Лермонтов – гIалгIай меттала

Укх шера 95 шу дуз, сийлахь-воккхача эрсий поэта М. Ю. Лермонтова байташ эггара хьалха гIалгIай меттала йийкача денз. 1923 шера уж наьна меттала яьха хиннай вай йоазув кхелла волча Мальсагов Кураза Зоврбика. «Морхаш», «Чхар», «Кхо пальма» яха кхо байт хиннай цо таржам даьраш. ДIахо дIайодача хана цун йоазош гIалгIай меттала доахаш къахьийгарех ба вай къаман эггара дикагIбола поэташ. Масала, Озиев Илеза Ахьмада таржам даь хиннад «Фон кема» яхача цун стхотворенена. Из таржам тахан дикагIчарех цаI санна лоархIаш да. «Мцыри» яхача поэма цхьа дакъа гIалгIай меттала даьккха хиннад Мальсагов Дошлакъас, Б. Зязиковс «Вай заман турпал» яхача романа таржам даь хиннад.

Цхьаькха а лоархIаме моттиг я укх шера Лермонтова цIерца а цун кхолламца а ювзаенна. Нийса 55 шу хьалха Нохч-ГIалгIай книжни издательстве кепа техай эрсий поэта стихотворенеши поэмаши тIайолча книжканна. 1963 шера арадаьнна из деррига гIалгIай меттала хиннад. Цунна юкъедахад дик-дикагIдола таржамаш. Царех яр «Купчечох Калашниковх дола илли» яха поэма, цунна таржам даьр хиннав Муталиев Хьажбикар, «Веддар» яха поэма, из таржам Ведзижев Ахьмада даь хиннад. Иштта цу гуллама юкъе дар С. Озиевс, Ж. Яндиевс, Т. Арчаковс, кхычар гIалгIай меттала даьха цIаккха сийле йовргйоаца йоазош. Къаьстта а сона дег чу дийшад Яндиев Жамалдас даьча цхьан таржама мугIараш. Лермонтовс ше яздаьрел дикагIа ца деке, кхы вогI декац уж вай меттала а. Лермонтовс яздаьд:

«И скучно и грустно,
и некому руку подать,
В минуту душевной невзгоды.
Желанья!.. что пользы напрасно
и вечно желать?..
А годы проходят — всё лучшие годы.»

Жамалдас цу мугIарашта даь таржам иштта да:

«Сагота я, сахьувз,
дег тIа бала беча,
Кулг дала саг а вац воалаш.
Безам! Фу пайда ба безам хилча?..
Шераш дIаух — дикагIдола шераш».

Из книжка, сона ховчох, юха а арадаккха кийчдеш дар моттигерча издательстве гIолла. Хьалха арадаьннар халла мара корадагIац библиотекашка хьежача а. Цудухьа гайна-ганза из юха а арахецарга сатувсаргда вай, из накъадаргда хьехархошта, студенташта, критикашта, Iилманхошта.

№ 87 (12023), ера, 7 июнь, 2018 шу. Четверг, 7 июня 2018 года

Добавить комментарий

Ваш e-mail не будет опубликован. Обязательные поля помечены *