ДогIах веддар кхуркхолга кIала ийккхав

Йоккхача шахьарера се цIа ма венге а, Магасе квартира а лаьца, цига ваха ма хайнаварий со, Ростове юхавахалца Iе дага волаш. Дукхача шерашкахьа се хьийгача Наьсарен шахьарах а, гаргарча нахах а бIаргтоха лаьрхIа араваьнна, айса керда йоалаяьча иномаркаца со водаш, Наьсарерча боккхача наькъ тIа боаллача кIоаг чу Iочу а кхийтта, машена чарх хецаенна, цох цатовр а хинна, массадолчох дог ийккха чувахавар со, гаргарча наьхацига ваха ди доацаш.

Массахана со лелавеш машен лоалаш сай саг а волаш лийнача сона мича хов лерттIа чарх хувца а, е цига де дезар фуд а. ХIаьта а са ираза Дала ши зIамига саг а нийсваь цар дIахийцар сона из чарх. Уж хиннабецаре сона хац айса фу дергдар. Дика ба вай кагий нах, Дала дукха боахаболба уж.
Машена чарх дIахийцачул тIехьагIа машено дIа ма оза Магасе хьалчу а ваха со квартира цIагIа дIачуваьлча, хет сога цен-нанас Мисалмата:
— ЧувоагIа хьо, вахача никъ мишта хилар хьа?
— Никъ ях Iа? Чехка лимон чутассе чай доттал Iа сона, цу тIехьа даар а Iооттаде, меца ва со, тоха са доацаш! – ях аз сесага хаттара раьза воацаш.
— ИппIали, гаргарча наха хIама даийтадеций хьога? Со-м хьо цар чIоагIа вузаваь хургва яхаш ма яр, — йоах сога сесага.
— Из дитал хIанз. Хьадотта Iа чай. Бераш мичад? – хаьттар аз.
— Уж-м цига коа лоалахарча цIеношкарча берашца ловзаш да.
— Долче, дика да.
Из къамаьл аз деча юкъа дера сона Мисалмата чай. Массаза чай кийча хул цун, ма мотталаш хIанз со из могае воал.
— Мишта хет хьона укхаза мехка цIаена? – хаьттар аз сесагага.
Из а аьнна, чай молаш вагIаш, дукха уйлаш яхкар са керта чу. ХIаьта Мисалмат-м дукха хIамаш дувцаш яр. Хьалхаръяр эшаеш яр са керта чу йоагIа хIара керда уйла. Цар вIалла кхета а дайтацар сога сесаго дувцар. Геттара дукха дагалоацамо хихкача уйлаех цаI массарел котъяьлар са – Ростове юхавахарах йола уйла.
— Кхоана Юхадаха деза вай, Iуйранна 06:00 сахьат даьлча кийча хилалаш дерригаш а, — ях аз, тхьовра аз деннача хаттара дохьал жоп луш къамаьл а деш, пхьегIаш юлаш йоаллача Мисалматага.
— Ай ши ди мара мича да вай цIадаьхка, кхоана пIаьраска а ма дий, салоIа денош дIадаллалца мукъагIа Iергдар вай укхаза. Со-м сай нана йолча а хиннаяц. Сайранна хьатIехьайоагIаш йиша а я сона, цунца гIоргда аьннадар оаха нани йолча, — кадар сесаг.
— Нана йолча. Мегаргда хIаьта, гIо. Ломма гIоргда вай Ростове.
— Кхоана пIаьраска а ма дий, хоза хьай рузба а дергда Iа.
— Даьра да а-м да. Хьона фу хана йоагIа йиша тIехьа?
— Сайранна малхбуза ламаз дича йоагIаргья ше аьннад-кх цо.
— Диканд, бераш а хьайца дIадигалахь. Аз кIезига салоIаргда. Насапхан хьаеча, нагахьа цо со дIа ца вехе, гIотта ма велахь, — са уст-йиша я из Насапхан.
Ай мичара, Iергьярий Наси со дIа ца вехаш, сох бIарг ца тохаш? Сона вIалла дага ца хиннача тайпара ена чуийккха, геттара мархIаетталуш хьийзар из. Дукха ха а ма ярий тхо тхоайла бIарга ца гу.
— Ий, Даьллахьа хьажал, мишта хувцабеннаб шаккха а.
— Хувца-м хьо а еннай Наси, — йоах цунга Мисалмата.
Кхы дукха ца говш, уж бахар шоай нана йолча, хIаьта со цхьаннахьа новкъосташца вагIа лаьрхIа араваьлар. Со цIавоагIа аьнна, Магасе геттара хамам яхача бане кийчо а яь хьежаш бар уж сога. Дика тIаийцар цар со. Дика хилар сона цу буса из баня. Бакъда, цига ваха дегI тоIадаь хиларах, хьа ца гIотталуш Iуйра ламаза ха яхийтар аз.
