Сеуле яьккхача коталон 30 шу дизад

ГIалгIай мехка цIаккха ца кхаьчача тайпара, йоккха дегагIоз кхаьчар 1988 шера. Сеуле хиннача Олимпийски ловзарашка дакъа лоацаш хиннача вай мехкахочо Арсамаков Исраила, шийца яхье мел баьннараш эша а беш, хьалхара моттиг яьккхар. Из боккха толам бар, цул хьалхагIа из баьккха цхьаь цаI вайнаьха саг а вацар штангисташта юкъе. Цу хана а вацар е хIанз а вац. Из лоархIаме котало цо яьккха 30 шу дизад. Ха дIаяхаяле а, ший лоархIам бовнза да Исраьила карахдаьнна доккха гIулакх. Цо даьча хIаман сийле дуне мел латт йовргьяц, аьнна, хет сона. Тахан а да из хIара гIалгIачоа доккха цIай, цудухьа Исраил ше а цун хьехамча хинна Дунен халкъашта юкъерча спорта мастер Кодзоев ИбрахIим а цу цIайца даькъала бувца ловра сона.

Сеулера Исраил цIавеначул тIехьагIа, эггара хьалхарчарца цох газета тIа йоккха очерк язъяьр вар гIалгIай гIорваьнна хинна журналист Хамхоев Мусий Мустафа. «Сердало» газета керттерча редактора заместитель волча цо, йоазош ше наггахьа мара дицар. Бакъда Исраила из котало яьккхача, цох ца яздеш Iеваланзар из а. «Атта дий чемпион хила?» яхаш корта а болаш, шийца штангиста сурт а долаш, арадаьлар из йоазув. Цунна юкъера массехк мугI боалабе безам ба са укхаза. Массахана боалаш хиннабац Исраила аьттув. «Масала, 1987 шу чакхдоалаш, Советски Союза кубок яккхара тIехьа городе Ижевске лаьттача яхьашка аьттув ца боалаш цIавоагIача Арсамаковна накъабаьхка духхьала ший кхоачара нах мара бацар. Фу дергда Iа, иштта да-кх спортсмена вахар. Котвоале – зизаш а оркестр а. Эше – цу дерригнех воал. Сенна дувцаргда из, цу дийнахьа дог деладала хIама долаш вацар Исраил. Ма дарра аьлча, цхьабола специалисташ а бар цох догдилла, спорте ше дергдар из даь ваьннав, аьнна, хеташ. Цунна шийна а кIордадаьдар, нийсархоша сакъердача хана, штанга ловзаеш валла, хIара дийнахьа, безам бале а беце а, тренировкашка аха. Цхьацца лазараш а гучадала доладелар. Цудухьа дарий а хац, цхьабакъда йоккха спорт йита дагадехар цунна.
Дикка ха яьккхар цо, штанганна юхе ца водаш. ЦаI доацаш алац: бахача безама хозал ийшаяц е цкъа цIийх летар дIакхосса хала да. КIезиг-дукха меттавеча, Олимпиаде ваха вIаштIехьадоалий хьежача фу дар-хьогI, аьнна, дагадехар цунна. ЦIагIа цхьацца-шишша дувцаш, нана Марем, вежарий Мухьмад, Мувса, Iийса, йиша Фая, несарий цу гIулакха чIоагIа раьза болга гучадаьлар».
Дукхача халонех чакхвала вийзар цун Сеуле кхачалехь. Уж эшаеш, Олимпиаде а вахá, вай мехка спортивни сий лакха лоаттадеш, котало яьккхá цIавоагIа гIалгIай зIамига саг. Цул тIехьагIа кхы а хиннаб вай олимпийски чемпионаш: боксёр Чахкиев Рахьим, кIалтохаргах леташ вола Манкиев Назир, дзюдоист Халмурзаев Хьасан. Уж берригаш боча а хьамсара а ба вайна, бакъда къаьстта дукха веза Исраил, хIана аьлча из ва цу лакхаленга бода никъ хьабийллар, из ва эггара хьалхара вай олимпийски чемпион.

С. Арчаков

№ 107-108 (12043-104), шоатта, 21 июль, 2018 шу. Суббота, 21 июля 2018 года

Добавить комментарий

Ваш e-mail не будет опубликован. Обязательные поля помечены *