Мархий беттага кийчалуш я ГIалгIайче

ГIалгIайчен Мехкдас Евкуранаькъан Баматгире Юнус-Бека тIадиллар камаьрша мархий бутт Рамадан болалуш сурсата моллагIдолча дуача хIаман маьхаш лакха хургдоацаш ярмаркаш а е, федераральни наькъаца ламазаш де моттигаш а кийчъе, меценаташ юкъеозарца наха гIодарах дола ногIалаш а дIакхахьа мархий бутт чакхбаллалца йолча хана аьнна.

Укх 2018 шера мархий бутт дIахьоргба май бетта 17 денгара июнь бетта 16 денга кхаччалца долча деношка. Шерадаь дIадихьача Правительства вIашагIкхетаре вице-премьер йолча Гойганаькъан Мадинас яхачох, ГIалгIайчен Правительствос чIоагIа а яь тIаийцай мархий бетта дIахьоргдолча вIашагIкхетарех йола план. Мехкарча маьждигашка а, мехка аравоалача-чувоалача латтача посташка а нахага марха дастийта хурмаш, хий Iалашдергдолаш да. Цул совгIа, мехка массайолча шахьарашка а районашка а «Рамадана чатар» яха ногIалаш дIакхохьаргдолаш да мархий бутт чакхбаллалца. Цу тайпара цхьа доккха ногIал, хьалха оаха ма яздара дIахьоргдолаш да Москве а. «Къасьтта теркам бергболаш ба бусалба динца из мишта хила деза белгалдеш телепередачаш кийчъерца а, юрташкара мотигаш цIенаерца а», — аьлар Гойганаькъан Мадинас.
Иштта вице-премьера хоам бир, мархий бетта хина, газа, тока даькъе дола шоай хаттараш мехка бахархой тIадахьа аьттув хургболаш Правительстве оперативни штаб вIашагIъеллай аьнна. «Хоам цхьалхабоаккхаш хургба деннеи-бусеи сеца юкъ йоацаш. Оперативни штаба болх дIахьош хургба май бетта 15 денгара июнь бетта 17 денга кхаччалца», — аьнна тIатехар вице-премьера.
Мархий бетта кийча хиларах дола къамаьл дIахохьош ГIалгIайчен Мехкдас белгалдир меценаташ дакъакхувларца наха гIо-новкъостал хургдола ногIалаш дIакхахьа деза мархий бутт чакхбаллалца йолча хана аьнна. Цо яхачох, хIара бусалба сага декхар да, вахаре халонаш нийсъенна воаллача сага могача тайпара гIо дар.
Тайп-тайпарча муниципальни кхоллара викалашта хьалхашка декхараш овттадир Мехкдас къе, миска боахкача, гIо эшача наьха спискаш а овттае, цул совгIа, ГIалгIай Мехка Минсельхоза тайп-тайпара ярмашкаш йирца, дуача хIаман маьхаш лакха хургдоацаш болх дIа а хьо сийдолча мархий бетта аьнна.
Гойганаькъан Мадинас аьлар, цу даькъе эшашбола нах юкъебоалабирца, бокъо йоацаш маьхаш айдеш болча нахаца къахьега а из гIулакх метталоаттаде а лаьрххIа балха тоаба вIашагIйоллаш я аьнна. «Керттера тоабан декхар да базарашка а тикашка а дуача хIаман маьхаш тахкар, из г1улакх дIанийсдар», — аьлар вице-премьера.
Баматгире Юнус-Бека белгалдир мархий бутт дин тIехьа чIоагIвалара а дика хIамаш хьадара а лоархIаме ха я аьнна. Цул совгIа Мехкдас аьлар, мархий бетта цхьаккха тайпара корта бохабу малараш хилийта йиш яц аьнна. Иштта цо тIадиллар «Кавказ» яхача федеральни наькъаца ламазаш де моттигаш Iалашъе аьнна. Из доацаш Евкуранаькъан Юнус-Бека Юртбоахама министерствона тIадиллар федеральни наькъаца мел долча маьждигашка наькъа болхаш боагIаш болча наха марха даста кхоачам Iалаш бе аьнна.
Мархий бутт хьатIакхача массехк ди мара дисадац. Вай могаш маьрша долаш хьатIа а бена, иштта къиноех цIенденна долаш дIагIолба камаьрша мархий бутт.

Матенаькъан Илез

№ 72 (12008), шинара, 15 май, 2018 шу, вторник, 15 мая 2018 года

Добавить комментарий

Ваш e-mail не будет опубликован. Обязательные поля помечены *