Бераши ахкан малхи

Ахка хьатIадарга а, салаIа отпусках бахарга а чIоагIа сатувсаш хул бIарчча шера къахьегаш хинна, кIаьдбенна нах. Къаьстта а из ха дукха езаш хул бераш, школера цIахийцача сакъерда, ловза, лувча хи тIа аха паргIата хул уж. Малха кIалха бада а шоай цIока маьлхага доагадайта а гIерташ хул дукхагIбола кIаьнкаш. Каст-каста хаза йиш я царгара: «Хьажал аз загар мишта яьй!» Укх деношка со волча хьоашалгIа баьхкабар веший-виIий кIаьнкаш. Юхьанцарча школе ухаш ба уж. Коа бассейн а оттабаь, лувчарал совгIа, шоаш малха кIалха бийша бада, яхаш, цох доккхал деш бар са хьаьший. Букъ хьахьекхача, тIера Iодийна цIокаш дар, сов чIоагIа баьга. Иштта хул бераш-м. Шоаш дер нийса хет царна. ЦIока дукхагIа Iо мел доал, из дикагIа да мотташ хул цар уйла. ЗIамига ба уж, хIама хац. Бакъда царна юхерча боккхагIчарна ха деза шоай берашта пайдане дар фуд, аьхки цар са мишта лаIа деза, сенах лорадала деза. Со лор вац, хIаьта а бе-беча книжкаш тIара дийшад аз маьлха кIалха мишта лела веза е мишта алла веза. Наха яздечох, маьлха зIанараш чIоагIа пайдане я дегI дахьаш, унахцIено лораеш а чIоагIъеш а болча дешархошта. Цар яхачох, эггара хьалхара маьлха кIалха аллар е вагIар 5 – 10 минутал cовгIа хила йиш яц. Эггара хьалха малха кIалха аллар мух боацача хана, хьун е хин йисте хилча бакъахьа да. Из дича нийсагIа хургда, Iуйрийна 11 сахьатагара делкъийна 13 сахьат даллалца йолча хана. Цу хана арара йIовхал +20 градусал лохагIа хила йиш яц. ДукхагIдола бераш духхьал букъ кIалъоттабийя дадаш хул. Из нийса дац. ДегIа массе маьженна цхьатарра малх тIакхоачаргболаш вIаштIехьадаккха деза гIулакх. Юххьанца малха кIалъоттабе могабу букъ, цул тIехьагIа – аьтта оагIув, кхоалагIча аргIагIа – че, юххера – аьрда оагIув. ДIахо дIайодача хана, малха кIалха йоаккха ха 2 – 3 минута йIаьхъе мегаргья. Вешта аьлча, малха кIалха 7-13 минут яьккхача хIама дац. Маьлхе ах сахьат доаккхе, пхийтта минута Iийне салаIа деза, аьнна, белгалдаьккхад, вай унахцIено лораеш, ха тIа латтача наха, физкультура а сага дегIавар а кIоаргга Iомадаьча болхлоша.
КIира цкъа маьлхага воацаш, цIенача фега садоахаш ха дIайихьача зене хургдац. Цудухьа дешархошта ха деза, сихха маьлхо букъ боагабар шоай унахцIенонна зе деш долга. Из бахьан долаш цар лазабала тарлу корта, дего бу болх хувцалу, из чIоагIагIа детталуш хул. Кхы а да цох хьадала тарлуш дола вонаш. Масала, сона дагадоагIа тхоаш 8 классе дешаш долаш Шолжа-ГIалий тIа дига. Къонача эскархой хьажар дар цига. Тха трибунашта хьалхашка гIолла тIехдовла дезар эскархой гIирс бувхаш, береташ тухкаш, илли доахаш, гIа нийса боаккхаш. Шолжа-ГIалий тIа аьхки чIоагIа йIайха хулар, са хьалдаккха йиш йоацаш. Цу дийнахьа цига гулбеннабар нохчий а гIалгIай а районашкара дукха къона эскархой. Тха аргIа хьатIакхача гаьна яр, цунца дувзаденна маьлха кIалха латташ массехк сахьат даьккхар оаха. Зипа йIайха хачеши пиджакаши яр тхона тIайийхараш. Тхоцара цхьа кIаьнк, бIайха малх ла ца могаш, дог гIелденна Iовежар. Нагахьа санна цу юхе Iи долаш моттиг хиннаяларе, е боагача маьлха кIалха сов дукха лаьттавецаре из хургдацар. Из деррига аз дувц, дешархой шоаш маьлхах лорабалара тIахьехаш. Нагахьа санна цар из ца дойя, боккхагIчарна ха деза берашта дика хургдар малагIа да, во хургдар малагIа да. ТIаккха цар ахканара салаIар нийса а дегIа пайда хьабоалаш а хургда.

С. Арчаков

№ 102 (12038), ера, 12 июль, 2018 шу. Четверг, 12 июля 2018 года

Добавить комментарий

Ваш e-mail не будет опубликован. Обязательные поля помечены *