Вахара никъ харжар

Шоай школера тIеххьара экзаменаш дIаенна а баьнна, аттестаташ хьа а ийца, вахара боккхача новкъа бала кийчлуш ба вай мехкара эзараш бола кагийнахи мехкарийи. Царех ба Сурхо тIарча ийс шера дешача школера выпускникаш а. Укх шера дийша доалача берий класс цаI мара яцар укхаза, цу чу Iилмаш Iомадеш хилар 28 дешархо. Школе даьккхача ийс шера алхха дикеи тIехдикеи дешаш из ха дIайихьа кагирхой а бар царна юкъе. Къаьстта белгалъяккха лов Муцольгов Сулейма АсмаI. Массадолча Iилмах цхьатарра дика кхеташ, хьехархошта а шийца деша багIача новкъосташта а ше езайолийташ, дIадихьар цо уж ийс шу. Ма хулла ха зехьа ца йоае а гIертар. ГIалгIай меттах дика кхетача, из безача нахах яр дешархо. Наьна мотт шийна дукха безилга цкъа хьахьекха а Iийнаяцар из. ИйслагIча деша дагIача берий наьна меттах йолча Олимпиаде Наьсарен районе хьалхара моттигаш яьхарашца яр из. Каст-каста «СелаIад» яхача берий журнала тIа кепа еттар цо язъяьча байташта а дувцарашта а. Масала, царех дар «Тайш», «Сискал» яха дувцараш, «БIаьсти» яха стихотворени, кхыяраш. Ала деза, журнало цунна, гонорарал совгIа, преми а совгIаташ а тийнна хиларах.
Вай республикан дешара министерство хьалдайта, экзаменабар санна лоархIам бола диктант цо пхиъ йоаккхаш яздир. Кхы эсалагIа дIаяланзар цо юхейиса экзаменаш а. Царех дукхагIчарех пхиаш яьхар Сурхо тIарча дешархочо. Карарча хана цунца деша баьгIа кIаьнкаши йиIигаши дIахо шоай хургбола вахара никъ хоржаш ба. Из мишта хургба – дика е во – тийша да, дукхагIча даькъе, царех шоаех. Къахьегарга, ше хержа балха говзал езарга хьежжа хул дешара толам а аьттув а. МоллагIа никъ АсмаIá хорже а, из беркате, цунна шийна а наха а накъабоалаш хургба аьнна хет сона. Массаболча кагийча наьха а мехкарий а аьттув балар лов дагалаттача дикача хIаманга кхача.

Сурта тIа: Сурхо тIарча ООШ выпускница Муцольгова АсмаI.

№ 107-108 (12043-104), шоатта, 21 июль, 2018 шу. Суббота, 21 июля 2018 года

Добавить комментарий

Ваш e-mail не будет опубликован. Обязательные поля помечены *