Пхьарсах дехка сахьаташ: Мичахьара кхаьчад уж вайга?!

Тахан мел ха яьннай ха телефона тIа IотIахьажа мара эшац, хIаьта хьалха из таро йоацача хана, пхьарсах дехкача сахьаташцара бувзам чIоагIагIа лелабаьб наха. ХIанзарча хана дукхчар куцала лелаю из гIирсацара белгало, тIадувхача барзкъага хьажже эц, эцаш хуле а. Тайп-тайпара да сахьатий маьхаш: оттамага а, арахийцача брендага а хьаже белгалбоаккх цун мах.

Яха ха вай тахкача, вайна гучадоал сахьаташ массаза пхьарсах дехкаш леладаь доацилга. Эггара хьалха, пхьарсах дохкалехь, уж сахьаташ киса леладаьд дукхагIболча наха. ХIаьта лоархIамегIа йола кеп яр, цу заман чухь сахьата юхь къайлайоаккхаш, IотIакхувлаш дола ногIар. «Хантер» аьле, цIи йоаккхаш хиннай цох. ЧIоагIа цIихезача сага хьал а, лоархIам а гойташ хиннай дошоча зIанарца хетта йола, дошо хантер.
Духхьашха пхьарсах дехкача сахьата цIи яккхар белгалдаьд 1571 шера Дадли Роберта ингалсий мехкарча «Паччахьа» аьнна, наха шийх цIи йоаккхаш хиннача Хьалхарча Елизаветайна жовхьарах дизза тIехкар доалла, деза сахьат даларца. МаIача наха юкъе цу хана кхы лоархIаме хиннадац уж сахьаташ, царех духхьал кхалнаьха гIирс лоархIаш хиннаб ткъестлагIча бIаьшаренга кхаччалца. Юххьанца кхалнаьха гIирсаца лоархIаш мара хиннадеце а, тIехьагIа маIача наьха гIирсаца дIаийнад сахьат.
ТкъестлагIча бIаьшар чухьа хувцабеннаб сахьатий лоархIам. ТIемахоша къоабалдаьд сахьаташ пхьарсах дехкар, атто бахьан долаш. ЦIоках даьча тIехкарашца чIоагIдеш хиннад цар сахьаташ, тIема юкъе ханага хьежа аттагIа хургдолаш, киса хьежа а ца безаш. Цигара хьадоладеннад массане сахьаташ пхьарсах леладар.
Тахан мехкараша а, кIанташа а, боккхагIчара а, бераша а пхьарсах дехк сахьаташ. «Rolex» яха бренд чIоагIагIа цIихеза я наха юкъе. Уж сахьаташ дезагIа лоархI таханарча хана.
Аттонга хьажача, сахьаташ аьрдигача пхьарсах леладе доагIа, хIана аьлча, цу пхьарса балха гIулакхагахь кIезигагIа низ тIабодандаь.
ГIоза леладолда оаш!

Новрузнаькъан Макка

№110-111 (12046-047), ера, 26 июль, 2018 шу. Четверг, 26 июля 2018 года

Добавить комментарий

Ваш e-mail не будет опубликован. Обязательные поля помечены *