Даггара еттача телефоно сомаваьккхар со. Мисалмат яр из, фетталх диадий Iа, яхаш хетташ. Пенах даьллача сахьата тIа 11:35 даьннадар. Рузбане ваха ха мара яцар йисар. Ара лаьгIо делхаш бIаьстан догIа а дар.
Ха яхаяле а чехка сай Iуйра ламаз а даь, кийчвенна маьждиге вахар со рузба де. Маьждиге со дIакхаьчача, адам дукха дар. Даьла цIа зIамига хиларах, чухьанахьа дIачубаха моттиг а йоацаш, арахьа латтар Даьла лаьш.
— Вохалургвац хьо, — аьлар сога цхьанне, со дIачувала велча.
— Айя, укх догIах дошадерг ма дий вай! — аьлар аз цецваьннача оазаца.
— Фу дергда вай, Даьла декхар дIадала деза, кхы да-м дац укх шахьаре ер мара маьждиг, — йоах къонахчо. Гуш дар из а догIах латта раьза воацилга.
— Со Назране вода хIаьта, — аьнна вахар со, Наьсарен маьждиге. ХIаьта цига со дIатIакхаьчача хIетта рузба дIа а дийхка, чухьанахьа кхы дIачувала моттиг а йоацаш ара латтар нах. Чехка сай нигат а даь, дIахоттавелар со, Даьла параз дIадала лаьрхIа догIага дIа а айтта мугIарех латтача нахах.
Тхо латтош, тхьовра лаьгIо делхаш хиннача дарзах догIа хилар. ХIаьта со лаьттача метте тхов тIара чудоагIача догIах Iайна хий деррига а сона IотIадера. Да ма хьакхарг вIалла дагалоацам а боацаш тхов кхоачалуча, кхуркхолга кIала нийсвенна хиннавар со а. Магасерча догIах ведда Наьсарен кхуркхогла кIала ийккхар-те со.
ЭгIаз чIоагIа вахар со сесага, Ростове юхавахарах цо се селхан юхатохара. Сона хац из рузба сай къоабала хургдий. Веррига тIарш бар со, ламаз даь ваьннача хана. Се ма водда машен йолчахьа ведар со. Харцахьа-бакъахьа башха доацаш машенаш Iоувттаяь беррига никъ дIакъайлача санна бар. ФуннагIа дирах аравоалавеланзар со цигара дукхагIйола машенаш хьалхашкара дIайовлалца. «Ераш ба-кх, эзделах биза гIалгIай» — аьнна дагадессар сона. Ба а ба эзди шоай машен мишта Iооттае еза цаховш, беций?
Цигара со чуваха дукха ха ялале чубаьхкар Мисалматар а. Кхоана шоатта дийнахьа юхаваха уйла а йолаш вагIача сога йоах сесага, сай дош аз дIа а алалехьа.
— Рузба Дала къоабала долда хьа. Са даь-веший Iумара виIий саг йоагIалга хьахайтад вайга, цига даханза даргдац вай. Со-м лертIа тIадувха барзкъа эцадезаш я.
Къоабала хургдий дац ца хов рузба, цунна эгIазваха со… ХIаьта хIанз юкъе гIолла укхо сога дувцар. Се догIо вошаваьлгах хIама аланзар аз Сесагага. Газет цо хIета а дешаргдац, гIалгIай метта дукха сагота мича я из. Е со дукха сагота а вац цунна из хайнадар аьнна. Цудухьа язду аз ер деррига а.
Сесага а берашта а товр дар духьа, саг йоагIача а хилар тхо даха. Цигара цIавоагIаш машен а лозайир са наха хьатIатеха. Хетаргахьа кIира кхы деза из тоае. Сона хац фу дича бакъахьа да. ХIанз ишта кхесташ ва-кх со мичахьа ийккхача бакъахьа ва ца ховш.
ЦаI да со хьагаш, наькъаш-м вай кIоагаш доахкаш дар аьнна сатохаргдар аз, маьждигашка мукъагIа, тIа кхоале а йолаш лерттIа дIаотта моттигаш хинна.
Темаркъа

№ 72 (12008), шинара, 15 май, 2018 шу, вторник, 15 мая 2018 года

Добавить комментарий

Ваш e-mail не будет опубликован. Обязательные поля помечены *