Венначул тIехьагIа цIи хазийтар

Ше вахача хана чухьа моллагIа цхьа дика даьча сага цIи дукхагIча даькъе из венначул тIехьагIа ярж наха юкъе дIа-хьа. Саг ше дийна волча хана цунга эзди саг ва хьо, Iа леладер дика гIулакх да, наха эшаш саг ва хьо аьле хьоахадиц вай. Бакъда, из кхелха наха юкъера дIавахача чIоагIа вувц вай цун са дуненцара къаьста мел дукха ха яларах виц ца веш. ХIаьта дийна волча хана цхьа гIалат доале сийдоацаш саг хул. МоцагIа нохчочо аьннад яхаш да-кх, «дийна волча хана нохчо а хинна, венначул тIехьагIа гIалгIа хургвар со-м», аьнна. Венна саг вай мел во вар а чIоагIа могавендаь аьнна да цо уж дешаш.

Дикачох а вочох а Дала ше раьза вар долда, моллагIа веннача сага гешт долда. Со-м кхы хIанз цох лаьца дувца валац, дагадохарах хьалъалар мара. ДIахо аз хьоахадергда вай мехкарча наькъех вай техкаш йолча цIера хьакъе.
Вай оамал я, цхьа моллагIа саг велча, чехка оарцагIа дайле вай веннача сага цIерагIа моллагIа проспект, тIаьре е парка-сквер Iалашъеш. ДукхагIча даькъе тIаьрешта техк вай уж цIераш. ХIара, шоай веннача сага цIерагIа моттиг хилар ловш болча наха хоржар эггар хьалха Магас, тIаккха Наьсаре, цу тIехьа МагIалбика иштта дIахо кхы йола шахьараш я. ДукхагIча даькъе, ше Дала кхеллачахой цу шахьаре ваьха а воацаш, хьаштдале цига хинна а воацача сага цIерагIа лу вай цу тIаьрешта уж цIераш.
Ма мотталаш со цу гIулакха дохьал ва. Вац! Амма са кара хилча цу тайпара цIи туллаш хилча аз из саг ше ваьхача кура тIарча, е юртарча тIаьренах тулийтаргьяр. Сурхо тIа вахача сона, са цIерагIа моттиг цу со кхеваьча юрта хилча бакъахьа еций, кхычахьа со вIалла мала ва а, е укх дунен тIа ваьхавий а ца ховш бола нах бахача шахьаре тулачул? Массавар, керттерча шахьаре хьалхагIа а гIорташ чугIерт шоай сага цIерагIа моллагIа цхьа тIаьре хилийтара. ДукхагIа из саг вовзаргволча, цун хьамсарагIа хиннача, дукхагIа езаш хиннача из ваьхача метте хержача дикагIа яц-те из моттиг? Сона-м се лоархIаш, айса лоархIаш бола нах бахаш йолча метте сай цIи яха йисача нийсагIа а меттахьа а хургдар аьнна хет.
Хийлане, ше цу тайпара гIулакх дIадоладича, шахьаре моттиг кора ца йича дут из гIулакх ше айъе гIерта цIи лелаяь саг ваьхача юрта моттиг лургья аьлча ца вашаш. Из гIулакх леладеш бола нах а, царна из кхоачашдеш бола Iаьдала болхлой а сайх нийса кхетар догдоах аз укх гIулакха.
«Саг дика ва гIулакх доаллаш вале, га дика я сом латаш яле», яхад вай даьша. Дикача сага цхьаккха хIама кхо дац, бакъда ший моттиг йолаш, доагIачул сов ай ца деш хилча бакъахьа да из гIулакх фуннагIа дале а. Нагахьа санна цхьа мехка юкъара, масса шахьарашка а юрташка а доал дIакхаьча мехка гIончал хинна, е лакха чин долаш хинна саг вале из ше да. Амма, аз-м цу мо волчоа а ше ваьхача юрта дергдар из гIулакх. Цу сага цIи яха йисарал совгIа из ваьхача юрта сийдоалаш а кхыча наха цун цIи дIахозаш а, цу юрта тIехьа дика тешал дусаш а хIама хул цох. Бакъахьа хетар сона цу гIулакхагахьа наха уйла йоре.
Магасеи, Наьсареи тайп-тайпарча тайпан цIераш я массанахьа хьалйитта йоахкараш. Цхьайолча хана цхьан кура тIа шиъ а кхоъ а цIи нийслу цхьан тайпан цIерагIа, амма вувца саг кхывар ва шиннахьа а. Оашош зе мара дезац шоана, юрташка хьежача цига кIезига я тайпан цIерагIа тIаьреш кхыйола моттигаш. ХIана? Вай дерригаш а шахьарашка чугIертандаь. Саг ше ваьхача юрта вовзаш а везаш хилча бакъахьа вар.
Цу тайпара гIулакх леладераш шоай саг геттара лакхве гIерт, е шоай юртарча наха из ца везандаь цигара араваккха гIерт.

Матенаькъан Илез

№ 107-108 (12043-104), шоатта, 21 июль, 2018 шу. Суббота, 21 июля 2018 года

Добавить комментарий

Ваш e-mail не будет опубликован. Обязательные поля помечены *