Дошо совдоалаш да

Цхьаькха дика кхаъ хилар Россе паччахьалкхен вай мехкахо Европе дIайихьача яхьарашка хьалхаваларца.

Май бетта 17-20 деношка Македоне дIайихьача Европа жалтий-рима латарах йолча хьалхалешка хьалхаваларца котало яьккхай вай мехкахочо Йовлой Мухьаммада. «»Ади-Ахмад» яхача клуба кхевархочо шек дIавоацаш, эзди лата, шийх тийша волаш, дика чакхваларца хьаяьккхар шийна йоагIа дошо медаль, цу лакха боарам болча яхьарашка.
ГIалгIай мехкара ваха вай низъоамалхо латаш хилар 92 кийлага кхаччалца долча дозала даькъе. Пхезза тоссаваларгахьа шек дIавоацаш котваьлар из, шийна дохьал латаш хинначул гаьнна тIехволаш. Хьалхарча биъ бIала Мухьаммад тоссавалар Грецери, Венгрери, Эстонери, Литвере баьхкача викалашца. Уж веъэ низъоамалхо эшаваьчул тIехьагIа юххера финале дIачуваьлар вай мехкара низъоамалхо.
Турцера вена низъоамалхо дохьалваьлар вай мехкахочоа финале. Йовлой Мухьаммада из эша а вир 9:2 счет йолаш. Белаглде деза, классически латара даькъе гIалгIаех цу тайпара лакха моттиг йоаккхаш Мухьаммад хьалхара волга. Цу даькъе вай мехкахошта юкъе эггара хьалха айлам тIа баьннарех ва из.
«Цу тайпара боарам болча яхьарашка дакъалацар боккха бехктокхам болаш хIама да. Латар, чIоагIа дохьал оттавезаш дар, хIана аьлча, котвала уйла йолаш дар оаха оттадаьр, из котало тхога хьа а кхаьчар. Цу тайпарча турнире тIехьарча хана вай дукха хьийжа «дошо» да из. Из котало бахьан долаш, Мухьаммадага кхаьчар, укх шера сентябрь бетта Аргентине дIахьоргдолча къоначарна юкъе хургдолча Олимпийски латарашка дакъалаца йиш йолаш тешал тIа дола лицензе каьхат. ХIанз, дIахо тIатеIIа тренировка а еш кийчлуш хургда тхо Олимпиаде дакъалаца. Тхоай га доаккхаш тхоайх дог лазаш мел хиннарашта баркал ала лов сона. Цул совгIа аз баркал ях, тренерский штаба – Калиматанаькъан Гиланена, Iарапханаькъан Iалихана, иштта Гогитидзе Нугзара», — аьнна белгалдир вай котвалархочун тренер волча, ГIалгIайчен жалтий-рима латара даькъе керттера тренер волча Белхарой Руслана.
Белгалде деза къонабарашта юкъе вай мехкара низъоамалхо Йовлой Мухьаммад Европа шолха котвалархо хилар. Цул совгIа тIех латар гойтачарех хьалха ва из.
ДIахо йодача хана а иштта хьинаре къахьегаш, ший дагалаттача толама тIакхе Дала аьттув боаккхалба цун.

МАТЕНАЬКЪАН Илез

№ 76 (120112), шинара, 22 май, 2018 шу, вторник, 22 мая 2018 года

Добавить комментарий

Ваш e-mail не будет опубликован. Обязательные поля помечены *