Хьога хаьттача доттагIал фуд?

ХIара сага вахаре ба доттагIал леладу нах. Берий беша дIадолалу из цхьаболчар, дIахо ишколе, иштта кхы дIахо йодача хана а.

ДоттагIий башха ба. Тешаме вола доттагIа доккха совгIат да сага. Дукха хIама хул духхьал доттагIчунга мара дувцаргдоацаш. Дика доттагIа веша когаметта ва. Цудухьа, тхо хьежар, ГIалгIай мехка бахархошта доттагIалах фу хетт:

Iийса, журналист:
– КIоарга чулоацам болаш дош да «ДоттагIа» яхар. Сога хаьттача доттагIа тешаме хила веза, новкъостал эшача хана, эшаш дола гIулакх де кийча волаш. Тешам – доттагIала кертера дакъа да.

Ахьмад, хьехархо:
– ДоттагIа сога хаьттача хIама хьаийккхача метте сона уллув латтаргвар ва. Сона новкъостал де кийчвар ва.

Жабраьил, дешархо:
– ДоттагIал сога хаьттача хьога во деча хьона новкъостал деш вола саг уллув хилар да. Миччахьа хьо вале а хьо цунга кхайкача новкъостал де кийча вола саг ва из.

Тамерлан, медбрат:
– ДоттагIал да хьога гIайгIа еча, хьоца из екъа саг хилар, хьона дикадар хилча дегчура гIадгIоргвола саг хилар.

Адам, корреспондент:
– ДоттагIал да эггара хьалха шоайла лоархIам хилар. МоллагIча хана уллув отта кийча хилар а доттагIал да.

Хьамзат, дешархо:
– ДоттагIал да фуннагIа моллагIа мара ца хиларах, новкъосто шийгара гIулакх дийхача цун оарцагIа вала кийча хилар, цун гIо дар.

Юнус, журналист:
– ДоттагIал да, хьа са дIадала кийча волаш, дуне дохарах хьох тешаш вола саг Iа лархIар, лоравар. ДоттагIал да, хьа бала, е кхаъ бувца саг хилар, вахара халонаш тIакхаьчача хьона балам гIортабаь хьо Iовужийтаргвоацаш, воша санна дукхавезаш, масса хана хьона уллув волаш, хьа новкъост хилар.
ДоттагIал да меца а хього хьо хилча шийгара хьона баа кхача е мала хий далар. ДоттагIал да хьога – бала ккхаьчача из бала дIабувца хьа новкъост хилар.

Илез, юкъархо:
– ДоттагIий дукха хулаш бац. Наггахьа – цаI е шиъ мара хилац сага вахаре доттагIа. Вожаш дIахо бараш хьа новкъости ба хьоца моллагIа дика а во а декъаш. Дикача доттагIчунга кхоачаргдолаш хIама дац. ДоттагIал да аьнна хетт сонна, сай сих санна со тешаш волча сагацара дар. МоллагIдола хIама аз тешаме дергдола саг, сона хьалхара аз мо уйла ергйола саг ва доттагIа. Амма цуж моргаш чIоагIа кIезига ба укх дунен тIа.

Базенаькъан Милаграс

№ 107-108 (12043-104), шоатта, 21 июль, 2018 шу. Суббота, 21 июля 2018 года

Добавить комментарий

Ваш e-mail не будет опубликован. Обязательные поля помечены *