Машен лелаяра бокъонаш Iомаяр

Цхьа моллагIйолча юкъарченах е цу чурча болхлоех дувцаш хилча, эггара хьалха вай хьоахаду цар даьха толамаш. ХIаьта со шоана цох дувца валлац.
Вай цIагIара арадовлача хана, хIара денна дас-нанас цхьа хьехар тIехьа доацаш ара довлийтац вай: нахаца Iимерза хилалахь, гIулакхаца хилалахь, машенах лоралелахь, фуннагIа-моллагIа хуле а, воха ма вохалахь, массаза эздел лораделахь. МоллагIча сагагахьа хила дезаш, цо кхоачашде деза гIулакхаш да уж. ХIаьта цу тIехьа шоай дезалхо хилийтар хIара даьи-наьнеи декхар да.

Вайна ма харра, сага вахаре дукха гIулакхаш хул, уж кхоачашдинза даргдоацаш нийслу цкъаза хьал. ХIанз ха мишта эттай аьлча, дийнахьа цкъа хIаьта а машенаца саг ара ца ваьлча варгвоацаш да гIулакх. Йиъ чархаца лелача цу чоалхо доккха гIулакхаш кхоачашду.
Говр хахкар, иштта машен лаллар а из лелаер а тхьовр хана денз маIача наьха гIулакх лоархIаш хьадоагIа, бакъда, тахан эттача хьале, кхалнаьха дукха хул цу говр-ворда хьал хийцача аьшкаца дIа-хьа баха безаш гIулакхаш. ХIаьта маIа нах Iуйрийна балха дIа а болхаш, сайрийна юха чу а боагIаш, мукъа боацаш хул дукхагIа йолча хана. Ишта, нана бер ийца больнице яха езаш е юрта каьхатий гIулакха справка яккха езаш нийсъелча, из машен дIалалла маIасаг цIагIа ца хиларахи, шийна цу кхалсага из лалла цахарахи, цхьадола чIоагIа эшаме гIулакх юкъагIдус кхалнаьха. Яккханза яргйоаца справка цу дийнахьа ца яьккхача, каьхаташ тIехдоалаш е бера тоха беза маха, молае еза молх юкъагIйисарах дарба тIехдоалаш нийслу. Цунга хьежжа тIехьарча хана дукха баьржаб шоаша машен лелаеш бола кхалнах. Цудухьа из, йоаггIача тайпара ший бокъонашца лелае а ховш кхалсаг хилар бакъахьа да. Вай, кхалнаьха гIулакх дац машен лелае аларах доалаш дац хIаьта а вета а цар из лелаеш хилча. Хьоахаде деза, из кхалсаг ше цхьаь а йоацаш, шийна уллув кхоаччара маIа саг а волаш хилча бакъахьа долга а. 10-15 шу даьнна кIаьнк а волаш цIагIа, цун яьннача ханага хьежжа, машен лалла бокъо а йоацаш, цун ший нана е йиша дIайига аьттув цахиларах, гIулакхаш юкъагIдусаш дукха кхалнах хургба вай мехка.
Шахьар Наьсаре йолаш я дика цIихеза машен лалла Iомавеш йола «Автошкола Евлой» яха автошкола. Цига деша а машен лалла бокъо луш дола каьхат хьаэца а бокъо я кхалнаьха. ХIаьта цига деша багIача мехкарашца цу хьаькъе къамаьл хилар са:
— Дукха ха яц, кхал наха машен Iомаеш курсаш йоахаш автошкола вай мехка йолга сона хайна. Дика ца хой а, юрт гIолла лела а, лоадам боацаш машен хахка а хов сона. Бакъда, машен хахкара кулг говзалал а из малагIча метте мишта лелае еза а бокъонаш Iомаярдухьа деша яхай со. Хьехархо урок ела дIайолалушше а, со уйлашца се араяьннача цIагIа юха чукхаьчар, мишта аьлча, хьехархочо Маринас ший урок хьехара дешашца дIайолаерах. Се цIагIара ара мел йоалача хана дас-нанас сайна деш дола хьехар дагадехар сона. Ше оалар чIоагIа кIаьда, боккъал хоза, моллагIа а кхетаргволаш оал цо. ЛадувгIа дог доагIаргдолаш хул цун хьехар. Духхьала наькъа бокъонаш йийца Iац из урок хьахьехача юкъа. Цо хьоахаду, вай къаман сагаца хила деза гIулакхаш, оамал, эздел. – Сабаре хила деза вай, — оал тхога хьехархочо, — хьайна наькъа тIа бокъо йоацаш сагагара гIалат нийсделча корзагIа вала йиш яц, хIана аьлча, сихвенна, е бокъонаш ца ховш вола воккха саг вагIаш за рулем, е бокъо ца гуш тIехваьнна хила йиш я из саг, массагIа хул. Цунна бехк била а ца хьожаш, из бехказ воаккхаш бахьан лаха хьажа деза вай, Дала а ма йоахий вайга, хьай бусулба вешийна бехк тIера баккха 70 бахьан лаха. Мел дукха, боккхача Iалам-наьха дешаш вай хьакхувларах Даьла дош массаза а лакхагIа латтаргда, цудухьа дика хийттар сона Маринас уроках каст-каста, Дала а ма йоахий вайга иштта, оалаш, — йоах дешархочо.
