форума регистраци яра гIулакх дIадихьад «Молодежь России» яхача сайта тIа АИС ражах. Цудухьа укх дунен тIарча моллагIча сага аьттув хиннаб «Таргим — 2018» яхача форуме дакъалаца регистраци е.
— ХIанз укх сахьате белгалбаьнна форуме дакъалаца чам болаш дукха кагирхой ба. Царех 20 совгIа йолча Россе доазол арахьарча паччахьалкхенашкара 30 совгIа кхыча къамах бола доакъашхой ба. Форуме дакъалаца чам болаш хоам хьабайтачарна юкъе хоржам баьлча царга хоам дIабергба оаха. ХIаьта, моллагIа дакъалоацаш вола саг ший цхьа проект а йолаш, ший мехка, халкъа пайда бе уйла а йолаш хила веза. Цунга хьежжа бу оаха шоаех хоамаш хьадахкийтача кагирхошта юкъе хоржам, — аьнна белгалдир форума хьалххочо Ведажанаькъан Зоврбика.
Укх форума доакъашхой аьттув хургба халкъашта юкъе бартбарах долча даькъе къахьега а, кхувш боагIача кагийча наха шоай вахара наькъ тIа эздех бола никъ харжа а.
— «Таргим — 2018» форума доакъашхошта кийчъя массехк майда я тайп-тайпара хаттараш доашхаргдолаш. Уж я: «Патриотическое воспитание»; «Межнациональные отношения»; «Добровольчество»; «Грантовая система Федерального агентства по делам молодежи». Укхаза аьттув хургба кагирхой шоай говзал гучаяккха а, шоаш дикагIа бовзийта а, тайп-тайпарча къамах бола нах бовза а, — йоах дIахо Зоврбика.
Форума доакъашхой аьттув хургба ГIалгIайчен Мехкдаьца Евкуранаькъан Юнус-Бекаца къамаьл де а цунца дагабовла а. Доакъашхошка моаршал хоатташ а царна дунен вахара наькъа хьалаш белаглдеш а хургва Мехкда. Иштта хьаьшашта кийчдаь экскурсе даькъе а, культура даькъе а вIашагIкхетараш хургда.
Ала деза, VI Халкъаштаюкъера «Таргим — 2018» яха форум дIахьош хургья лоамарча «Арамхи» яхача салоIама цIагIа.

Матенаькъан Илез

№ 68-69 (12004-005), шинара, 8 май, 2018 шу, вторник, 8 мая 2018 года

Добавить комментарий

Ваш e-mail не будет опубликован. Обязательные поля помечены *