Шин книжко чулаьца дуне

Дика книжкаш, мел дукха дале а, каста наха ийце дIадоал. Цул тIехьагIа уж хетташ бола а эца безам бола а нах дукха хул. Ишттача книжкаех дар, 20 шу хьалха Наьсарерча полиграфически комбинате кепа а теха арадаьнна, Хашагульгов Iаьлий «Тешам», « Даьй гIалаш, даьй юрташ…» яха ши книжка. Уж дешача хана, цар деррига дуне чулаьцад аьле хеталу. БIаргашта хьалхашка хувцалу дIадахарийи кердача замани сурташ. Вешта аьлча, дика гуш ба замай бувзам. Цхьа эзар мара хиннадац уж книжкаш, цудухьа наха юкъе сиха дIадаьржад. Цо къаьгга тешал ду мел боккха безам ба къаман Хашагульгов Iаьлий кхолламца бувзабеннар.
Хьалхара книжка «Тешам» яхаш да. Цун юхьиг дIайолаеш, кепа техад поэта даьча йоазонна. Иштта яздаьд цо цу книжкашта юкъедахача йоазоний хьакъехьа: «Ер стихаш язъяь ткъаь итт шу гаргга е совггIа зама я. Цу хана кепа тоха йиш йолаш яцар ераш. Цу хана Iаьдал къоабалдеш дола йоазонаш мара арадувлацар. Из ха, Даьла дикаца, хIанз дIаяьннай. Паччахьалкхен оттам а хувцабеннаб. Керда зама я. Бакъда нах-м шоаш хиннараш ба, аьнна, хетталу (керда ноахалаш хьалкхийнадале а хьалкхувш латте а). Наьха кхетам, уйла-нигат хала хувцалу… Цудухьа тахан а «шоай ханнахьа» я, аьнна хет сона ер стихаш. Цудухьа зарба тоха пурам лу аз акхарна, ер книжка арадаккха лаьрхIа къахьийгачарна дег тIара доккха баркал а оалаш».

ДукхагIа уж дешаш доагIаш да Хазбиева Хьавайна, хIана аьлча из я уж шаккха книжка арадаьккхар а, Хашагульгов Iаьлий кхолламца безам болча наха товр даьр а.
ХIанз а вай къаманна юкъе дукха ба аьнна хет сона лоамашка ца хулаш, даьй баьха мохк, гIалаш, вIовнаш, малхара кашамаш ца гуш бола кхувшбоагIараш. Царна къаьстта дукха хIама довзаргда шоллагIдола «Даьй гIалаш, даьй юрташ…» яха книжка дийшача. Оздиг, Кхерахь, Бийрг, ОлгатIе, Пхьимат, Тхьаба- ерд, Хамхе, Маьт-ЦIеле, кхы массагIа я уж поэта ювца, вай къаман овлаш хьадаьнна йола моттигаш?..
Къаьстта бIаьхий ба поэта мотт, царна юкъе да кхетаде хала дола дешаш а. Книжка арадьккхараша тIеххьарча оагIош тIа деннад цар дошлорг.
С. Арчаков

№ 102 (12038), ера, 12 июль, 2018 шу. Четверг, 12 июля 2018 года

Добавить комментарий

Ваш e-mail не будет опубликован. Обязательные поля помечены *