Электроэнерги йоагаярах дола декхар дизза кхоачашде деза

ГIалгIайчен Мехкдас Евкуранаькъан Баматгире Юнус-Бека аргIанара вIашагIкхетар дIадихьар ГIалгIайчен энергикхоачамахи, топливно-энергетически комплексахи дола мехкага хьаьрча декхар дIатакхарах дола дош айдаь. Цох бола хоам язбу ГIалгIайчен керттерча хоамий сайта тIа. Цу ховшарга дакъалоацаш бар, ГIалгIайчен Правительства тхьамада Гаьгенаькъан Руслани, правительства вице-премьераши, Мехкдаь гIончий-дагбалархойи, кхоачамлоаттабеча юкъарчен кулгалхойи, иштта муниципальни образованей а юрта а дайи.
Правительства тхьамадан когаметта волча Ужаханаькъан Мухьмада гулбеннарашта хьалхашка наькъа карта (план) гойтар, укх 2018 шера хьалхарча 5 бетта наха йоаяьча токах дола декхар хьагулдара болх мишта баьб дувцаш. Цо хоам бир, наькъа картаца хьажача масса долча оагIорахьа доагIачаргара декхар хьаэцаш да, аьнна.
Цо дийцар электричествох декхар дIа ца луш гIулакх ладара латтача кхоъ юртах: ГIайрбик-Юрт (18% гулдар), Экажакъонгий-Юрт (26,3% гулдар), СурхотIе (28,4% гулдар). Иштта Ужаханаькъан Мухьмада белгалйир 100% а, кхы дукхагIа а шоай декхар дIалуш йола юрташ. Уж я: Мужече (125% гулдар), Ляжге (105% гулдар) иштта ОльгатIе
(99,9 % гулдар).
Мехкдас муниципальни образованей даьшка а юрт-даьшка а аьлар, энерги йоагайирах доагIа ахча хьа ца луча нахацара болх чIоагIбе, аьнна. Цо белгга дийцар, декхар дIаийдара юкъарченаша хьабеш бола болх юрт-даьшца дага а бувлаш цхьана бе безаш хилар. Массабараш тIабийхар Баматгире Юнус-Бека хьабеш бола болх, боаггIача тайпара ражах хьабара.

Матенаькъан Илез

№ 95 (12031), шинара, 26 июнь, 2018 шу. Вторник, 26 июня 2018 года

Добавить комментарий

Ваш e-mail не будет опубликован. Обязательные поля помечены *