ГIалгIайчен цIай дола ди

Хетаргахьа саг хургвац ше ваь хьалкхийна моттиг дукха ца езаш, цун хамца беш, цун мах ца ховш. ХIанзчул 26 шу хьалха 1992 шера меттаоттаяьй ГIалгIай мехка бокъо. ГIалгIайче, аьнна, къаьстта ший цIи а йолаш, гIалгIай республика хьакхеллай. Цу хана денз хIара шера июнь бетта 4 дийнахьа тайп-тайпара вIашагIкхетараш дIакхохьаш из ди дездеш доккха цIай хул мехка. Укх шера из цIай нийсденнад оршот дийнахьа.

Укх шера цу цIайна хетадаь доккха вIашагIкхетар да вай мехка кийчдаь — «Мехка марха дастар». Мехка бахархоша, доккха цIай долаш, той а дий, дукха тайпара вIашагIкхетараш дIакхухьаш хилар да шоай мохк хьакхелла ди дукха дезаш, из диц ца деш мехка бахархой хилар. Цу юкъе, духхьала гIалгIай къамах бола нах хинна а ца Iеш, кхыча къамах бола дукха нах а ба.
26 шу яхар кIизига ха яц, еце а чехка йода ха дIа. Цу юкъа дезалхо хьал а кхийна, цун дезал хьаболалу ха я из. Цу белгала долча 26 шерал хьалха ший мехка бокъо хиннаеце а, тахан къаьста ший паччахьалкхе а йолаш, ший конституци а йолаш мохк ба ГIалгIайче. Цох мехка, укхаза дахаш долча халкъа боккха пайда баьннаб. Дукха хIама хувцаденнад вай мехка цу йIаьха йоацача юкъа: адам дийбад, юрташ, шахьараш совъяьннай, мохк денна тоалуш дегIабенаб.
ГIалгIай республика хьакхоллалехь, тахан санна а доацаш, хала хиннад наьха вахара хьал, баха-бахка, лела аьттув хиннабац хIанз санна. Вешта кхыча мехкашка а хиннад ала йиш йолаш да цу заман цу тайпара гIулакх, амма вай мехка гIулакх халагIа хиннад ший бокъо а йолаш къаьстта мохк хинна ца хиларах. ЛохагIа, шаьрача бахача наьхачул шолха хIана дац ала халагIа хиннад къаьстта лоам бахача наьха хьал. Цига бахача наха шоаш хьадаьр мара, арахьара хIама хьатIада дукха аьттув хиннабац. Бакъда тахан вай лоаме дерригача дунен тIа цIи дIа а хеза, геттара хоза тоалуш йоагIа моттиг а хинна дIаэттай. Дерригача дунен дIаяйзай ГIалгIайче, цун хоза шахьараш, эзди къам.
Укх 26 шера вай мехка хинна хувцамаш дувца велча, уж дукха да, дийца, дагардаь варгвоацаш, вIалла деце, керда юрташ, шахьараш ехкай мехка Iо. Воашка тахан долчох кхоачам беш, дар лорадеш, доацар, эшар хьаде ховш даха хьажа деза вай. Тахан дар вай лора ца дой, кхоана дехке довргда вай. Цудухьа ма хулла къа а хьегаш мохк тоа а беш даха деза вай. ХIаьта сай оагIорахьа ловца боаккхаргба аз ГIалгIайчен.
Ираз долаш, хьаьнала тIехье кхуйла хьа, са ГIалгIайче! Эхь, эздел, оккхагIий сийдар, зIамагIех къахетар дIа ма далда вайна юкъера.
Маьрша яхийла ГIалгIайче!

Матенаькъан Илез

№ 84-86 (12020-022), шинара, 5 июнь, 2018 шу. Вторник, 5 июня 2018 года

Добавить комментарий

Ваш e-mail не будет опубликован. Обязательные поля помечены *