«Трезвая Россия» яхача федеральни проектаца барт язбаьб ГIалгIайчено

ГIалгIайчен Мехкдас Евкуранаькъан Баматгире Юнус-Бека барт язбаьб «Трезвая Россия» яхача федеральни проекта кулгалхочунца Хамзаев Султанаца. ОагIонаша дийцар да мехка бIорахой могашал, унахцIенал лораера тIехьа тайп-тайпара ногIалаш дIакхохьаш, кхыдола вIашагIкхетараш деш иштта къахьегама болх дIабахьар. Из барт чIоагIбеш болча каьхата кулг яздара Iадат кхоачашдир Москверча Постпредстве.
«РФ паччахьа майски амарашка къоагадаь яздаь да паччахьалкхен керттерча декхарех цаI да, вахар 80 шерага кхаччалца лакхде дезаш хилар. Вай кхетаду, массаза къаракъ мелаш, наркотикаш юаш мелаш бола нах 40 шерага дIа ца кхоачилга, хIаьта 60-70 шу укхаза дувца а эшац. Цу барта тIа гIолла унахцIено лораера гIулакх Iалаш деш да вай, йIаьха ха йолаш мишта ваха йиш я бIорахошта масал гойташ», — аьлар Баматгиер Юнус-Бека.
Хамзатов Султана белгалдечох, гуманитарни никъ ба цар хьалаьцар. «Из тохкама говзанчий гIодар да, наркотикех, маларах, тхьамках нах лорабеш цар могашал, унахцIено лораеш мел йолча юкъарченашта гIо дара тIехьа. «Трезвая Россия» яхача проекто шин шера йолча хана чухьа барт язбаь хиннача мехкашка 30 гаргга низъоамала моттигаш Iалашъяьй, мах а боацаш. Кастлуш ГIалгIай мехка а цу тайпара 4 объект хьалъергья оаха», — аьнна белгалдир проекта кулгалхочо Хамзаев Султана.
Цо яхачох оагIонаша хьоашал леладергда дешаргахьа, культурагахьа, Iилмангахьа, унахцIенонгахьа, могашал лораергахьа долча даькъе. Иштта гIулакх леладаргахьа мехкарча Iаьдалца нийсхо а лостам а хургболаш кортбохабеш долча зулама дохьал къовсам лоаттабеш болх дIахьоргба. Иштта цар дийцар майски амарашца паччахьа Владимир Путина хьакхайкадаьча корт бохабеча хIаманна дохьал къовсам лоттабарах йолча тоабанна ГIалгIайчен кагирхой юкъеозабеза аьнна.
Цу тайпара балхаш деш хилча вай мохк а еррига паччахьалкхе а дегIайоагIаргья, бакъда дерригаш барта долаш, цхьа дегI а хинна овтта деза вай цу зулама дохьал. Даьла къахетамца, хьалха дIаихача ханашкахьа санна а доацаш ГIалгIай мехка из гIулакх дикка тIехьашка даьннад. Молаш бола нах гуц, бихалелаш, е гIовтта ца могаш лаьтта бадаш. Бакъда, цхьацца молхингаш йохкаш ийъеш уж мелаш цох зуламаш деш нах ба. Цу нахаца болх беш, царна таIазар деш долча Iаьдала гIо де деза вай цу тайпара бола нах мичахьа ба гучабаьлча дIабувцарца.
ЦIена къам – даькъала къам!
Матенаькъан Илез

«Сердало». № 99 (12035), ера, 5 июль, 2018 шу. Четверг, 5 июля 2018 года

Добавить комментарий

Ваш e-mail не будет опубликован. Обязательные поля помечены *