Школан вахара никъ

Сурхо тIара ийс шера дешаш йола школа ювцаш хилча, сона дагадох гаьнара 80-гIа шераш. «Сердало» газета воккхагIвола корреспондент вола со, Hаьсарен районе командировках вайтар. Массанена ма харра, газет цу хана Шолжа-ГIалий тIа дар. Тайп-тайпарча отделаша декхараш тIадаьхкар сона, шоашта лаьрхIа цхьацца йоазонаш дахьаргдолаш. Царех цхьа декхар дар ( из сона тIадиллар керттера редактор вар), Сурхо тIа йолаяь, дIахо хьа ца еш латта берий беш малагIча хьал тIа я тахкар а, цох яздар а. Тахан мо дагадоагIа, дикка лоа дилла Iан ха яр из. Кхайке хаза саг воацаш, кирпишках хьалдетта шера пенаш а долаш, тIа тхов боацаш латтар хургйола берий беш. ЦIа а ваха, шедар долчча беса дIаяздир аз, аргIанарча номер тIа арадаьлар из йоазув. Цул тIехьагIа, берий беш хьалъяьй, болх бе йолаеннай аьнна хезар сона. Бакъда дукха ха ялале, из цIа дIаденнадар юртарча 9 шера дешача школанна. Укх шера 35 шу дуз цун. Цу хана денз (1983), къонача тIехьенна кхетам луш, из вхара новкъа йоаккхаш хьабоагIа цун хьехархой. Школа ше 110 сага лаьрхIа я, амма таханарча дийнахьа цун классашка Iилма Iомадеш да 400 совгIа бер.
Ше хьаяьча хана денз, цунна кулгал деш хиннав виъ директор: математик Аушев Ахьмад, филолог Агиев Аслан, историк Нальгиева Хадишат. Карарча хана цунна керте лат Ростоверча университете историка дешар дийша йола Хидриева Люба.
Цун хьехархошта юкъе ба республикан заслуженни хьехархой Х. Нальгиева, С. Арчаков. Россе халкъа дешара тIехдика болхло яха цIи лелаю нах: Аушева Аьсет, Аушева Марем, Хидриева Люба, Алиева Лейла, Аушева Лида, Мейриева Амина, иштта кхыбараш. Дешарах дика лоархIабеш хьабоагIа укхазара кIаьнкаши йиIигаши. Къаьстта а дукха беза берашта гIалгIай мотт. Из гуш да цар деча йоазон балхех. Масала, ерригача республике хиннача къаман меттах долча диктанта юкъе дакъа лаьцар школерча кхаь дешархочо. Царех шинне йиаш яьхар, цхьанне кхоъ яьккхар. Укх шера эказмена лаьрхIа дола диктант яздир 9-ча классе дешача 28 сага. Царех виъне пхиаш яьхар, вурийттане – йиаш, ворхIне – кхоъаш.
Дика дешара мел эша хьалаш дац укх школе, цудухьа хьехархоша сатувс спортзал, актови зал, Iилмаш Iомадеш эшаш йола лаборатореш, кабинеташ йола школа шоашта хьаярга. Дуккхаза гIеттадаьд из дош. Ергья яхаш, тохкамаш а даьд укхазарча моттигá. ХIанзарчоа гIулакх кхы дIахододаш дац. Цкъа хьатIакхача мег, укхаза тракторий мотораш декаргдола ди а.

 

№ 96 (12032), ера, 28 июнь, 2018 шу. Четверг, 28 июня 2018 года

Добавить комментарий

Ваш e-mail не будет опубликован. Обязательные поля помечены *