Фуд вай кагирхошта тахан цатоъар?

Ер хаттар дIахезача хIаране эггара хьалха аргдар да – вай кагирхошта хьаькъал таац аьнна. ХIаьта из хьаькъал мичара да дезаш да, мишта гулде дезаш да хьаала ховш кIезига ба.

Ховш да, вай дай-ноаной хана нах мукъабоацаш массаза а дезарех баьхкалга. БархI сахьата наб яр, бархI сахьата болх бар, дIахо йола ха мукъа лоархIаш хиннай цар. ХIаьта цар мукъа лоархIаш хинна ха я цIен дезараш кхоачаш деш дIайохийташ хиннар. ХIаьта цIагIа, коа, карта кулг тоха мел дукха ха еза ма хой вайна хIанз, цу хана хIаьта а хиннад из иштта. Цудухьа хийцца цхьа минот мукъа ха хиннаяц ала йиш йолаш ба вай дай-ноаной шоай вахара хан чу.
Мишта кхебеш хиннаб вай ноанош шоай дезал? Эггара хьалха хьехарца. ХIанз хийла дас, нанас шоай бер делхаш хилча, цо дIадехар фуннагIа дале а из цунна дIадаларца из соцаду. ХIаьта из нийсса дац. Хийла нанас телефон яха моастагIа дIа а веле Iохоаду ший бер. Ца делхийта йоал со оал цо, хIаьта цу беро цу моастагIчунгара дукха во хIамаш хьаэц: лазараш, оамал, кхыдар. Со цец воалаш дар да, Iа хьатIадийхача беро хьада тугаш ца хилар. Ший бер ше кхайкача дIатIадоагIаргдолаш цунга телефон дIа а хьекхе из дIатIадех хийла нанас. Нанас хьадийхача бер хьадагIац яха дешаш вIалла Iадувша тигац са керта чу. Ишта вIалла хила йиш йий-хьогI аьнна цхьа тамашийна а хет сона из гIулакх. Из хIанад аьлча, хьалха хиннадац хIанз мо бераш яхар дас-нанас деш дола Iаьдал. ХIанз Iомадаьд вай из гIулакх.
— Ай, царех хьехар дIа-м латац, дIааьннар дIа-м эцац цар – оал дукхагIболча дас-нанас. Эцаргда, цкъа аьлча ма Iе, иттаза, бIаьзза, эзарзза ала! Вай фуннагIа дувцарах дас-нанас дувцар дегIах дIалат моллагIча дезалхочоа. ХIаьта цкъа аьлча доалаш дац из. Массаза а дIаяха деза харцача хIамах лорале, дикадар хьаэца. Цигга дег чу ца доде а, цIийх ца лате а, миччахьа цхьаннахьа дегIах лат уж дешаш, цIазапIелгах лате а. ТIаккха мичча хана во хIама де лаьрхIача, дика да-хьогI е зене да-хьогI аз дер аьнна шек ваьннача метте хьадагадох из хьехар. Хьа дегIах из хьалета доаллаш хилча во хIама де карахдалийтац цо. Даггара духьале ю дага ухаш ма делахь из, харцахьа да хьона из, яхаш уйлаш хьалхаювларца.
Вай лакхе ма аллара вай дай-ноаной мукъа боацаш хьабаьхкаб хIанзалцца. Цудухьа дукхагIа берашта хьехар даь-дас, даь-нанас деш хиннад. Боккъала хоза, кIаьда, безаме оал-кх цар шоай виIий-йиIий дезалга оалаш дар, ладувгIа а дIаэца а догдоагIаргдолаш. Уж морг хьехараш вай лерге лаьтта хиларах дIадаьннадац вайна юкъера Эхь, Эздел, ГIулакх, кхыдар. ЛаьрххIа, дада-нана болча вода, аьле аравоалар хьалха хийла зIамига саг, цар хьехарашка ладувгIа. Вай къаман Хоза гIулакхаш дувцийт царга, хIаьта хIанз вай кагирхой дукхагIбараш ах бийса яьлча ара а баьле пхьегIа тIа латт, телефонаш чу Iочу а байле. Чам бац царна боккхагIашка ладувгIа а цар яхачунца а. Цудухьа дицлуш латт Эздел яха хоза гIулакх, наькъа тIа лоравалар, нах лорабар. ХIаьта вай дицде йиш яц, вай кагирхоштеи, боккхагIаштеи юкъера бувзам дIабоале, царна хьехар де саг хугвоацалгеи, хьехар доацаш уж бусе царех хайра тIехье хургйоацалгеи.
Дешархошка дехар дар са, хье зIамига саг вале (яле), хаттар ле хьайга, эггар тIехьа хьай даь-да, даь-нана, е наьна-да, наьна-нана долча маца хиннав хьо, Iа цар хьехарга хоза хеташ ла а дийгIа, цар дувцар хьаийцар малагIа ха я? ХIаьта дешархо воккхалгахьа ласта саг вале, хаттар ле хьайга, эггар тIехьа Iа хьай виIий-йиIий дезалашта хоза а хеташ, дIаэца далар аьнна хеташ пайда хула балара аьнна хеташ хьехар даьр малагIа ха я?

И. Айюбов

№117-118 (12053-054), шинара, 7 август, 2018 шу. Вторник, 7 августа 2018 года

Добавить комментарий

Ваш e-mail не будет опубликован. Обязательные поля помечены *