Июль бетта 14 дийнахьа дезду ГIалгIайчен ди

Укх Даьла лаьттан тIа дукха къамаш да, иштта мехкаш а да. Ший аргIа дIалаьца улл ГIалгIайче а. ГIалгIай мохк зIамига ше бале а, ший мотт а болаш, ший Iадаташ а долаш чIоагIбенна латт. ГIалгIай къам эхь-эздел долаш къам да.

Вайна ховш ма хиллара ГIалгIай Паччахьалкен 26 дизад укх шера. ХIара шера ГIалгIайчен ди лоархIаш дола цIай вай дезду июнь бета 4 дийнахьа. ХIаьта укх шера из тIехьатеттад июль бетта 14 дийнахьа дездергдолаш. Из доаккха цIай да вай берригача мехкахошта! Денгара ди массаза доал хозлуш, тоалуш йоагIа вай паччахьалкхе.
Росси Федераце эггара къонагIйола субъект я ГIалгIайче. Нанас хьеста боча бер санна дегIабоагIаш латт вай мохк, ди тIехьа хозача оагIорахьа эргабувлаш. Наха паргIато хургйолаш хьалъеш латт дукха гIишлош: больницаш, школаш, ишта кхы дIахо а.
Ма доккха совгIат, паргIато, ираз да вай мехка кхувш йоагIача тIехьенна ГIалгIай мохк дегIабоагIаш хилар. Iимерза баха уйла йолаш болча наха дегагIоз я из. Вай культура ший оагIо лаьца, хозача оагIорахьа йода: вай низъоамалхоша цу гIулакха низ тIабохийт. Иштта наха салоIам хургболаш, берий теркам тIаозаш гIишлош а я вай мехка.
Хозача оагIорахьа дегIаухаш да, вай мохк, вай къаман тархьар дIадовзийташ дола дукха аламбекъаш. Геттара чIоагIа хувцаенна йода шахьар Магас. Тоадаь наькъаш, массанахьа наха паргIато хургйолаш хьалъетта гIишлош — хозача оагIорахьа кхувш я ГIалгIайче.
Кхувш йоагIача тIехьено, малагIа хувцамаш дича бакъахьа да аьнна хаьттача, шоай уйла йовзийтаре дика хургдар. Берий говзал гучайоаккхаш, царна вай къаман хIама довзийташ дола сакъердаме хIама телевидене хьахьокхаш хилча геттара дика хургдар, воай къаман оамалца вай мехка керда ноахал хьаоттаргдолаш. Дешараи Iилмани министерствос дика къахьег воай берий сакхетам лакхбеш, школаш шоай аргIа лаьца дIайолх тайп-тайпара олимпиадашка дакъа лоацаш, моттигаш йоахаш.
Кагийча наха пайдане хургйолаш Минспорто увттаю тайп-тайпара спортивни конкурсаш. Вай къам масса хана хиннад эхь-эзделах, хьаьша тIаэцарах, воккхавар лархIарах дола гIулакхаш довзаш. Из хоза гIулакх хIанз а тIехьа леладеш да.
Массадараш цхьана оарцагIа а дайна овтта деза вай, воай мохк тоабара тIехьа къахьега.

БАЗЕНАЬКЪАН Милаграс

№ 102 (12038), ера, 12 июль, 2018 шу. Четверг, 12 июля 2018 года

Добавить комментарий

Ваш e-mail не будет опубликован. Обязательные поля помечены *