НАЬНА КЪАХЕТАМ

Шовзткъа шу хьалха хинна хIама дагаух сона. Цу хана хIанз санна дукха машинаш яцар, наькъаш геттара ладара дар. Дале а, сага вахара кхерамаш тувсаш моттигаш хилацар. Цудухьа Грознера (цига деша вагIар со) цIавоагIаш бийса яхарах кхера везацар. Сайранна пхи сахьат даьлча, цIаьхха дагадехар сона Инаркъе ваха. Чехка кийчвенна автовокзале кхаьчар со. МагIалбике йода тIеххьара автобус яхаяр.
— Ши минот хьалха хьо укхаза кхаьчаваларе, хIанз водаш хургвар хьо, — аьнна, елаелар кассир. — ХIанз мукъа ва хьо.
Се Iеш волча юхаваха аьнна со тохавелча, цхьаьккъа автовокзала хьалхашка латта автобус зийра аз. Хайра нах бацар цу тIа. Со дIахьежача, трафарета тIара «Знаменское» яха дош дийшар аз. Ай, ер-м Гарагорске а яха, тIаккха мара Надтеречни районе мича йода. Ах никъ укханца а баь, юхебисар йодачунца-йоагIачунца бергба-кх аз, — аьнна, уйла чуессар сона. — ФуннагIа дале а, цIакхача веза. Сийсара гIанахьа нана бIаргаяйнача хана денз, цхьаккха сакхетам боацаш хьувзар со.
Цу автобуса тIа а хайна, со Гарагорске хьалкхаьчача баьде бийса хиннаяр. Лакхача дукъа тIара IокIал а ваьнна, цхьа тикилг йолча со дIакхаьчача, гуш саг вацар. Сахьата гаррга лаьттар со, машен кхетарга хьежаш. ТIадувхача барзкъа чIоагIа биркъа вар со. Уж барзкъаш тиша хиларах дувцац аз, уж кIезига хиларах дувц. Шийлача, цIайзача бус сона тIаювхаш яр йиткъа кофта, готта хачилг, каьхата лист миссел сома айраш дола маьчаш. Цул совгIа керта тIа кий а яцар.
Юххера а машен нийсъелар. Цо кхоачавир со Буро тIара Моздака а Грозне-гIалийтIара МагIалбике а бодача перекрёстке. Машен лоаллаш волча сага чIоагIа баркал а аьнна, Iоваьлар со. ДIаэттав со цига — йоагIаш цхьаккха машен яц. Яьсса аре я-кх, гуш цхьаккха сердалг а йоацаш. Латт со, латт. ДIахьеж со, дIахьеж. Дунен тIа адамаш хилара цхьаккха белгало яц йоалаш. ТIеххьара, бийса гаьна яьннача хана, дегI шелалах дувладала доладеннача хана, са кхоачалуш латт аьнна хийттача хана, гаьннара, Махьмадхи тIара боагIача новкъа сердилг яьлар. Йоагаш цхьа фара мара яцар. Долче, шоллагIъяр яьга хила еза-кх цун.
Дукха ха яьккхар сердалоно гарга ца гIорташ. Юххера из хьакхаьчача, дог Iодожаш санна хIама хилар сона. Ена хьагарга а гIерта, тIаккха дехьа а яьнна дIаяхар ши чарх йола мотоцикл.
Тоъала гаьна а яьнна, цIаьхха юха а хьайза тIаера сона мотоцикл. Из лоаллаш вар эрсе вар, кIаьнк мо дегIа зIамига а волаш.
— ХьатIаха тIехьашка, — аьлар цо. — ГIоравергва хьо укхаза ара вусе.
Цкъарчоа ак ала венавар со, тIаккха ваха а ваха, дIатIахайра. Адама тIа ма кхоачалда сона тIакхаьчар. ДегIа юкъегIолла чакхбувлар мух, шелало йист хила витацар, бIаргаш хьаделла низ бацар. Иштта къемата ди тIакхоачадаь Инаркъе вигар со мала ва ца ховча эрсечо. Сов чIоагIа дегI дувладенна, дIаволавала ца могаш цхьа юкъ яьккхар аз. Юххера а, шорттига ког ловзаш, чукхаьчар со.
ЦIаккха дицлургдац сона наьна бIарахьажар. Доккхий хи тIадамаш Iодоладелар цун бIаргех. Къурдаш а деш елхар из.
— Ай, шелало тоIа ма ваьвий хьо, — йоахар цо. — Фу леладу Iа? Кхоана цIавеча мегацарий? Бийсанга хIана вахав хьо?
Пишках букъ а гIортабаь, Iохоавир со цо. Ше юххе Iохайра. Кастта йIовхал еттаяла йолаелар са дегIах, цIий дедар пхаьнашка гIолла, дегIа маьженаш болх бе йолаелар. Дийнвелар со. Цу хана ца леш виса хIанз а вахаш ва. Нана бакъдунен чу дIаяхай. Сона из дага мел йохача хана, цу бус хиннача бесса елхаш гу сона из. Сона йIовхал енна са нана, гIораяь са дегIа маьженаш мукъаяьха нана. Фуд хьол дезагIа!

Кхоартой Мурад

№ 107-108 (12043-104), шоатта, 21 июль, 2018 шу. Суббота, 21 июля 2018 года

Добавить комментарий

Ваш e-mail не будет опубликован. Обязательные поля помечены *