Шоай са Iодиллар цар

ХIанзчул 14 шу хьалха дар из. Массаза санна хьа а гIетта Iуйранна со араваьлча бIаргкхийттар са цхьаццанахьа гобоахаш лелача вертолетех. Доахан дIа а лаьхка чубоагIача исташа дувцаш дар, «…ГIалгIайчен моастагIа тIалетав» яхаш. Чехка телевизор хьал а сага хьажача «Evronews» яхача каналах хьахьокхаш хиннар доккха туржаI дар.

Июнь бетта 22 ди эггара IаьржагIа а баьдегIа а, унзарагIа а долча деноех да Россе паччахьалкхен. Дукхача бехк боацача наьха вахар дIадихьа Сийлахь боккха тIом хьайна ди да из. ХIаьта гIалгIашта, шолха халагIа я, бехк боацача наьха синош дIадихьа, дукхаш миска дезалаш белхабаь из таьзет дахьаш дена ди, 2004 шера июнь бетта 22 дийнахьа моастагIа тIалатарца.
Цу дийнахьа 200 совгIа бола гIаьрахой тIакхийттабар ГIалгIайчен. Шоашта хьаьнала бахаш болча дезалашта, бехк боацача наха, шоашта напагIа даккха, шоай мохк лорабе уйла йолаш лаьттараш иштта кхы а нах боабир цу унзарча зуламах. Цу довнах бехк боацаш 100 гаргга саг велар, уж боацаш 114 сог кхы хала даьра човнаш яь лозавир. Царех дукхагIчарех заIапхой хиннаб.
Июнь бетта 22 ди. Цу дийнахьа байна нах дагабоахаш а, царна тIера сагIа доаккхаш, уж Даьлагара бехаш таьзета ди да ГIалгIайче гIолла. ХIара шера цу гIулакха хетаяь митинг Наьсарен дагалоацамаи, сийлени Мемориале дIакхохь. Укх шера а иштта митинг дIайихьар мехка бахархоша шоай байна нах дагабохаш, уж Даьлагара бехаш.
Июнь бетта 22 дийнахьа хиннача митинге баьхка мехка бахархошца дакъалоацаш бар ГIалгIайчен Мехкда Евкуранаькъан Баматгире Юнус-Бек, Наьсарен шахьара да ТIумгIой Iалихан, бусалба Iилма дийша нах, тIема ветеранаш, юкъара болх лелабераш иштта из ди дагадоагIаш цига байначарна маьл дIалушбараш.
Митинга ногIал чакхдаьлча цига а кхы хьалхагIа а шоай мохк бахьан долаш моастагIчоа дохьал латташ байначарна тIера, уж Даьлагара бехаш дуIаш а даь дIа-хьа къаьстар нах. Байнарех Дала къахетам болба, Дала гешт долда царна. Лозабаьчарна Дала моаршал лулда, хIаьта юхе бисача цIен дезалашта сабар лулда.
Цу хана дукхагIа цига байнараш кагий нах бар – керда истий кхийла а саг йоалае езаш а. Уж бар къаман кхоане хьакхее езараш, мехка хьал тоадеш къахьегачарца цхьана мугIаре латта безараш. Бакъда, царна кхы дегIа хиннадац из, цигга хадаезаш хиннай цар вахара лар. Бакъда, шоай къаман бизза къонгаш а болаш, мехка тIавенача моастагIчоа дохьал айтта байра уж.
Июнь бетта 22 дийнахьа 1941 шера а, 2004 шера а тIалетача моастагIаша даьча зулама хьаькъе мехка бахархошка кхайкам беш мехка керттерча сайта тIа язду ГIалгIайчен Мехкдас Евкуранаькъан Баматгире Юнус-Бека. Ший къамаьле Мехкдас белгалду из ди къаьстта гIалгIашта хала хилар: «ГIалгIай къаман тархьаре кIезига дац шоашта тIехьа наьха дегашка хала лар юташ дIаиха Iаьржача таьзета денош. Вайна шолха хала да из таьрахьа. Из дувзаденна да, 2004 шера июнь бетта 22 бийсанца гIаьрахой ГIалгIайчен тIалетарца. Цу буса хиннар, цIий Iодохийташ хиннача гIаьрахой ногIалех халагIчарех цаI дар, ГIалгIайчен бокъолораерах йолча органашта дохьали, маьрша бахархошта дохьали зуламхоша кийчдаь», – аьнна белгалду Мехкдас Евкуранаькъан Баматгире Юнус-Бека.
Из хала таьзета ди дагар ца доалаш ба дукха мехка бахархой, хIана аьлча, цар цIен эздий къонгаш дIабихьаб цу дено. ГIалгIашта цIаккха а дицлургдоацача Iаьржача деноех цаI да из.
Цу дийнахьа байнача наха хетадаь чурташ овттадаьд Магасе Чурча гIулакхий министерствона уллув. Цига хIара шера гул а бале цу халача хана байнараш – къаман эзди къонгаш дагабохаш вIашагIкхетараш дIакхохь Магасе. Цул совгIа, мохклорабеш байнача наьха юхе бисача дезалашта а, лозабаьчарна а цхьацца вахаре эшача хIамангахьа гIо-новкъостал деш болх бу Iаьдала викалаша.

Матенаькъан Илез

№ 93-94 (12029-030), шоатта, 23 июнь, 2018 шу. Суббота, 23 июня 2018 года

Добавить комментарий

Ваш e-mail не будет опубликован. Обязательные поля помечены *