МалагIча меттал ду оаш дукхагIа къамаьл

ДукхагIча даькъе ГIалгIайче бахараш гIалгIай болаше а, шоай къаман мотт кIезигагIа бувц гIалгIаша шоайла къамаьл дIа-хьа дувцача хана. Оаха зийнад, тIехьарча хана метта хьаькъе Гос Думе айдаь хаттар дувцаш а доашхаш а хулаш дола дукхагIдоа вIашагIкхетараш из айдаьча наха шоай къаман меттал ца а дувцаш эрсий меттал дувцаш. Дукха ба интернете багIачарех метта хьал дувцача хана из эрсий меттал яздеш. Цудухьа оаха лаьрхIар вай мехкахошта хьалхашка, малагIча меттал ду оаша къамаьл, аьнна хаттар оттаде.

Залина дешархо:
– ГIалгIай мотт сай гаргарча нахаца бувц аз. Эрсий мотт бувц се деша яхача хьехархошца.
Фатима, хьехархо:
– Сайна ма могга гIалгIай меттал дувц хьожа со къамаьл, сай нанас лебаь сай наьна мотт из боландаь.
Мадина цIен-нана:
— Аз дукхагIа эрсий мотт бувц, сай берашка а из мотт мара бувцийтац, хIана аьлча эшаш бац из е сона а е са берашта а. Вай дIадувце а хьадувце а нах башха ба, цар шоай лоIам бар ду. Нагахьа санна Iомабинза баргбоацача лагIа тIа вай мотт отте, тIаккха Iома а баь из бувцаргба аз. ХIаьта хIанз со цунга хьаштъяц.
Хьава, медсестра:
— Мах баь варгвац вай метта. ГIалгIай меттаца дувзаденна да са вахар. ГIалгIай мотт вайна даьша йита, цхьаккха хIаманца оза йиш йоаца ганз я, цар лебаь мотт.
Тамила, дешархо:
– ГIалгIай мотт, хIана аьлча из са наьна мотт ба.
ХьакIаьш, дешархо:
— Аз гIалгIай мотт мара бувцац, сона дукхабез сай къаман мотт яхаш вай леларах из бакъдац. ХIана аьлча аз а кхыболча наха а эрсий мотт бувца дукхагIа. воай мотт дукхабеза яхаш вай ювцар харцо йолга ховргда, вай къамах болча наха гIалат доацаш къамаьл де а, язде а ховргдолаш шоай бераш дукхагIа малагIа мотт Iомабе дIачутела хьежача. Сона байнаб нах, эрсий мотт Iомабайта а, ингалсий мотт Iомабайта а, Iарбий мотт Iомабайта а шоай бераш деша доагIадеш. Бакъда, сона вайнавац ший берага гIалгIай мотт Iомабайтардухьа къаьста хьехархо а оттаваь цунна хьехаш саг. Шоашта вайнавале ала.
Iаиша, хьехархо:
ДукхагIча даькъе эрсий метта дувц аз къамаьл сайна из дIабувцаш аттагIа доландаь.
ПIаьтмат, хьехархо:
— ДукхагIча даькъе эрсий мотт аз бувце а, сона гIалгIай мотт дукхабезац аьлча бакъдац. Дукха-м кхы а хIамаш деза, бакъда кхайкамаш дар мара воай метта дукха тIера дац вай. Вай сагот-м дац вай мотт дIабаьннабар аьнна, е баха бисабар аьнна. Нагахьа санна нанна бакъахьа хете, бераша из бувцаргба, ца хете бувцаргбац. Ишта хила йиш яцар, кертаца бе беза вай болх.
Хяди, журналист:
– ГIалгIай, меттал сайна бовзачарца, гонахьарчарца ду аз къамаьл. ХIаьта эрсий меттал, дича ца доалача метте ду. Масала деша ягIача, е кхыча къаман нахаца эрсий мотт бувц безаш хул са.
Хьава, дешархо:
— ДукхагIйолча хана аз эрсий меттал ду къамаьл. Са чIоагIа безам бар цIенна сай гIалгIай мотт ха а, из бувца а. Амма, сайна нийса из дIабувца ца харахи, вай мехка дукхагIболча наха эрсий меттал мара къамаьл деш цахиларахи аз а дукхагIа эрсий меттал ду къамаьл.

БАЗЕНАЬКЪАН Милаграс

№ 102 (12038), ера, 12 июль, 2018 шу. Четверг, 12 июля 2018 года

Добавить комментарий

Ваш e-mail не будет опубликован. Обязательные поля помечены *