Ламаза ханаш башха хилара хьаькъе

Вайна ховш ма хиллара укх деношка НТРК «ГIалгIайче» гIолла хьа а хьокхаш «халкъанцара къамаьл» яха вIашагIкхетар дIадихьар ГIалгIайчен Мехкдас Евкуранаькъан Баматгире Юнус-Бека мехка бахархошца. Ала деза, наьха хаттараш, дагадоахкаш хIамаш дукха хинналга. Дале а дукхагIа мел долча хаттарашта жоп луш чакхваьлар Мехкда. ДIахо жоп ца луш диса хаттараш дукха ца говш доашхаргдолаш да.

Кхыдола хаттараш санна хьоа ца деш, ай ца деш дисанзар бусалба динца дувзаденна хаттараш а. ГIалгIай мехка ламаза кхайкаш бола моллаш, (азан дар) тайп-тайпарча ханашкахьа хIана нийслу, зIамига мохк а ма бий ер, цхьа ха Iооттае мегаций вай мехка бахархошта ламаза, аьнна дар хаттарех цаI.
Ала деза вай мехка цхьан юрта шин-кхаь тайпара бекъабенна моллаш кхайкалга а, царех цхьаболчар мехка бахархой кегабелга а. Из дувзаденна да, ламаза ха ялар белгалдеш овттаяь ханаш шоайла хувцам болаш, эргаш хилар.
Мехкадас Евкуранаькъан Юнус-Бека хьаллаьцар вай мехка ламаза моллаш кхайкара гIулакх цхьан хана чухьа хиладезаш хилар а, из ха дIачIоагIъе езаш хилар а. «Из хаттар цкъа айдаь Iийна дац. Оаха дукха дийцад из бусалба дина хьаьке долча хаттарашкахьа волча са дагвалархочунца. Цхьан хана Бусалбай дина юкъарчено цу тайпара ха оттаяьяр, цул тIхьагIа нах башхабайна гIулакх нийсденнад цига», — аьнна белгалдир Баматгире Юнус-Бека.
Цу тайпарча къоастамаша наьха барт хилар кIалдут аьнна хеташ ва Мехкда. «Вайцига кхычахьара тIабаьхкача хьаьшашта хьалхашка а тоам ца хеташ хул, мимараш тIара 5-10 минот башхало йолаш азан хьахезача. Ишта хила йиш йолаш дац», — аьнна къоагадир Мехкдас.
Селхан тахан этта гIулакх дац из. Массехк шу да ишта башхало йолаш моллаш вай мехка кхайкаш бола. Марха кхоабача хана — цхьабараш хьалха кхайкача моллаца шоай марха а даьсте паргIатбовл, хIаьта тIехьа кхайкача моллашца мара марха доасташ боацараш, кхы а 10-15 миноташка хьежа безаш хул. Цига цхьаболчар шоайла къовсамаш дала нийслу, Iа хьалха хIана доаста марха, хIаьта Iа тIехьагIа хIана доаста, яхаш. Цхьа да оарцагIваьнна дIанийсде дезаш гIулакх да из.
Матенаькъан Илез

№ 96 (12032), ера, 28 июнь, 2018 шу. Четверг, 28 июня 2018 года

Добавить комментарий

Ваш e-mail не будет опубликован. Обязательные поля помечены *