ГIамагIай ганаргаш – цIи йоацача лазара духьала дарба

ГIамагIа хьогге а дIаяннай, хIаьта бочабIар хьахила хIанз а гаьна да. ГIаьххьа ха я докъадалийта маьлхе дехка дада гIамагIай ганаргаш хьа а ийца царех тIумараш яха. Тхо зIамига долча хана лоалахой берашца дахе йолччара яхе гIамагIаш ца йиача Iелуцар тхо. ХIана аьлча, боккъала чам болаш хулар уж! ХIаьта оаха уж селла дукха гулъяр-м, духхьала цар чам хилар а доацаш кхы а цхьа бахан дар. Цар ганаргаш! Ма чам болаш хул-кх цу юкъера яьккха тIум!
ЛакхагIа йолча ткъоврон тIа вала майрагIа малагIа ва, дукхагIа цу тIера сомаш хьанна гулду хьожаш яхьаш хулар тха массадолча берий, тхоайла. Цун бахьан а дар тIумарашца дувзаденна, хIана аьлча, Iа дукхагIа сомаш мел гулду, дукхагIа ганаргаши, цар чура тIумараши хулар!
Тхо бераш долча хана хIанз мо пакеташи, кулекаши дацар массанахьа, Iокхайса дадаш хIаьта а дацар, хилча а духхьала чIоагIа эшача метте мара леладицар уж. Вешта, моллагIча ловзара берашка селиконовый тIормеш дIателацар цIен боккхагIаша, ловзара кертах болле са ца доаккхаш виса тарлу, яхаш лора дора бераш.
ХIаьта оах тхоай кхача тхоашта тIадувхача барзкъа юхьиг хьал а лаьце цу чу гулбора, хIамма а тIормечурчул кIезигагIа а хилацар иштта гулдаьр. Фу дора аьлча, тIаювхача коча йист гулъеш хьал а лаьце, из цхьан бейоаллаше вокха кулгаца гаьн тIара хьа а боахаш цу чу сомаш бехкар, коча юхьиг лаьца дола кулг кIаьд делча вокханца хувца а хувцаш.
ГIамагIаш миччахьа хулаш яц, уж нийслора дукхагIа, наха доал деча беша е нах бахача коа. ХIаьта оаха цу ковна даьга е цIен-наьнага ца хоатташ яхацар уж, хIана аьлча, цIагIа массаза даьи-наьнеи хьехар латтар лерге: наьха коара, бешара цу цIен сагага ца хоатташ сомаш ма дахалаш, хIама лочкъаерах тарра да шоан из, яхаш.
Тхоашта дукха беза сом гулбаь даьлча, наькъ тIа даьле цига дIахо хьора оаха тхоай яхьаш: малагIчо дукхагIа тIум йоаккх, сихагIа ганаргаш хьанна дохаду хьожаш. Уж дохадеш лаьрхIа хIама хилацар, духхьала наькъ тIара хьаийце гIаьххьа болча шин кхераца, цаI кIал билле цу тIа ганарг а дилле шоллагIбар IотIабетташ йоахар тIумараш. Ма чам болаш а хулар-кх!
ГIамагIай ганаргаш вай дегIа чIоагIа дарбане да. Деррига фуд аьлча, цар ганаргах «ВI7» яха хийла эшаме витамин йоал, цу чу йоагIа цианидное вещество яха хIама. Из хIама дегIах дIакхийттача, цо цIийоацача лазарий клеткаш йоаю е ерзаю.
100 грамм гIамагIай ганаргах йоахк цIена 25 грамма белок, 47 грамма хьоанал, 4 грамма углеводаш. Из доацаш гIамагIай ганаргаш дарбана да бронхит, коклюш, нефрите яхача лазарашта. Иштта дегIацара тайп-тайпарча садола хIамашта а духьала дарба доал цу тIумарех. ХIаьта укх гIулакха тIумараш бийда йолча тайпара яа еза.
Иштта гIамагIай тIумараш дарбана я дега пхаьнашца бала болча сага. ТIумараш яа йиш я бийда йолаш а, йокъаяь а, кхерза а шийна чам болча тайпара. ХIаьта, хьалхара юача хана волалуш 20 граммал дукхагIа ца йиача бакъахьа я. ДIахо мел дукха юэ а новкъа яц.
Дала лорадолда вай воча лазарех а, балех а. Цамогаш мел волчоа Дала моаршал лулда!

И. Айюбов

№110-111 (12046-047), ера, 26 июль, 2018 шу. Четверг, 26 июля 2018 года

Добавить комментарий

Ваш e-mail не будет опубликован. Обязательные поля помечены *