Зархмата дIаяздаь иллеш

Укх шера 85 шу дуз, ГIалгIай багахбувцама шоллагIа книжка арахийцача денз. Цунна юкъедахараш хиннад Измайлов Зархмата дIаяздаь саг йоагIача-йодача даьха иллеш. Из болх боккха лоархIам болаш хиннилга гу вайна цу тIа къахьийгача наьха цIераш Iойийшача. Масала, гIалгIай меттала дIаяздаьча хIара иллена уллув кепа теха хиннад Мальсагов Дошлакъас даь цун эрсий таржам. Цу книжканна дешхьалхе язъяьр Мальсагов Оарцхо хиннав. ХIаьта редактора болх беш, цу тIа къахьийга хиннад Мальсагов Зоврбика.

Iилманхоша яхачох, Измайловс яздаьраш санна иллеш дIаяздеш, цул хьалхагIа а е цул тIехьагIа а цхьа саг хиннавац. Ший «Фольклора хьакъехьа» яхача статья тIа АртагIа Оарцхос аьннад: «З. Измайловс баьр мо болх хиннабац, дукхалга диллача а пайда эцар лаьрхIача а».
Дувца книжка арадаьнна дукха ха я. Цудухьа из лаха а деша а таро яц массане. Дицденна иллеш, кепа теха, арадаьхача царех Iилманхошта, хьехархошта, студенташта совгIат хургдар аьнна хет. Цул совгIа, къаман культуран юкъера бIарчча дакъа дийнлургдар. Иштта дика хургдар аьнна хеталу Зархматах шийх яздича а, хIана аьлча из мичара, малагIча дезалера хиннав, фу дешар дийша, фу болх беш хиннав, мел ваьхав, маца кхелхав хьаала ховш наггахьа саг хургвац.

С. Арчаков

№123 (12059), шоатта, 18 август, 2018 шу / Суббота, 18 августа 2018 года

Добавить комментарий

Ваш e-mail не будет опубликован. Обязательные поля помечены *