Лоралелаш аллергиях

Вайна ховш ма хиллара хаоттама 4 ха я шера хувцалуш. Царех хIара хана чухьа аллергия хулаш, хала хьувзаш хул цхьабола нах. Къаьстта бIаьстии аьхкии чIоагIа хул наха аллергия. Цхьабараш баьцах, гаьнех тохача зизаех аллергия хулаш хул, хIаьта шоллагIбараш йIовхал ла ца могаш, цунца та хала долаш хул.

ХIанз додаш ахка хиларца берашта чIоагIа хала я йIовхал ла. Царна геттара Iаткъа малх а, йIовхал а, цудухьа лорадеш леладе деза бераш, уж меттал боккхагIбараш а хила беза шоай гIулакх ховш лоралуш. Хийла бер хул, йIовхалах еррига цIе хIамилгаш хьатIа а техе, хало озаш дагIаш.
Аллергия чIоагIа даьржа лазар да, дукхаш ба из хулаш кагий а боккхий а, цудухьа тIехьарча хана из геттара даржаш латтандаь, Аллергиях йолча Дерригачадунен юкъарчено цунца къовсам лоаттабара духьал аьнна белгалдаь ди да – июль бетта 8 ди. Цу дийнахьа геттара теркам бийя, ма хетта низ тIа а бахийте къахьега говзанчаша, лораша аллергиях долча хьалах хоам беш, наха шоай могашал лораяр догдоахаш.
ХIаравар хIана вац ала дукхаш ба аллергияца хьокхалуш нах. Цу даькъе болча говзанчаша, тохкамхоша яхачох 30% шахьара бахархой цунца бала болаш цу лазарах чакхбувлаш ба. ХIаьта юкъ-юкъе из хулаш дIатIадоал 60% бахархошка дIакхоачаш.
МоллагIа аллергия даькъе шийна хало йолаш хIама хилча цу сахьате лорашка гIо йоах говзанчаша. ХIана аьлча, тIехьарча хана, шу массаза дала чIоагIлуш мара лаьгIлуш дац из лазар. Юхьанца фуд ца ховш а, долалуше геттара чIоагIа хулаш а тайп-тайпара да уж аллергияш. Цудухьа ханнахьа лорашка дIа а ваха гаьна далале цун дохьал шийна дарба деш волча сага аьттув ба цох кIалхарвала.
БIаь шу хьалха ишта чIоагIа даьржа хиннадац аллергия хIанз санна. Бакъда, тIехьарча 20 шера дукхаш ба аллергия хулаш а, цо кхестабеш а. Дуача хIамангеи, леладеча гIулакхашкеи хьажжа да из йоах лораша. Цудухьа ше буача кхачанца шийна лазараш хургдоацача тайпара лоравала веза саг.

Матенаькъан Илез

№ 100 (12036), шоатта, 7 июль, 2018 шу. Суббота, 7 июля 2018 года

Добавить комментарий

Ваш e-mail не будет опубликован. Обязательные поля помечены *