САГIА А IОТIАКХИЙТТАД ХЬА ЦУННА?

(САКЪЕРДАМЕ ДУВЦАРАШ)

Цхьа Iаьхар а бийна мовлат деша аьнна вийха хиннав Цаген цхьан къеча саго. Из мовлат деша а волавалалехьа, бехказа а ваьнна, цIендас аьннад:
— Даьра, Цаген, хьона бакъдар дийцача, гIурбан дакъан юкъе даханза а ма диссад тхо укх шера. ГIурбанна лархIа мегаргбарий-те ер Iаьхар?
— ХIана мегаргбац, мегаргба, даьра! — аьннад Цагена.
— Даьллахь, Цаген, тха зIамагIвола кIаьнк а ма вар хIанз а тIехьа хIаккъат динза. Из а дIалархIа мегаргдарий-хьогI укхох? — тIатехад цIендас.
— Мегаргда. Мегаргда, — аьнна, дIавеннача Цагена сихха мовлат дийша даьккхад.
ХIаьта цигара ваьнна шоай цIагIа чувоаллашехьа цо ший сесагага хаьттад:
— Яа-мала хIама йий вайцига?
— Аьъ, мовлат дийшачара вагIаций хьо? — хаьттад цох цецъяьннача сесага.
— Даьра, воагIа, — аьннад Цагена, — хьона лойя, мовлати, гIурбаи, хIаккъати — кхоъ даьчара-м, Цхьабакъда, меца-м виссав.
ХIаьта иштта дIадоладенна уж дешаш наха хезад, тIаккха фусам-даьга а кхаьчад. Цох эгIазвахача фусам-дас цхьан дийнахьа аьннад Цагенага:
— Даьллахьий, Цаген, аз-м сагIийна лаьрхIа ма бийнабар из устагIа. Ма гаьна даьккхад Iа из хабар.
Даьллахь, воше. хIанз кхы а сагIа а IотIакхийттар хьа цунна? — яьхад Цагена, — Иштта а дар уж мовлати, гIурбеи, хьаккъати!

Са фу дайнад укхан бажа ца хилча?

Цхьан юртара ши саг — МаIаси РаIаси – вIаший качбахаб. ДIа-хьа ца оалаш хIама дисадац, тIехбеттамаш даьд, даьна а ворхIе даьна а биллаб.
Нах тIабайддаб царна, уж дIа-хьа къоастабе гIерташ.
— Аз фу дергда, ер тIехьашка воалаш ца хилча, багара а яьккха чугIерташ хилча? — яьхад МаIаса.
— Аз фу дергда, ер къарлуш ца хилча? — яьхад РаIаса.
— Ай, фу йоах укхо? — хаьттад наха.
— Ший устйиша маьре дIайига йоах укхо сога,- аьннад РаIасас.
— Ай, дIайига тIаккха, ва вийста валарг! — аьнна, тIачайхаб нах. – Сесаг а хургья хьа, хIанз етташ-Iетташ хьувза а везаргвац хьа.
— ДIа-м югарг ма ярий аз из, нагахьа санна тIехьагIа укханца гаргало лелае езаш ца хилча, — аьннад МаIасас. — Са фу дайнад укхан бажа ца хилча?

№ 74-75 (12010-011), шоатта, 19 май, 2018 шу, суббота, 19 мая 2018 года

Добавить комментарий

Ваш e-mail не будет опубликован. Обязательные поля помечены *