Ший даьна хьалхашка ший бер хьастар миштад гIалгIачоа?

Са нана ГIалгIай паччахьалкхен телерадиокомпане болхло я. Ший даьна хьалхашка ший бер хьастар эзделаца дац гIалгIачоа. Со зIамига бер долча хана хьаста меттел, дIахьожаш а теркал бицар даьша шоай дезал шоай даьшта юхе, эзделаца из ца хеташ.

Цу хьаькъе сай нанас сайга дийцар дувцаргда аз шоана.
Со зIамига бер долаш, берий каляскача со Iочу а йилла, буа кхача кийчбеш йоалар ше йоахар нанас. Коа хин гIув йоакхаш ваьллав са да. Делкъа ламаз даьчул тIехьагIа, гIувна кIоаг а баьккха хIама даа Iохайшаб болхлой. Цигара ший воI волча хьоашалгIа венна хиннав са Даь–да. Венача маьр–даьна гонахьа кхесташ хиннай са нана, хIаьта каляскача улла бер теркам боацаш диссад даьгара а, наьнагара а.
ЦIаьхха ше дIахьажача, коляска лаьтта меттиг йаьсса яр аьлар нанас, ер тIехьашка хьажача баькха латтача кIоага чу йодаш коляска хиннай. Из бIарга дайнад даьна а, бакъда вагIача ший даьна хьалхашка вада а цIогI тоха а эхь хеташ IаттIа Iийнав из.
Цхьа Даьла къахетамца Даь–дас зийнад из. «Ай Iовада» – аьнна мухь техаб цо ший воIага. Хьалхашкара чархаш кIоаг чу а йолаш лаьцар хьо чуилла коляск оалар, сога нанас.
Вай даьша чIоагIа леладаьд эздел, шоашта юкъе а, иштта кхыдолча къамашца а. Эзделаца да вай хьаьша–да тIаэцар, цун тух сискал оттадар, цунга хьажар, из ший фусаме лерхIаш лелавара.
Вай мел дола Iадаташ да эздела керттера оттадаь. Вай къаман лард я аьнна хет сона, эздел а, денал а, хьаькъал а. Хьалхарча заман чухь эзделаца ханнадац дас ший дезалхо хьастар, цунна теркам бар, наха гуш. Геттара лоархIаш а лорадеш а хиннад дас, нанас шоай даи нанаи гуча шоай бер цахьастар.
Укх статьяна оахош еннача цIера дош хаттарца наха хьалхашка дахьарца, тхо хьажар мишта кхетаду вай мехкахоша, гIалгIаша из гIулакх.

Чопайнаькъан Хади, почтера болхло:
– Дукха хана денз хьадоагIаш да гIалгIашта юкъе из гIулакх даьна а, маьр–даьна а хьалхашка ший бер мархIа ца доллар, хьаста цахьастар. Сога хаьттача геттара хоза гIулакх да из, бакъда, хIанз Iа ях дукхчар лелдиц из, дицденнад. Из во да.

БIарахой Муслим, «Сердало» газета корреспондент:
– Сога хаьттача ший даьна а, нанна а, бехкеча сага а хьалхашка ший бераца уллув ваьнна лелар, бер хьастар эзделаца дац. Бер ший даьна деза а деза, цун из хьаста чам а ба, хIаьта къайлагIа дича бакъахьа да цо из гIулакх. Сона дага мел доагIа со мел чIоагIа боча мара ца хиларах са дас а, нанас а, боккхийча наха хьалхашка а, чувенача хьаьшана хьалашка а хьийставац со. Эздел дика хIама да.

Бесанаькъан Хьабибула, рекламнни юкъарчен кулгалхо:
– Бер вайна ма харра вай тIехье я. Бер, кхеде деза, хьаста а деза, ше теркал дар деза цунна а. Даьна хьалхашка бер хьастар дийшача наха хьаала тарлу из харц доацилга. ХIаьта вай къамах болча наха эзделаца дац аьнна хет сона ший даьна хьалхашка бер хьастар.

Даканаькъан Жаннат, хьехархо:
– Ший даьна хьалхашка ший бер хьастар сона эзделаца дац аьнна хет. Сога хаьттача къайлагIа хьастача дикагIа да из.

Iарчакхнаькъан Мувса, дешархо:
– Сога хаьттача ший бер хьастар эзделаца дац ший даьна а, нанна а хьалхашка. Вай Iадатаца доагIаш хIама дац из.

БАЗЕНАЬКЪАН Милаграс

№114-115 (12050-051), ера, 2 август, 2018 шу. Четверг, 2 августа 2018 года

Добавить комментарий

Ваш e-mail не будет опубликован. Обязательные поля помечены *