Халкъа дезаденна мукъамаш

Са ийс-итт шу даьнна хила мегар цу хана. ХIара кIирандийнахьа Наьсарени Аьлтий-Юртаи юкъера доазув долча метте йоккха базар хулар, хьалкхесса кий Iожаргйоацаш сов дукха адам гуллуш. ХIанз вай «Малсагнаькъан базар» оал цох. Цига каст-каста водаш оамал яр са а. ХIама ца эце а, тамашийна нах, машенаш, тайп-тайпара тикаш, cовдегархой, базархой, уж лувцаш, удабеш бола милиционераш бIаргаго йиш яр укхаза. Наьсаренгахьара базар тIа чуводаш, готта коанаIараш яр, дукха нах гулбелча, царех чакхвала хала хулар, бокъонца дIачакхваьнна, хьай барзкъаш тIа IотIахьежача, догIа делхаш ха яле, хотташа диза хулар, екъа яле, демаша даьха хулар уж. Когаш тIабийтте бIехвора цу юкъе нийсвенна саг. Цхьан кIирандийнахьа юха а из никъ бихьар аз. Шийло, кхаьла дена ди дар из. IотIаелхаш хIама еце а, безаме яцар ара. Базара наIарашта со дIатIакхача дукха юкъ йисаяцар, цу хана цар аьрда оагIорахьарча саьн тIа гулбенна латта дукха нах байра сона. Цу тайпара хIама эггара хьалха гора укхаза. Фуд ха сакъердалуш вола со а тIавахар гулбенна латтарашта. МагIахьара царна IотIавийрза, дахчан пандар локхаш латтар къоаналгахьа леста саг. Цунна юххе латтар, хетаргахьа, са ханнара хила тарлуш вола кIаьнк. ХьатIавенача цхьанне хаьттар:
-Малав ер?
Цунна юхе нийсвенначо шорта жоп делар:
-Цицкиев Идрис.
Уж ши дош хезача, кхы хаттар хилацар цхьанне а. Идрис дика вовзаш вар берригача гIалгIашта.
Цицкиев Боскара Идрис ваь хиннав 1918 шера. Укх шера нийсса 100 шу дуз гIорваьнна хиннача пандарчан а иллиалархочун а. Вича денз бIаргса доацаш хиннав из, цудухьа цунна уллув лаьтта кIаьнк Идрис лелавеш, дIа-юха ваха цунна гIо деш вар. Сона а вайзар пандарча, хIана аьлча тха цIагIа йоаллар зIамига радио. ГIалгIаша «пхи сом доаккха радио» оалар цох. Цу чугIолла хIара дийнахьа, сайрангахьа лестача, вайнаьха ашарий концерт хулар, цунна юкъе а наха дукха дезаш хиннараш дар Идриса иллеши ашараши. Сона дагадоагIа, къаьна воккха саг хинна сай даь-да мишта вагIаш хулар цунга ладувгIаш, цу хана цун юхь тIа велавалар оттар. Идрисацара безам бар цун юхь тIара сона гуш хиннар.
ТIехьагIо тхона ийцар пластинкаш лакха а йиш йола «БIаьсти» яха радиола. ТIаккха Цицкиевс дIаоала иллеш тIадола пластинкаш а гучаяьлар. Оаха каст-каста ладувгIар дукха истий болча сагах даьккхача иллега, хоза хетар Андаркъе Iаьлах дола илли, Осмиев Хьамзата стихотворене кIийлен тIа хьахинна «Москва» яха а кхыдола а иллеш.
ХIана латтар Идрис базар тIа иллеш доахаш? Цу хьакъехьа ший хана сона дийцадар РCФСР заслуженни артист хиннача, Цицкиевца цхьана болх баьча Хамхоев Элмарзий Ахьмада. Цо яьхачох, радио солист волаш балха дIаийцача а, наха юкъе араваьнна, иллеш ца даьхача салоIам хулаш хиннавац пандарча. Хетаргахьа, Идриса дика ховш хиннад мел дукха деза халкъанна ше доахача иллей мукъамаш.

С. Арчаков.

№ 93-94 (12029-030), шоатта, 23 июнь, 2018 шу. Суббота, 23 июня 2018 года

Добавить комментарий

Ваш e-mail не будет опубликован. Обязательные поля помечены *