Бакъда, воккха а зIамига а, маIа а, кхал а йоаггIача боараме бокъонаш ховш хилча нийсагIа да. Далла хьалхашка ший гIулакх ца ховча сага хургба-кх мичча тайпара дале а бехк. Цудухьа геттара лоархIаме да моллагIча гIулакхагахьа ший бокъонаш ховш саг хилар.
Вай ювцача «Автошкола Еовлой» деша багIараш болабенна ши-кхо ди даьннача гIолла, наькъа тIа кхерамзле цахилийтар Iалаш деш бола инспектораш баьхкар машена бокъонаш Iомае баьхкача дешархошта хьехар де. Цига цар дийцар дар, наькъа тIа бокъонаш лораер миштад а, из сенна эшаш да а. Уж бар воккхагIвола лейтенант Бесанаькъан Iисай Мухьмад, йоккхагIйола лейтенант Оздой Iисай Аза. Ах сахьата дийцар ГАИ болхлоша наькъах лаьца. ХIаьта цар цу юкъа белгалдаьхараш дуккха хIамаш дар:
– Вай бераш лораде, къоаной лорабе, шоаж лорале, вайдар морг долча зIамигача къаман цхьа саг эшавалар доккха во да, наькъа лора ца луш, вай сихал бахьан вай доадеш кхоача де йиш яц вай – йохар цо. Ше ГАИ болхло мара веце а Мухьмада къамаьл деча хана хеталора из дийша-Iалам саг ва, аьнна. Иззал саг кхетавеш, Iимерза, дика къамаьл дар цо даьр. Вахарца дувзаденна дуккхача гIулакхий хьалаш хьоадир цо ший къамаьла юкъе. – Вай кегийнах ахбийса яьнначул тIехьагIа гул а бале пхьегIа тIа ма латтийта, 12 сахьат даьнначул тIехьагIа малагIа гIулакх кхоачаш де вIашагIбетталу уж цига? Боккъал доал де дезар вай даьш-ноанош шоай дазелашта. МоллагIа хIама хьанийсделча эггара хьалха бехке дараш даи-нанеи ма дий вай, оашош лорабе шоай даи-нанеи, ма де царна цатовраш. Машени никъи дехача хьатоаде йиш йолаш да, хIаьта саг велча юха воалургвац. Дингахьа дилача а чIоагIа къа долаш ма дий саг вер. МаьркIижа ха хилча цIагIа чугIо, кхал вар а маIа вар а, — аьнна белгалдир ГАИ болхлоша.
Оалаш да, «миччахьа кхоаче а саг эзделах воха йиш яц», хIаьта дино а йоах, хоза оамал яраш ялсмала хургба. Вай фуннагIа Iомадой а моллагIча лагIа тIа нийслой а сага дегIацара хоза гIулакх дIадоале цун дар дош дац. ЦIаккха а ше саг хилар дицде йиш яц цхьанне а. Иштта цу тайпарча оамалца нах ба «Автошкола Евлой» болхлой!
Дукха воаккха воацаш зIамига саг ва автошкола кулгалхо Гелисханаькъан Беслана Мухьмад-Башир. ХIаьта ший яьннача ханага хьежжа а доацаш дика кулгал ду цо ше бехктокхаме латтача школан, из хьагойт цу чу болх беш йолча персоналас. Уж ба: Угурчнаькъан Хьамида Iазраил, инструктор Горданаькъан Макшарипа Мовлатгири, хьехархо Бабхой Iалихана Марина.
«Евлой» автошколе деша багIачарна боккъала хоза хет шоай дешар, хала а доацаш кагирхой лерттIа дешарах кхетаргболаш эшаш мел дар долаш да цу чу. Шоашта хьахьехаш дар сакъердаме а хеташ Iомаду дешархоша, иштта кхоачам хиларах.
МоллагIа хIама дувца велча деррига дийца валац, иштта цу автошколан дар дийца а варгвац. ХIаьта а са хьоахаде безам ба дIадахача 2017 шера, ерригача Россе гIолла «Автошкола Евлой» «тIехйола автошкола» аьнна хьалхара моттиг яьккхалга! Из чIоагIа лоархIам болаш хIама да. ХIаьда дIахо шийна машен лаллара бокъонаш Iомаеш йолчо йоах:
— Сай аьттув боаллача тайпара деша хьож со. Сайна моге тIехдика чакх а йоаккхаргья аз ер автошкола дийша. Дег тIара баркал ала ловра сона из автошкола хьайийлачунна а, цун кулгалхошта а, цу чу мел волча болхлочоа а къаьстта тхоай хьехархочоа Маринайна! Аттача меттаца, ладувгIа дог доагIаш ба цун хьехам. Дала аьттув боаккхалба цар кхы дIахо а, дикача хIаманна тIехьа! – йоах дешархочо.
Машен лоаллаш вола саг маIа саг вале а кхал саг яле а бокъо ховш ца хуле къаман моастагIа ва. Ше кхеташ воацаше машен лалла а вена цо хьадаь зулам мехка хьалхашка из бехкатокхаме озаш хургда. Цудухьа, моллагIа вале а ше леладу хIама фуд ховш а, цох кхеташ а хила веза саг, дукхача наха цох бала, гIайгIа, сагото, юхьIаьржо хургдоацаш.

Матенаькъан Илез

№ 105 (12041), ера, 17 июль, 2018 шу. Вторник, 17 июля 2018 года

Добавить комментарий

Ваш e-mail не будет опубликован. Обязательные поля помечены *